"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
Ag tús na Comhairle, pléadh na dréachtchonclúidí don Chomhairle Eorpach atá ar na bacáin. Bhí seisiún tuairimíochta ag na hairí maidir leis an gcaidreamh idir an tAontas agus an Ríocht Aontaithe, agus maidir le tuarascáil sintéise ar rannchuidiú na Comhairle le Seimeastar Eorpach 2025. Chomhaontaigh an Chomhairle dréachtmholadh maidir le beartas eacnamaíoch an limistéir euro a chur ar aghaidh chuig an gComhairle Eorpach lena fhormhuiniú. Anuas air sin, d’fhormheas na hairí dearbhú comhpháirteach maidir le tosaíochtaí reachtacha na bliana seo mar aon le conclúidí comhpháirteacha maidir le cuspóirí beartais agus tosaíochtaí an Aontais do 2025-2029.
Tréimhse thar a bheith dúshlánach í seo don Eoraip. Tá Uachtaránacht na Polainne i mbun oibre ar chlár oibre uaillmhianach chun an Eoraip a dhéanamh níos sláine agus níos iomaíche. Tá dlús á chur againn lenár n-iarrachtaí sna míonna amach romhainn chun torthaí nithiúla a bhaint amach do mhuintir na hEorpa.
Adam Szłapka, Aire na Polainne um Ghnóthaí an Aontais Eorpaigh
Ullmhúchán do Chomhairle Eorpach mhí an Mhárta
Lean an Chomhairle den ullmhúchán don Chomhairle Eorpach atá ar na bacáin trí phlé a dhéanamh ar na dréachtchonclúidí. Tá sé beartaithe go bpléifidh ceannairí an Aontais an méid seo:
cogadh foghach na Rúise ar an Úcráin
na forbairtí is déanaí sa Mheánoirthear
iomaíochas an Aontais
an chosaint Eorpach
an chéad Chreat Airgeadais Ilbhliantúil (CAI) eile agus acmhainní dílse nua
an imirce
na haigéin
an t-iltaobhachas agus
saincheisteanna eile i ndáil leis an mbeartas eachtrach
An caidreamh idir an tAontas agus an Ríocht Aontaithe
D’éist an Chomhairle le cur i láthair ón gCoimisiún agus bhí seisiún tuairimíochta aici maidir leis an gcaidreamh idir an tAontas agus an Ríocht Aontaithe roimh an gCruinniú Mullaigh idir an tAontas agus an Ríocht Aontaithe an 19 Bealtaine 2025. Dhírigh aird na n-airí ar réimsí ina bhféadfaí an caidreamh leis an Ríocht Aontaithe a neartú agus ar an gcur chuige is fearr chun leasanna an Aontais a chosaint i dteannta a chéile. Leag go leor de na hairí béim ar a thábhachtaí atá sé oibriú le comhpháirtithe atá ar aon bhuille leo, lena n-áirítear an Ríocht Aontaithe, i réimse na slándála agus na cosanta.
Bhí seisiún tuairimíochta ag na hairí maidir le tuarascáil sintéise ar rannchuidiú na Comhairle le Seimeastar Eorpach 2025. Chuir an uachtaránacht treochlár nuashonraithe maidir le Seimeastar Eorpach 2025 i láthair. Chomhaontaigh an Chomhairle freisin dréachtmholadh maidir le beartas eacnamaíoch an limistéir euro a chur ar aghaidh chuig an gComhairle Eorpach lena fhormhuiniú.
D’fhormheas an Chomhairle an dearbhú comhpháirteach maidir le tosaíochtaí reachtacha an Aontais do 2025, chomh maith le conclúidí comhpháirteacha maidir le cuspóirí agus tosaíochtaí beartais do 2025-2029.Síneoidh uachtarán Chomhairle an Aontais Eorpaigh, uachtarán an Choimisiúin Eorpaigh agus uachtarán Pharlaimint na hEorpa an dearbhú comhpháirteach agus na conclúidí comhpháirteacha.
Chuir an tSeicia faisnéis i láthair maidir le foirceannadh mhaoiniú ‘Radio Free Europe’ ag Gníomhaireacht na Stát Aontaithe um na Meáin Dhomhanda.
An Mholdóiv
Faoi mhíreanna ‘A’, ghlac an Chomhairle an rialachán lena mbunaítear an tSaoráid Athchóirithe agus Fáis don Mholdóiv, ionstraim nua – dar luach beagnach €2 bhilliún – chun tacú le conair na tíre sin i dtreo an Aontais.
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
