Kunsill Affarijiet Ġenerali, 23/06/2015, 23 ta' Ġunju 2015

Riżultati ewlenin

Kunsill Ewropew 

Il-Kunsill għamel aktar progress fit-tħejjija tal-Kunsill Ewropew ta' Ġunju, inkluż permezz ta’ diskussjonijiet dwar sett rivedut ta’ abbozz ta’ konklużjonijiet.

Id-diskussjonijiet tagħna wrew biċ-ċar li l-istati membri kollha jixtiequ li l-Kunsill Ewropew li jmiss ikollu eżitu pożittiv Edgars Rinkēvičs, Ministru għall-Affarijiet Barranin Latvjan

Il-mexxejja tal-UE huma mistennija li jiffukaw fuq l-isfidi tal-migrazzjoni, is-sigurtà u l-affarijiet ekonomiċi fil-laqgħa tagħhom tal-25 u s-26 ta’ Ġunju fi Brussell. "Id-diskussjonijiet tagħna wrew biċ-ċar li l-istati membri kollha jixtiequ li l-Kunsill Ewropew li jmiss ikollu eżitu pożittiv. Issa għandna fehim aktar ċar mid-dibattitu tagħna dwar kif naslu għal fehma kondiviża dwar il-kwistjonijiet importanti li għandna quddiemna", qal Edgars Rinkēvičs, Ministru għall-Affarijiet Barranin tal-Latvja u President tal-Kunsill tal-UE.

L-Eks-Repubblika Jugoslava tal-Maċedonja

Bħala parti mill-affermazzjoni mill-ġdid tal-impenn kontinwu tal-UE mal-eks-Repubblika Jugoslava tal-Maċedonja, il-Kunsill adotta konklużjonijiet li jistabbilixxu l-fehmiet tiegħu dwar il-kriżi politika li għaddejja fil-pajjiż. Il-Kunsill ħeġġeġ lill-partijiet kollha biex jonoraw l-impenji li għamlu fit-2 ta’ Ġunju 2015 u biex jimplimentaw ir-rakkomandazzjonijiet kollha tal-Kummissjoni.

• L-Eks-Repubblika Jugoslava tal-Maċedonja (informazzjoni ġenerali)
• Konklużjonijiet tal-Kunsill dwar l-eks-Repubblika Jugoslava tal-Maċedonja, 21 ta' April 2015

Aġenda għal regolamentazzjoni aħjar

Il-Kunsill iddiskuta l-aġenda għal regolamentazzjoni aħjar ippreżentata mill-Kummissjoni fid-19 ta’ Mejju 2015. Il-Ministri qiesu l-ħidma fil-Kunsill, partikolarment fir-rigward tal-ftehim interistituzzjonali li għandu jiġi nnegozjat bejn il-Kunsill, il-Parlament Ewropew u l-Kummissjoni. Il-Ministri ddiskutew ukoll il-kontenut tal-aġenda għal regolamentazzjoni aħjar u aktar wiesgħa mill-perspettiva partikolari tan-negozji u ċ-ċittadini. Wieħed mill-għanijiet ewlenin tal-aġenda għal regolamentazzjoni aħjar huwa li jiġi żgurat li l-politiki u l-liġijiet tal-UE jilħqu l-objettivi tagħhom bi spiża minima.

Komunikazzjoni strateġika 

Waqt l-ikla ta’ nofsinhar, kien hemm skambju ta’ fehmiet b’segwitu għall-Kunsill Ewropew ta’ Marzu li ffoka fuq il-komunikazzjoni strateġika.

• Eżitu tal-laqgħa tal-Kunsill