An Chomhairle um Thalmhaíocht agus um Iascach, 24 Márta 2014

Pléann an Chomhairle bearta athnuaite chun táirgí talmhaíochta an Aontais a chur chun cinn

Ag teacht le chéile di an 24 Márta, phléigh an Chomhairle um Thalmhaíocht agus um Iascach cur chun cinn táirgí talmhaíochta agus tionscnamh táirgí feola a thaispeáint ar an lipéad

Táirgí talmhaíochta a chur chun cinn

Bhí díospóireacht bheartais ag na hAirí faoin rialachán atá beartaithe maidir le bearta um sholáthar faisnéise agus bearta cur chun cinn i gcás táirgí talmhaíochta. Leis an togra, a pléadh freisin ag an gcruinniú deireanach a bhí ag an gComhairle um Thalmhaíocht agus um Iascach i mí Feabhra, táthar ag iarraidh bearta cur chun cinn an Aontais a thabhairt ar aon dul leis an gComhbheartas Talmhaíochta (CBT) athchóirithe.

Le linn na díospóireachta, thacaigh formhór na mBallstát le togra comhréitigh ón Uachtaránacht, agus bhí siad i bhfabhar ráta maoiniúcháin an Aontais a ardú freisin. Scrúdóidh an Coiste Speisialta um Thalmhaíocht na leasuithe atá beartaithe ag Parlaimint na hEorpa. Tabharfaidh sé sainordú ansin don Uachtaránacht dul i mbun caibidlíochta leis an bParlaimint, chun an togra deiridh a ghlacadh sula rachaidh téarma na Parlaiminte in éag.

Tionscnamh na feola a úsáidtear mar chomhábhar a thaispeáint ar an lipéad

Thíolaic an Coimisiún tuarascáil, a foilsíodh i mí na Nollag 2013, ag féachaint an bhféadfaí síneadh a chur le lipéadú éigeantach tionscnaimh feola chun aon fheoil a úsáidtear mar chomhábhar a chumhdach freisin. Sa tuarascáil, scrúdaítear a riachtanaí atá sé go mbeadh tomhaltóirí ar an eolas agus pléitear an bhféadfaí forordú a thabhairt maidir le tionscnamh na feola a thaispeáint ar an lipéad. Déantar anailís freisin ar an tionchar a d'fhéadfadh a bheith aige ar an margadh aonair agus ar an trádáil idirnáisiúnta.

Léirigh an plé a rinne an Chomhairle go bhfuil tuairimí éagsúla ann fós maidir leis na 3 chás éagsúla i dtaobh tionscnamh na feola a thaispeáint ar an lipéad, a cuireadh i láthair sa tuarascáil. Tá go leor toscaireachtaí i bhfabhar lipéadú éigeantach a thabhairt isteach, ach ba mhian le cuid acu go gcuirfí tírshonrach AE nó neamh-AEin iúl, agus ba mhian le cuid eile acu trácht ginearálta tionscnamh AE/neamh-AE. Theastaigh ó chuid eile acu go bhfanfadh rudaí mar atá - is é sin le rá gur ar bhonn saorálach a thaispeánfaí an áit tionscnaimh ar an lipéad.

Scrúdóidh comhlachtaí ullmhúcháin na Comhairle an tuarascáil tuilleadh.

Togra maidir le feirmeoireacht orgánach

Chuir an Coimisiún na hAirí ar an eolas faoi thogra maidir le hathbhreithniú a dhéanamh ar an gcreat dlíthiúil don táirgeadh orgánach agus d'fheirmeoireacht orgánach san Eoraip. Áirítear an méid a leanas sa togra nua:

• rialacha comhchuibhithe maidir le táirgeadh
• an ceanglas go mbeadh comhábhair thalmhaíochta i dtáirgí orgánacha próiseáilte go hiomlán orgánach
• ceanglas ar oibreoirí orgánacha eile seachas feirmeoirí córas a fhorbairt le feabhas a chur ar a bhfeidhmíocht chomhshaoil
• téacs aonair reachtach ina sonraítear an córas rialaithe
• córas le haghaidh deimhniúcháin ghrúpa isteach i gcás feirmeoirí a oibríonn ar mhionscála san Aontas
• forálacha sonracha ar mhaithe le hinrianaitheacht fheabhsaithe agus le calaois a chosc

Ábhair eile ar an gclár oibre

Iascach

Thug na hAirí dá n-aire an comhairliúchán idir na Stáit Chósta maidir le ronnach agus an comhairliúchán déthaobhach idir an tAontas agus an Iorua. Chuir an Coimisiún tuarascáil faoi bhráid na Comhairle maidir leis an socrú cúig bliana do ronnach san Atlantach Thoir-Thuaidh, ar thángthas air an 12 Márta 2014, idir an tAontas Eorpach, Oileáin Fharó agus an Iorua. Tháinig an Chomhairle ar chomhaontú freisin maidir leis an ngabháil iomlán is incheadaithe (TAC) do 2014 i gcás na coirre gainimh.

Talmhaíocht

Phléigh na hAirí an méid atá i ndán don earnáil déiríochta nuair a thiocfaidh deireadh le córas na gcuótaí bainne in 2015. Bhreathnaigh an Chomhairle ar an tuarascáil maidir le hearnáil na dtorthaí agus na nglasraí ó rinneadh an earnáil a athchóiriú in 2007.

Phléigh na hAirí an méid a leanas:

• tionscadal chun mil a chur chun cinn mar chuid de bhricfeasta daltaí scoile
• an toradh a bhí ar an bhFóram Domhanda maidir le Feirmeoireacht Teaghlaigh a bhí ar siúl i mBúdaipeist an 4-6 Márta
• na deacrachtaí atá i ndán d'earnáil na ríse san Aontas toisc go bhfuil ardú ag teacht ar allmhairí ríse muilleáilte
• bearta trádála chun iascaireacht neamhdhleathach, neamhthuairiscithe agus neamhrialáilte a chomhrac