An Chomhairle Iompair, Teileachumarsáide agus Fuinnimh, 08/10/2015, 8 Deireadh Fómhair 2015

Na príomhthorthaí

Oscailt an mhargaidh iarnróid agus cúrsaí rialachais

Tháinig an Chomhairle ar chomhaontú faoi chur chuige ginearálta do thograí maidir le conarthaí seirbhíse poiblí le haghaidh seirbhísí iarnróid intíre do phaisinéirí agus rialachas níos fearr don bhonneagar iarnróid. Is cuid de cholún an mhargaidh den 4ú Pacáiste Iarnróid iad na tograí sin. Leis an seasamh sin ón gComhairle, is féidir leis an uachtaránacht idirbheartaíocht a thosú le Parlaimint na hEorpa maidir le colún an mhargaidh.

Inniu thángamar ar chomhaontú maidir le rialacha an Aontais Eorpaigh, rud a chuideoidh linn an t-iarnróid a chur chun cinn ar fud na hEorpa. Táim sásta leis an tacaíocht láidir a fuarthas agus níos sásta fós leis na réitigh chothroma, láidre a chomhaontaíomar.” François BAUSCH, Aire Forbartha Inbhuanaithe agus Bonneagair Lucsamburg 

• Oscailt agus rialachas an mhargaidh iarnróid: Tagann an Chomhairle ar chomhaontú maidir lena seasamh
• Cur chuige ginearálta na Comhairle i ndáil le tograí faoi oscailt an mhargaidh agus rialachas - Deireadh Fómhair 2015

An tslándáil iarnróid

Le linn an lóin oibre, d’fhéach na hAirí ar bhealaí chun feabhas a chur ar an tslándáil taisteal d’iarnród, go háirithe trí fheabhas a chur ar an gcomhar trasteorann sa chomhrac i gcoinne na sceimhlitheoireachta. Ar na bearta eile a pléadh áirítear feabhas a chur ar ullmhacht na n-oibreoirí iarnróid agus ar oiliúint slándála na foirne, chomh maith le níos mó úsáide a bhaint as teicneolaíochtaí slándála sna stáisiúin agus ar na traenacha.

Astaíochtaí ó ghluaisteáin

Chuir an Coimisiún na hAirí ar an eolas faoin obair atá ar siúl chun tástálacha níos cruinne a thabhairt isteach chun astaíochtaí ó charranna a thomhas. Ba cheart go mbeifí in ann tástáil i bhfíordhálaí tiomána a chur ann go luath in éineacht le tástáil saotharlainne.

Páipéar Bán maidir le hIompar

Phléigh an Chomhairle tosaíochtaí agus spriocanna an Aontais i réimse an iompair i gcomhthéacs an Pháipéir Bháin maidir le hIompar 2011.

An Ciste Eorpach le haghaidh infheistíochtaí straitéiseacha agus maoiniú an Aontais Eorpaigh don iompar

Chuir Jyrki Katainen, Leas-Uachtarán an Choimisiúin Eorpaigh, agus Pim van Ballekom, Leas-Uachtarán an Bhainc Eorpaigh Infheistíochta, na hAirí ar an eolas maidir le deiseanna nua maoinithe don iompar ón gCiste Eorpach le haghaidh infheistíochtaí straitéiseacha. Is féidir ionstraimí nuálacha a chomhcheangal le maoiniú ar leibhéal an Aontais don iompar, an tSaoráid um Chónascadh na hEorpa (SCE), mar shampla.

Rothair mar mhodh inbhuanaithe iompair

Chuir an Uachtaránacht na hAirí ar an eolas faoi thoradh chruinniú neamhfhoirmiúil na Comhairle Iompair i ndáil leis an rothaíocht a chur chun cinn. I ndearbhú a d'fhaomh an cruinniú neamhfhoirmiúil, iarradh go mbunófaí straitéis Eorpach don rothaíocht.

• Toradh chruinniú na Comhairle