Kunsill Affarijiet Ġenerali, 19/05/2015, 19 ta' Mejju 2015

Riżultati prinċipali

Il-Kunsill adotta regolament li jżid il-ħlasijiet bil-quddiem għall-inizjattiva favur l-impjieg taż-żgħażagħ bi kważi €1 biljun fl-2015. Din id-deċiżjoni tindirizza l-limitazzjonijiet baġitarji li qed jiffaċċjaw l-istati membri fl-istadju tal-bidu tal-perjodu ta' programmazzjoni. Twieġeb ukoll għall-ħtieġa urġenti li tittieħed azzjoni kontra l-qgħad fost iż-żgħażagħ.

Il-Kunsill ta segwitu għal-Laqgħa speċjali tal-Kunsill Ewropew tat-23 ta’ April dwar pressjonijiet migratorji fil-Mediterran. Il-presidenza u l-Kummissjoni għarrfu lill-ministri dwar il-ħidma li qed issir u dik ippjanata. Il-Kummissjoni ppreżentat l-Aġenda tagħha għall-Migrazzjoni, li l-ministri għamlu r-rimarki preliminari tagħhom dwarha, sakemm jiġu ppubblikati l-proposti leġislattivi tal-Kummissjoni.

Il-Kunsill ipprepara wkoll għall-Kunsill Ewropew ta’ Ġunju. Huwa eżamina abbozz ta’ aġenda annotata li tinkludi għadd ta’ sfidi għas-sigurtà u xi kwistjonijiet ekonomiċi. F’dan il-kuntest il-Kunsill ġie aġġornat dwar it-tħejjija tar-Rapport tal-Erba' Presidenti dwar l-Unjoni Ekonomika u Monetarja.