Sistema ta' dħul/ħruġ: adozzjoni finali mill-Kunsill

Fl-20 ta' Novembru 2017 il-Kunsill adotta r-regolament għal sistema ta' dħul/ħruġ u r-regolament li jemenda l-kodiċi tal-fruntieri ta' Schengen b'rabta mas-sistema ta' dħul/ħruġ.

"Il-kontroll b'saħħtu tal-fruntieri esterni tagħna huwa essenzjali biex iż-żona ta' Schengen taħdem tajjeb. Is-sistema ta' dħul/ħruġ ser tgħin biex il-kontrolli tal-fruntieri esterni jsiru aħjar, jiġu identifikati aħjar il-persuni li jibqgħu fit-territorju wara l-iskadenza tal-awtorizzazzjoni għas-soġġorn u tissaħħaħ il-ġlieda kontra t-terroriżmu." Andres Anvelt, ministru għall-intern tal-Estonja

Din is-sistema ser tirreġistra informazzjoni dwar id-dħul, il-ħruġ u ċ-ċaħda ta’ dħul ta’ ċittadini ta’ pajjiżi terzi li jaqsmu l-fruntieri esterni taż-żona Schengen.

Is-sistema tad-dħul/ħruġ ser tgħin biex:

• tnaqqas id-dewmien tal-verifiki fuq il-fruntieri u ttejjeb il-kwalità tal-verifiki fuq il-fruntieri billi jiġi kkalkolat awtomatikament is-soġġorn awtorizzat ta’ kull vjaġġatur
• tiżgura l-identifikazzjoni sistematika u affidabbli tal-persuni li jibqgħu fit-territorju wara l-iskadenza tal-awtorizzazzjoni għas-soġġorn
• issaħħaħ is-sigurtà interna u l-ġlieda kontra t-terroriżmu billi tippermetti li l-awtoritajiet tal-infurzar tal-liġi jkollhom aċċess għal rekords tal-istorja tal-ivvjaġġar

Il-passi li jmiss

Il-Kunsill u l-Parlament Ewropew issa jeħtieġ li jiffirmaw ir-regolament adottat. It-test iffirmat ser jiġi ppubblikat fil-Ġurnal Uffiċjali tal-UE u ser jidħol fis-seħħ 20 jum wara. eu-LISA, flimkien mal-istati membri, mistennija tibda tibni sistema ġdida, li għandha tibda taħdem sal-2020.

• Regolament li jistabbilixxi Sistema ta' Dħul/Ħruġ (EES)
• Regolament li jemenda l-Kodiċi tal-Fruntieri ta' Schengen fir-rigward tas-Sistema ta' Dħul/Ħruġ (EES)
• Sistema ta' dħul/ħruġ: Il-Kunsill jikkonferma l-ftehim bejn il-Presidenza u l-Parlament Ewropew dwar id-dispożizzjonijiet politiċi ewlenin (stqarrija għall-istampa, 30/06/2017)
• Tisħiħ tal-fruntieri esterni tal-UE