Kunsill Affarijiet Ġenerali, 10/02/2015, 10 ta' Frar 2015

Riżultati ewlenin  

Qafas Finanzjarju Pluriennali (QFP) tal-UE għall-2014-2020

Kellna diskussjoni produttiva ħafna dwar din il-proposta. Aħna ninsabu ottimisti li dalwaqt nilħqu ftehim li ser jippermetti lill-istati membri jużaw il-fondi ta’ investiment kif maqbul fir-Regolament dwar il-QFP. Ladarba l-Parlament Ewropew ikun ta l-kunsens tiegħu, il-Kunsill ser jadotta l-QFP. Edgars Rinkēvičs, Ministru għall-Affarijiet Barranin tal-Latvja u President tal-Kunsill

Il-Kunsill iddiskuta reviżjoni tal-qafas finanzjarju pluriennali (QFP) tal-UE għall-2014-2020. L-għan tar-reviżjoni hu li l-UE titħalla tittrasferixxi € 21.1 biljun ta’ impenji mhux użati mill-2014 għas-snin sussegwenti. Dawn l-impenji baqgħu mhux użati fl-2014 minħabba l-adozzjoni tardiva tal-programmi tal-UE ġestiti flimkien mill-Kummissjoni u l-istati membri.

Ġlieda kontra t-terroriżmu

Fid-dawl tal-avvenimenti traġiċi f’Pariġi, il-ministri ddiskutew il-ġlieda kontra t-terroriżmu. Huma vvalutaw l-azzjonijiet meħuda s’issa u rriflettew dwar it-triq 'il quddiem. Huma approvaw wkoll ftehim mal-Parlament Ewropew dwar regoli ġodda għall-prevenzjoni tal-ħasil tal-flus u l-finanzjament tat-terroriżmu.

Programm ta' ħidma tal-Kummissjoni Ewropea għall-2015 

Il-Kunsill adotta konklużjonijiet li jilqgħu l-programm ta’ ħidma tal-Kummissjoni għall-2015 li jistipula għadd ta’ inizjattivi ta’ prijorità li b’mod ġenerali jirriflettu l-Aġenda Strateġika, adottata mill-Kunsill Ewropew f’Ġunju 2014.

F’diskussjoni matul l-ikla ta’ nofsinhar mal-Viċi President tal-Kummissjoni Timmermans, il-ministri esprimew tħassib dwar l-irtirar ippjanat mill-Kummissjoni tal-proposti tagħha dwar l-iskart u l-kwalità tal-arja. Il-Presidenza indikat li tinsab lesta li tkompli taħdem fuq dawn iż-żewġ proposti.