L-UE tkompli tiżviluppa l-ġustizzja elettronika Ewropea

L-UE hija impenjata li ttejjeb aktar l-aċċess għall-ġustizzja fl-UE kollha billi tkompli tiżviluppa l-Ġustizzja elettronika Ewropea.

Illum il-Kunsill adotta l-istrateġija u l-pjan ta’ azzjoni dwar l-iżvilupp tal-Ġustizzja elettronika għall-perjodu 2019-2023. Il-Ġustizzja elettronika hija politika li permezz tagħha l-aċċess għall-ġustizzja jkun simplifikat u mtejjeb filwaqt li l-proċeduri legali transfruntiera jiġu diġitalizzati. Il-Ġustizzja elettronika mhix limitata għal qasam tal-liġi wieħed partikolari, u hija mmirata lejn iċ-ċittadini, il-kumpaniji, il-prattikanti legali u l-awtoritajiet ġudizzjarji.

Tul il-perjodu 2019-2023, il-ħidma fir-rigward tal-ġustizzja elettronika ser tkun iffokata fuq tliet objettivi ewlenin:

• It-titjib fl-aċċess għall-informazzjoni fil-qasam tal-ġustizzja
• It-tkomplija tad-diġitalizzazzjoni tal-proċedimenti ġudizzjarji u extraġudizzjarji biex ikun offrut aċċess aktar faċli u aktar rapidu għall-qrati
• L-iżgurar tal-implimentazzjoni teknika u l-ġestjoni tas-sistemi nazzjonali tal-Ġustizzja elettronika biex jiġu ffaċilitati l-interkonnessjoni u l-interoperabbiltà bejn is-sistemi tal-istati membri

Portal tal-Ġustizzja elettronika

Il-Ġustizzja elettronika hija l-għodda prinċipali li ġiet żviluppata biex jittejjeb l-aċċess għall-informazzjoni fil-qasam tal-ġustizzja. Hija fiha paġni ta’ informazzjoni, għodda tat-tiftix u formoli dinamiċi bi sforz biex tittejjeb u tiġi faċilitata l-esperjenza tal-utent. Il-portal ser jiġi żviluppat u estiż aktar waqt il-pjan ta’ azzjoni li jmiss.

• Portal tal-Ġustizzja elettronika
• Strateġija tal-Ġustizzja elettronika 2019-2023
• Pjan ta’ azzjoni tal-Ġustizzja elettronika 2019-2023