“Tá an tAontas tiomanta i gcónaí do neartú na slándála agus na cosanta”: Glacann an Chomhairle conclúidí

Ghlac an Chomhairle conclúidí maidir le slándáil agus cosaint i gcomhthéacs Straitéis Dhomhanda an Aontais Eorpaigh. Sna conclúidí aithnítear an dul chun cinn atá déanta ó thaobh an comhar a neartú i réimse na slándála agus na cosanta, agus leagtar amach treoir don obair amach anseo. Áirítear ar na réimsí a chumhdaítear:

- Feabhas a chur ar struchtúir bainistithe géarchéime CBSC, go háirithe an obair atá á déanamh chun cumas míleata pleanála agus seolta (MPCC) a bhunú i bhfoireann mhíleata an Aontais (mar chuid den tSeirbhís Eorpach Gníomhaíochta Seachtraí), agus a bheidh i gceannas mhisin mhíleata neamhfheidhmiúcháin CBSC (faoi láthair: EUTM an tSomáil, EUTM RCA, EUTM Mailí), mar a comhaontaíodh an 6 Márta 2017;

- Comhar CBSC a neartú le tíortha comhpháirtíochta, agus é mar aidhm cur chuige níos straitéisí a ghlacadh i ndáil le comhpháirtíochtaí an Chomhbheartais Slándála agus Cosanta, d’fhonn an comhar a fheabhsú, ag díriú ar thíortha comhpháirtíochta ar mór acu freisin na luachanna is dual don Aontas, lena n-áirítear an urraim don dlí idirnáisiúnta, agus tíortha atá in ann agus atá toilteanach rannchuidiú le misin agus oibríochtaí CBSC;

- Fothú acmhainní don tslándáil agus don fhorbairt (CBSD), d’fhonn gach ceanglas a chumhdach go hiomlán chun tacaíocht a thabhairt do thíortha comhpháirtíochta le go mbeidh siad in ann géarchéimeanna a chosc agus a bhainistiú iad féin;

- Cumais shibhialta a fhorbairt agus freagrúlacht bainistithe géarchéime sibhialtaí a fheabhsú, lena n-áirítear go bhféadfaí croí-acmhainn freagrúlachta a bhunú;

- Mearfhreagairt mhíleata a neartú, lena n-áirítear cathghrúpaí an Aontais, d’fhonn a thuilleadh forbartha a dhéanamh, ar bhealach pragmatach, ar a módúlacht agus chun na socruithe maoiniúcháin a chur in oiriúint de réir mar is gá;

- Comhar cosanta na hEorpa a dhoimhniú, measúnú a dhéanamh agus treoir a chur ar fáil maidir leis an mbealach ar aghaidh

• i ndáil le buanchomhar struchtúrtha cuimsitheach (PESCO), lena gcuirfí ar chumas na mBallstát sin atá toilteanach agus in ann leanúint den chomhoibriú lena chéile i réimse na slándála agus na cosanta, agus lena gcabhrófaí le hiarrachtaí comhpháirteacha eile, comhar breise agus tionscadail eile a chruthú.
• go bhféadfaí athbhreithniú bliantúil comhordaithe, ar bonn deonach, a dhéanamh ar an gCosaint (CARD), a bheadh mar phróiseas chun léargas níos fearr a fháil, ar leibhéal an Aontais, ar an gcaiteachas ar chosaint, an infheistíocht náisiúnta agus na hiarrachtaí i dtaca le taighde ar chosaint. Leis sin, thabharfaí tacaíocht do na Ballstáit chun acmhainní a sholáthar le déileáil le treochtaí agus dúshláin straitéiseacha anois agus amach anseo agus chun an comhar cosanta a chur chun cinn agus a fheabhsú ar bhealach gníomhach i measc na mBallstát.
• an Plean Gníomhaíochta Eorpach um Chosaint ón gCoimisiún Eorpach, lena bhforáiltear d’uirlisí nua airgeadais i ndáil le forbairt cumais agus comhar cosanta chun tacú le tionscal cosanta na hEorpa agus leis an nuálaíocht teicneolaíocha.

• Conclúidí ón gComhairle maidir le Slándáil agus Cosaint i gcomhthéacs Straitéis Dhomhanda an Aontais Eorpaigh

Cúlra

Ar an 14 Samhain 2016, ghlac an Chomhairle conclúidí maidir le straitéis dhomhanda an Aontais Eorpaigh a chur chun feidhme i réimse na slándála agus na cosanta. Leagtar amach leis na conclúidí sin méid na huallmhéine, is é sin na príomhaidhmeanna is mian leis an Aontas agus na Ballstáit a bhaint amach i réimse na slándála agus na cosanta. Leag an Chomhairle trí thosaíocht straitéiseacha amach: freagairt do choinbhleachtaí seachtracha agus do ghéarchéimeanna seachtracha, cur le hacmhainní na gcomhpháirtithe, agus an tAontas Eorpach agus saoránaigh an Aontais a chosaint. Aithníodh an dul chun cinn agus cuireadh treoir bhreise ar fáil trí bhíthin na gconclúidí ón gComhairle ar an 6 Márta 2017.

Rinne an tArdionadaí, ag gníomhú di ina cáil mar Leas-Uachtarán ar an gCoimisiún Eorpach agus mar Cheann na Gníomhaireachta Eorpaí um Chosaint freisin, an plean cur chun feidhme maidir le cúrsaí slándála agus cosanta a chur faoi bhráid na mBallstát. Is cuid é den obair leantach ar straitéis dhomhanda an Aontais Eorpaigh maidir leis an mbeartas eachtrach agus slándála a chuir an tArdionadaí faoi bhráid na Comhairle Eorpaí ar an 28 Meitheamh. Ghlac an Chomhairle conclúidí maidir leis an straitéis dhomhanda ar an 17 Deireadh Fómhair 2016.

Tá i gceist freisin le cur chun feidhme straitéis dhomhanda an Aontais Eorpaigh breis oibre a dhéanamh ar athléimneacht a fhorbairt agus ar chur chuige comhtháite a fhorbairt i leith coinbhleachtaí agus géarchéimeanna, an nasc a neartú idir beartais inmheánacha agus beartais sheachtracha, straitéisí réigiúnacha agus téamacha a thabhairt chun dáta nó straitéisí nua den sórt sin a ullmhú agus iarrachtaí a threisiú i dtaca le taidhleoireacht leis an bpobal.

• Comhar AE maidir leis an tslándáil agus leis an gcosaint (cúlra faisnéise)