Summit tal-G20, Hangzhou, iċ-Ċina, 04-05/09/2016, 4 u 5 ta' Settembru 2016

Il-mexxejja tal-G20 iltaqgħu f’Hangzhou, fiċ-Ċina, fl-4 u l-5 ta’ Settembru. Il-President tal-Kunsill Ewropew Donald Tusk u l-President tal-Kummissjoni Ewropea Jean-Claude Juncker irrappreżentaw lill-UE fis-summit. It-tema tas-summit ta’ din is-sena kienet “Lejn ekonomija dinjija innovattiva, imsaħħa, interkonnessa u inklużiva”.

Il-mexxejja adottaw komunikat b'fokus fuq:

• it-tisħiħ tal-aġenda tal-G20 għat-tkabbir
• it-twettiq ta’ politiki u kunċetti innovattivi ta' tkabbir
• il-bini ta' ekonomija dinjija miftuħa
• l-iżgurar li t-tkabbir ekonomiku jkun ta' benefiċċju għall-pajjiżi u n-nies kollha

• Komunikat mill-mexxejja tal-G20, is-summit ta' Hangzhou, 4-5 ta' Settembru 2016
• Anness - dokumenti li dwarhom intlaħaq ftehim, Summit ta’ Hangzhou, 4-5 September 2016

Dwar il-kriżi tal-migrazzjoni u r-refuġjati l-mexxejja tal-G20 qablu dwar il-ħtieġa ta' sforzi globali biex jiġu indirizzati l-effetti, il-ħtiġijiet ta’ protezzjoni u l-kawżi ewlenin tal-kriżi. Huma appellaw għat-tisħiħ tal-għajnuna umanitarja u r-risistemazzjoni tar-refuġjati.

Dwar il-ġlieda kontra t-terroriżmu, il-mexxejja rriaffermaw is-solidarjetà u r-rieda tagħhom u l-impenn tagħhom biex jindirizzaw il-finanzjament tat-terroriżmu.

Is-summit issottolinja wkoll l-importanza li wieħed jissieħeb mal-Ftehim ta’ Pariġi dwar it-tibdil fil-klima mill-aktar fis possibbli.

L-akbar ekonomiji tad-dinja esprimew id-determinazzjoni tagħhom li jużaw l-għodod ta’ politika kollha, inklużi dawk monetarji, fiskali u strutturali, biex jinkiseb tkabbir b’saħħtu, sostenibbli, ibbilanċjat u inklussiv. Għal dan l-għan, huma nedew il-pjan ta’ azzjoni ta’ Hangzhou u appellaw għal implimentazzjoni rapida u sħiħa tal-istrateġiji għat-tkabbir.

Is-summit ta bidu wkoll għal kooperazzjoni dwar l-innovazzjoni, ir-rivoluzzjoni industrijali ġdida u l-ekonomija diġitali. Il-mexxejja approvaw il-mudell tal-G20 dwar tkabbir innovattiv, li jiġbor fih il-politiki dwar dawn l-oqsma.

Huma ddiskutew il-mod kif jistgħu ikomplu jibnu sistema finanzjarja miftuħa u reżiljenti u kif jappoġġaw kooperazzjoni fiskali internazzjonali. Il-mexxejja impenjaw ruħhom ukoll li jtejbu ekonomija dinjija miftuħa u jippromwovu l-benefiċċji tal-kummerċ u ta' swieq miftuħa, kif ukoll biex jikkontribwixxu għall-implimentazzjoni tal-aġenda 2030 għal żvilupp sostenibbli.

It-12-il edizzjoni tas-summit tal-G20 ser tiġi ospitata mill-Ġermanja fl-2017.

Fil-marġni tas-summit, il-Presidenti Tusk u Juncker iltaqgħu mal-President tat-Turkija, Recep Erdoğan, biex jiddiskutu r-relazzjonijiet bejn l-UE u t-Turkija u t-tkomplija tal-kooperazzjoni dwar il-migrazzjoni.

• G20 - Presidenza Ċiniża 2016
• G20 - Fatti u ċifri

Il-prijoritajiet tal-UE fis-summit tal-mexxejja tal-G20

Il-President tal-Kunsill Ewropew Donald Tusk u l-President tal-Kummissjoni Ewropea Jean-Claude Juncker ippreżentaw il-kwistjonijiet ewlenin għas-summit f’ittra konġunta li ntbagħtet lil kapijiet ta’ stat jew ta’ gvern tal-UE:

• ir-rwol tal-G20 fl-indirizzar tal-kriżi internazzjonali tar-refuġjati
• l-impjiegi, it-tkabbir u l-investiment
• it-trasparenza fiskali internazzjonali u l-ġlieda kontra l-finanzjament tat-terroriżmu
• is-sistema monetarja u finanzjarja internazzjonali reżiljenti
• il-kummerċ miftuħ u l-investiment
• l-implimentazzjoni tal-Aġenda 2030 għall-Iżvilupp Sostenibbli u l-Ftehim ta' Pariġi dwar it-tibdil fil-klima

• Ittra konġunta tal-Presidenti Donald Tusk u Jean-Claude Juncker dwar is-summit li ġej tal-G20