Kunsill Affarijiet Ġenerali, 21/04/2015, 21 ta' April 2015

Riżultati prinċipali  

Il-Presidenza infurmat lill-Kunsill dwar id-diskussjonijiet tal-ministri għall-affarijiet barranin u dawk għall-intern dwar kwistjonijiet ta’ migrazzjoni waqt laqgħa konġunta msejħa mir-Rappreżentant Għoli għall-Affarijiet Barranin u l-Politika ta’ Sigurtà u l-Presidenza fl-20 ta’ April 2015.

Minn intenzjonijiet tajbin issa rridu nimxu 'l quddiem lejn azzjoni konkreta. Edgars Rinkēvičs, Ministru għall-Affarijiet Barranin Latvjan 

Il-ministri laqgħu d-determinazzjoni akbar li tittieħed azzjoni dwar il-migrazzjoni, b’mod partikolari fir-rigward ta’ tliet oqsma ewlenin:

• it-tisħiħ tal-ġlieda kontra l-faċilitazzjoni ta' dħul klandestin ta' persuni
• it-tisħiħ tal-azzjoni tal-UE biex jiġu salvati l-ħajjiet fuq il-baħar
• iż-żieda fil-kooperazzjoni ma' pajjiżi terzi 

Il-ministri qiesu li din id-diskussjoni kienet bażi tajba għall-Kunsill Ewropew straordinarju msejjaħ mill-President Donald Tusk dwar il-pressjonijiet migratorji fil-Mediterran fit-23 ta’ April 2015.

Il-Kunsill qabel li jżid il-ħlasijiet bil-quddiem taħt l-inizjattiva favur l-impjieg taż-żgħażagħ bi kważi €1 biljun fl-2015. Dan biex l-Istati Membri jkunu jistgħu jintroduċu malajr miżuri għall-ġlieda kontra l-qgħad fost iż-żgħażagħ.

"Iż-żieda sinifikanti fil-ħlasijiet bil-quddiem tirrifletti l-impenn qawwi tagħna biex jiġi indirizzat il-qgħad fost iż-żgħażagħ fl-Ewropa. Fil-fatt, in-nuqqas ta’ prefinanzjament huwa attwalment wieħed mill-ikbar ostakli li jipprevjenu li s-€6.4 biljun mill-Inizjattiva favur l-Impjieg taż-Żgħażagħ jiġu mobilizzati malajr. Il-Presidenza Latvjana issa ser taħdem mal-Parlament Ewropew biex tiżgura li r-regoli l-ġodda jiġu adottati mill-aktar fis possibbli", qal Jānis Reirs, Ministru għall-Finanzi Latvjan.

Il-Kunsill irreveda l-qafas finanzjarju pluriennali tal-UE għall-2014-2020 biex jiġu ppreservati l-fondi għall-promozzjoni tat-tkabbir u l-impjiegi. "B’din ir-reviżjoni aħna lħaqna l-prekondizzjonijiet kollha sabiex ir-riżorsi allokati jistgħu jintużaw sal-massimu tagħhom u b’hekk tiġi żgurata implimentazzjoni bla xkiel ta’ programmi li jappoġġaw it-tkabbir u l-impjiegi,” qal Edgars Rinkēvičs.