23 belt joffru li jospitaw l-aġenziji tal-UE bis-sede fir-Renju Unit

Il-Kunsill irċieva 27 proposta mill-istati membri, relatati ma' 23 belt, biex jospitaw l-aġenziji tal-UE li bħalissa għandhom is-sede fir-Renju Unit. Kien hemm 19-il offerta biex jospitaw l-Aġenzija Ewropea għall-Mediċini (EMA) u 8 għall-Awtorità Bankarja Ewropea (EBA). L-offerti kollha huma disponibbli fuq is-sit elettroniku tal-Kunsill Ewropew.

• Offerti biex tiġi ospitata l-Awtorità Bankarja Ewropea (EBA)

Iż-żewġ aġenziji ser jeħtieġ li jiġu rilokati fil-kuntest tal-ħruġ tar-Renju Unit mill-UE. Il-postijiet futuri jridu jiġu deċiżi bil-qbil komuni tal-istati membri tal-UE27. Fit-22 ta' Ġunju 2017, fil-marġini tal-Kunsill Ewropew (Artikolu 50), il-mexxejja tal-UE27 approvaw proċedura speċifika għal din id-deċiżjoni. L-ewwel pass kien is-sottomissjoni ta' offerti mill-istati membri sal-31 ta' Lulju 2017.

L-Aġenzija Ewropea għall-Mediċini

Fl-1 ta' Awwissu 2017, il-bliet proposti biex jospitaw l-EMA huma dawn li ġejjin:

• Amsterdam (in-Netherlands)
• Ateni (il-Greċja)
• Barċellona (Spanja)
• Bonn (il-Ġermanja)
• Bratislava (is-Slovakkja)
• Brussell (il-Belġju)
• Bucharest (ir-Rumanija)
• Copenhagen (id-Danimarka)
• Dublin (l-Irlanda)
• Helsinki (il-Finlandja)
• Lille (Franza)
• Milan (l-Italja)
• Porto (il-Portugall)
• Sofija (il-Bulgarija)
• Stokkolma (l-Iżvezja)
• Malta (Malta)
• Vjenna (l-Awstrija)
• Varsavja (il-Polonja)
• Zagreb (il-Kroazja)

L-Aġenzija Ewropea għall-Mediċini (EMA) hi responsabbli għall-evalwazzjoni xjentifika, is-superviżjoni u l-monitoraġġ tas-sikurezza tal-mediċini fl-UE. L-EMA hija essenzjali għall-funzjonament tas-suq uniku għall-mediċini fl-UE.

L-Awtorità Bankarja Ewropea

Fl-1 ta' Awwissu 2017, il-bliet proposti biex jospitaw l-EBA huma dawn li ġejjin:

• Brussell (il-Belġju)
• Dublin (l-Irlanda)
• Frankfurt (il-Ġermanja)
• Pariġi (Franza)
• Praga (ir-Repubblika Ċeka)
• Il-Belt tal-Lussemburgu (il-Lussemburgu)
• Vjenna (l-Awstrija)
• Varsavja (il-Polonja)

L-Awtorità Bankarja Ewropea (EBA) taħdem biex tiżgura r-regolamentazzjoni u s-superviżjoni prudenzjali effettivi u konsistenti fis-settur bankarju Ewropew kollu. Fost kompiti oħrajn, l-EBA tivvaluta r-riskji u l-vulnerabbiltajiet fis-settur bankarju tal-UE permezz ta' rapporti regolari dwar il-valutazzjoni tar-riskju u simulazzjonijiet ta' kriżi fl-UE kollha.

Kriterji għall-valutazzjoni

L-applikazzjonijiet ser jiġu vvalutati abbażi ta' sitt kriterji maqbula mis-27 stat membru:

• assigurazzjoni li l-aġenzija tkun operattiva meta r-Renju Unit iħalli l-UE
• aċċessibbiltà tal-post
• skejjel għat-tfal tal-persunal
• aċċess għas-suq tax-xogħol u l-kura tas-saħħa għall-familji tal-impjegati
• kontinwità tal-operat
• firxa ġeografika

Passi li jmiss

Il-Kummissjoni ser tippubblika valutazzjoni tal-offerti abbażi tal-kriterji maqbula sat-30 ta' Settembru 2017. Il-ministri ser ikollhom diskussjoni politika abbażi tal-valutazzjoni tal-Kummissjoni f'Ottubru 2017, fil-marġini tal-Kunsill Affarijiet Ġenerali (Art. 50).

Id-deċiżjoni ser tittieħed fil-marġini tal-Kunsill Affarijiet Ġenerali (Art. 50) f'Novembru 2017 permezz ta' votazzjoni mis-27 ministru. L-offerti kollha ser jiġu sottomessi għal votazzjoni dment li ma jiġux irtirati mill-pajjiżi kkonċernati. Il-votazzjoni ser tikkonsisti minn ċikli suċċessivi ta’ votazzjoni skont il-bżonn, fejn il-voti jintefgħu b’mod sigriet u kull wieħed mis-27 stat membru jkollu l-istess numru ta’ voti.

• Rilokazzjoni tal-aġenziji tal-UE bbażati fir-Renju Unit
• Proċedura li twassal għal deċiżjoni dwar ir-rilokazzjoni tal-Aġenzija Ewropea għall-Mediċini u l-Awtorità Bankarja Ewropea fil-kuntest tal-ħruġ tar-Renju Unit mill-Unjoni, 22/06/2017