An Grúpa Euro, 12/3/2018, 12 Márta 2018

Na príomhthorthaí

An Ghréig

Ba dhíol sásaimh don Ghrúpa Euro go ndearna an Ghréig na réamhghníomhaíochtaí a bhí fós le déanamh a thabhairt chun críche, mar a ceanglaíodh faoin tríú hathbhreithniú ar a clár coigeartaithe eacnamaíoch.

Fágann sin gur féidir an ceathrú tráinse den chúnamh airgeadais atá ar fáil don Ghréig faoin gclár ón Sásra Cobhsaíochta Eorpach a scaoileadh, a luaithe a bheidh na nósanna imeachta náisiúnta curtha i gcrích. EUR 6.7 billiún is luach don cheathrú tráinse agus íocfar in dhá thráthchuid é.

Cuireadh na hairí ar an eolas freisin faoin gcéad mhisean den cheathrú hathbhreithniú ar an gclár, a bhí ann ag deireadh mhí Feabhra.

• An Ghréig: an tríú clár coigeartaithe eacnamaíoch (faisnéis chúlra)

Ullmhúcháin do Chruinniú Mullaigh Euro an Mhárta

Phléigh an Grúpa Euro bealaí ina bhféadfaí an tAontas Eacnamaíoch agus Airgeadaíochta a dhoimhniú, roimh an gCruinniú Mullaigh Euro a bheidh ar siúl ar an 23 Márta.

Thug airí aird ar an obair leanúnach atá á déanamh chun an t-aontas baincéireachta a thabhairt chun críche agus an t-athchóiriú ar an Sásra Cobhsaíochta Eorpach. Ina theannta sin, thrácht na hairí ar na saincheisteanna fioscacha. Déanfaidh Uachtarán an Ghrúpa Euro an plé sin a thuairisciú do na ceannairí ag an gCruinniú Mullaigh Euro.

• An Chomhairle Eorpach, 22-23/3/2018

Ullmhúcháin do chruinnithe idirnáisiúnta: an boilsciú agus na forbairtí i ndáil leis an ráta malairte

Rinne an Grúpa Euro tuairimí a mhalartú faoin mboilsciú agus faoi fhorbairtí i ndáil leis an ráta malairte sa limistéar Euro le cúpla mí anuas.

Gnáthphlé de chuid an Ghrúpa Euro is ea é seo roimh chruinnithe an earraigh den Chiste Airgeadaíochta Idirnáisiúnta a bheidh ann i mí Aibreáin.

• An Ciste Airgeadaíochta Idirnáisiúnta: Cruinnithe