An Chomhairle Gnóthaí Eachtracha, 13/11/2017, 13 Samhain 2017

Na príomhthorthaí

An comhar slándála agus cosanta

Phléigh na hairí gnóthaí eachtracha agus na hairí cosanta cur chun feidhme Straitéis Dhomhanda an Aontais i réimse na slándála agus na cosanta. Ghlac an Chomhairle conclúidí maidir leis an tslándáil agus leis an gcosaint agus aird á tarraingt aici ar an dul chun cinn a rinneadh agus í ag féachaint chun cinn ar na chéad chéimeanna eile.

Ar imeall na Comhairle, shínigh 23 Bhallstát fógra, ar chéad chéim í chun buanchomhar struchtúrtha (PESCO) a bhunú. I dteannta a chéile, déanfaidh siad cumais cosanta a fhorbairt, infheistíocht i dtionscadail chomhroinnte, agus feabhas a chur ar ullmhacht oibríochtúil a gcuid fórsaí armtha. A bhuí leis sin, beidh comhar an Aontais maidir leis an tslándáil agus an chosaint níos uaillmhianaí agus níos solúbtha.

"Éacht stairiúil é seo, ach ní lá ceiliúrtha amháin atá i gceist. Is tús aistir é a dtabharfaimid faoi i bhfocair a chéile. Tús scéal nua is ea é, agus ní deireadh an scéil é." Federica Mogherini, an tArdionadaí do Ghnóthaí Eachtracha agus don Bheartas Slándála

Um thráthnóna, tháinig an Chomhairle le chéile i bhformáid chosanta agus phléigh sí comhar AE-ECAT in éineacht le hArd-Rúnaí ECAT, Jens Stoltenberg. Thug na hairí dá n-aire, go háirithe, go rachadh an obair a bhí á déanamh faoi chreat an Aontais, go mór mór an obair a bhí á déanamh ar PESCU, agus ní hamháin sin ach an obair a bhí ar bun ar an tsoghluaiseacht mhíleata freisin, chun tairbhe an dá eagraíocht.

Veiniséala

Ghlac an Chomhairle conclúidí maidir le Veiniséala agus tháinig sí ar chomhaontú maidir le smachtbhannaí spriocdhírithe, arb aidhm dóibh próiseas iontaofa, fiúntach a spreagadh as a dtiocfaidh réiteach síochánta, trí mheán na caibidlíochta. Ar na bearta srianta áirítear trádbhac arm agus toirmeasc ar onnmhairí trealaimh, a d’fhéadaí a úsáid le haghaidh brú faoi chois, chomh maith le trealamh faireachais TF, agus áirítear bunús dlí ann freisin do liosta a d’fhéadfaí a úsáid, ar liosta spriocdhírithe daoine é.

Cuireadh na bearta sriantacha céim ar chéim, spriocdhírithe, solúbtha, inchúlaithe sin i dtoll a chéile ionas nach gcuirfidís isteach ar an bpobal i gcoitinne i Veiniséala.

An caidreamh idir an tAontas Eorpach agus an Afraic

Phléigh an Chomhairle an caidreamh idir an tAontas agus an Afraic mar chuid den ullmhúchán don 5ú cruinniú mullaigh idir an tAontas Afracach agus an tAontas Eorpach, a bheidh ar siúl ar an 29-30 Samhain in Abidjan, Côte d'Ivoire. Ba dhíol sásaimh do na hairí go mbeadh béim curtha ar an aos óg agus chuir siad i dtreis a thábhachtaí atá sé bheith rannpháirteach sa chruinniú mullaigh. Sa phlé a bhí acu, rinne na hairí tagairt do chuid mhaith de na dúshláin chomhchoiteanna a meastar go ndéanfar plé orthu ag an gcruinniú mullaigh, lena n-áirítear cruthú post, an t-athrú aeráide, an tsíochán agus an tslándáil, chomh maith leis an imirce agus leis an tsoghluaiseacht.

Cumarsáid straitéiseach an Aontais

Rinne na hairí an obair atá ar bun faoi láthair ar chumarsáid straitéiseach an Aontais a mheas, go háirithe an obair a bhaineann le for-rochtain do réigiún Chomhpháirtíocht an Oirthir, do Chomharsanacht an Deiscirt agus do na Balcáin Thiar.

Chomhaontaigh siad tuilleadh feabhais a chur ar an obair agus thacaigh siad le forbairt trí thascfhórsa. Chuir na Ballstáit i bhfáth a thábhachtaí atá teachtaireachtaí dearfacha an Aontais a chur in iúl i gcomharsanacht an Aontais, mar aon leis an ngá cur in aghaidh bréagaisnéise nuair is gá é sin a dhéanamh.