Kunsill Affarijiet Ġenerali (Koeżjoni), 2 ta' Ġunju 2022

Riżultati ewlenin

Skambju ta' fehmiet dwar it-tmien rapport dwar il-koeżjoni

Il-ministri għall-politika ta' koeżjoni ltaqgħu fil-Lussemburgu biex jiddiskutu l-punti ewlenin tat-tmien rapport tal-Kummissjoni Ewropea dwar il-koeżjoni ekonomika, soċjali u territorjali.

Il-laqgħa kienet ippreseduta minn Christophe Béchu, Ministru għall-awtoritajiet reġjonali u lokali ta' Franza, bis-sehem tal-Kummissarju Elisa Ferreira.

Fi Frar, il-Kummissjoni ppreżentat ir-rapport tagħha li janalizza l-progress miksub fit-tnaqqis tad-disparitajiet territorjali matul dawn l-aħħar għaxar snin u jiddeskrivi l-isfidi fit-30 sena li ġejjin meta t-tranżizzjoni ekoloġika u dik diġitali mistennija li jkunu l-ixpruni tat-tkabbir fl-Unjoni Ewropea.

Id-dibattitu tal-Kunsill iffoka fuq il-kwistjonijiet identifikati fir-rapport, b'mod partikolari d-dimensjoni territorjali tal-politika ta' koeżjoni u l-interazzjoni bejn il-prijoritajiet Ewropej u l-ħtiġijiet tal-atturi lokali.

Filwaqt li rrikonoxxew il-progress fil-konverġenza bejn l-istati membri u bejn ir-reġjuni tal-Unjoni, il-ministri eżaminaw id-diffikultajiet għall-politika ta' koeżjoni u l-aħjar mod kif dawn jiġu indirizzati. Dawn li ġejjin huma xi wħud mill-isfidi:

• id-diżimpenn ta' ċerti reġjuni, (reġjuni rurali, reġjuni periferiċi, reġjuni fi tranżizzjoni industrijali, eċċ.) u l-impatt li dan id-diżimpenn iħalli fuq il-popolazzjonijiet tagħhom;
• id-diffikultajiet li jiffaċċjaw bosta reġjuni li, minkejja l-għajnuna li jirċievu, għadhom qed jaraw il-livelli ta' żvilupp tagħhom staġnati jew saħansitra sejrin lura meta mqabbla mal-medja Ewropea.

Il-ministri ddiskutew sa liema punt il-politika reġjonali Ewropea tista' tappoġġa aktar lill-atturi lokali fil-futur, sabiex ikunu jistgħu jiżviluppaw ir-rispons u s-soluzzjonijiet tagħhom quddiem l-isfidi komuni f'termini ta' koeżjoni.

Konklużjonijiet dwar il-Koeżjoni fl-Ewropa sal-2050

Il-Kunsill kompla bl-adozzjoni tal-konklużjonijiet dwar it-tmien rapport dwar il-koeżjoni.

Il-konklużjonijiet iqisu l-impatt asimmetriku tal-kriżi tal-COVID-19 u tal-aggressjoni tar-Russja kontra l-Ukrajna, kif ukoll il-konsegwenzi tat-tranżizzjoni klimatika, diġitali u dik soċjali għall-iżvilupp armonjuż u bbilanċjat tal-Unjoni.

• Il-koeżjoni fl-Ewropa sal-2050: il-Kunsill jadotta konklużjonijiet (stqarrija għall-istampa, 2 ta' Ġunju 2022)
• Komunikazzjoni tal-Kummissjoni dwar it-tmien rapport dwar il-koeżjoni

L-impatt tal-gwerra fl-Ukrajna fuq il-politika ta' koeżjoni

Matul l-ikla informali ta' nofsinhar, il-ministri rreferew għall-implimentazzjoni ta' CARE u CARE 2, miżuri adottati mill-UE b'appoġġ għall-istati membri li jilqgħu persuni li qed jaħarbu l-gwerra fl-Ukrajna. Huma eżaminaw ukoll il-konsegwenzi usa' tal-aggressjoni militari Russa kontra l-Ukrajna għall-politika ta' koeżjoni.