Kunsill Affarijiet Barranin, 13/11/2017, 13 ta' Novembru 2017

Riżultati ewlenin

Kooperazzjoni fil-qasam tas-sigurtà u d-difiża

Il-ministri għall-affarijiet barranin u l-ministri għad-difiża kellhom diskussjoni dwar l-implimentazzjoni tal-Istrateġija Globali tal-UE fil-qasam tas-sigurtà u d-difiża. Il-Kunsill imbagħad adotta konklużjonijiet dwar is-sigurtà u d-difiża li enfasizzaw il-progress miksub u taw ħarsa lejn il-passi li jmiss.

Fil-marġini tal-Kunsill, 23 stat membru ffirmaw notifika, li timmarka l-ewwel pass fl-istabbiliment ta' kooperazzjoni strutturata permanenti (PESCO). Flimkien, huma ser jiżviluppaw kapaċitajiet ta' difiża, jinvestu fi proġetti komuni, u jtejbu d-disponibbiltà operazzjonali tal-forzi armati tagħhom. Permezz ta' dan, il-kooperazzjoni tal-UE fis-sigurtà u d-difiża ser tkun aktar ambizzjuża u aktar flessibbli.

"Din hija kisba storika, iżda mhijiex biss jum ta' ċelebrazzjoni. Hija wkoll il-bidu ta' vjaġġ li aħna ser nagħmlu flimkien. Dan huwa l-bidu ta' storja ġdida, u mhux l-għeluq ta' paġna." Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Wara nofsinhar, il-Kunsill iltaqa' f'format ta' difiża u ddiskuta l-kooperazzjoni bejn l-UE u n-NATO flimkien mas-Segretarju Ġenerali tan-NATO Jens Stoltenberg. Il-Ministri nnotaw b'mod partikolari li l-ħidma fi ħdan il-qafas tal-UE, b'mod partikolari dwar il-PESCO iżda wkoll il-mobilità militari, ser tkun ta' benefiċċju għaż-żewġ organizzazzjonijiet.

Il-Venezwela

Il-Kunsill adotta konklużjonijiet dwar il-Venezwela u qabel dwar sanzjonijiet immirati, bil-għan li jinkuraġġixxi proċess kredibbli u sinifikanti li jista' jwassal għal soluzzjoni negozjata paċifika. Il-miżuri restrittivi jinkludu embargo fuq l-armi u projbizzjoni fuq l-esportazzjoni ta' tagħmir li jista' jintuża għal repressjoni interna kif ukoll tagħmir tal-IT għal sorveljanza, u jinkludu wkoll bażi legali għal elenkar eventwali mmirat ta' persuni.

Dawn il-miżuri restrittivi gradwali, immirata, flessibbli u riversibbli tfasslu b'mod li ma jaffettwawx il-popolazzjoni ġenerali tal-Venezwela.

Relazzjonijiet bejn l-UE u l-Afrika

Il-Kunsill iddiskuta r-relazzjonijiet bejn l-UE u l-Afrika bħala parti mit-tħejjijiet għall-ħames Summit bejn l-Unjoni Afrikana u l-UE, li ser isir fid-29 u t-30 ta' Novembru f'Abidjan, il-Kosta tal-Avorju. Il-Ministri laqgħu l-enfasi fuq iż-żgħażagħ u ssottolinjaw l-importanza ta' parteċipazzjoni wiesgħa fis-Summit. Fid-diskussjoni tagħhom, il-ministri semmew ħafna mill-isfidi komuni li mistennija jiġu diskussi fis-Summit, inkluż il-ħolqien ta' impjiegi, it-tibdil fil-klima, il-paċi u s-sigurtà, kif ukoll il-migrazzjoni u l-mobbiltà.

Komunikazzjonijiet Strateġiċi tal-UE

Il-Ministri għall-affarijiet barranin evalwaw il-ħidma attwali dwar il-komunikazzjonijiet strateġiċi tal-UE, b'mod partikolari rigward is-sensibilizzazzjoni fir-reġjun tas-Sħubija tal-Lvant, il-Viċinat tan-Nofsinhar u l-Balkani tal-Punent.

Huma qablu li jsaħħu aktar il-ħidma u appoġġaw l-iżvilupp ta' tliet task forces. L-Istati Membri ssottolinjaw l-importanza li jwasslu messaġġi pożittivi tal-UE fil-viċinat tal-UE, kif ukoll il-ħtieġa li tiġi miġġielda d-diżinformazzjoni fejn u meta jkun hemm bżonn.