An teagasc agus an fhoghlaim le haghaidh an oideachais meánscoile agus an ardoideachais

Anseo, tá acmhainní oideachais in aisce faoin gComhairle Eorpach agus faoi Chomhairle an Aontais Eorpaigh do dhaltaí sa mheánoideachas agus san ardoideachas, lena n-áirítear ceachtanna réamhdhéanta, cleachtadh rólimeartha agus uirlis foghlama de chineál tráth na gceist.

Má tá acmhainní á lorg agat don oideachas réamhscoile agus bunscoile, is féidir leat cuairt a thabhairt ar an leathanach seo:

• Teagasc agus foghlaim don réamhscolaíocht agus don bhunscolaíocht

Ceachtanna teagaisc réamhdhéanta

Ar mhaith leatsa ceachtanna ar an Aontas agus ar an gcaoi a gcomhoibríonn na 27 mBallstát le chéile a theagasc? B’fhéidir nach bhfuil an t-am agat an taighde a dhéanamh agus na ceachtanna a phleanáil?

Tá ‘Pacáiste Oideachais Saoránaigh’ curtha ar fáil ag an gComhairle ina bhfuil seacht gceacht réamhdhéanta, atá deartha chun cabhrú le múinteoirí, léachtóirí ollscoile agus gairmithe oideachais chun an obair a dhéanann Comhairle an Aontais Eorpaigh agus an Chomhairle Eorpach a mhíniú.

Ag gabháil le gach ceacht tá lámhleabhair an mhúinteora ina bhfuil treoir ama agus cur síos céim ar chéim ar na gníomhaíochtaí, agus an t-ábhar ar fad atá le húsáid sa rang, cuir i láthair PowerPoint, físeáin agus naisc chuig doiciméid tacaíochta ina measc.

Is mar seo a leagtar amach na ceachtanna:

• aoisghrúpa: daltaí, mic léinn agus foghlaimeoirí atá idir 9-12, 12-19, 17-25 agus 60+
• modh teagaisc: d’fhoghlaimeoirí atá idir 12 bhliain agus 25 bliana d’aois, déan rogha idir na ceachtanna d’fhoghlaimeoirí teoiriciúla agus na ceachtanna sin d’fhoghlaimeoirí praiticiúla, bunaithe ar an modh is fearr a d’oirfeadh do na foghlaimeoirí, nó déan meascán den dá chur chuige.

Féadfar na ceachtanna a íoslódáil in aisce trí chliceáil ar na naisc thíos:

‘Aire ar feadh lae’ – cluiche ionsamhlúcháin na Comhairle

Ar mhaith leat go bhfoghlaimeodh do dhaltaí agus iad ag gníomhú sa rang?

Ionsamhlúchán ar chruinniú den Chomhairle atá i gcleachtadh rólimeartha na Comhairle inar féidir leis daltaí páirt na n-airí náisiúnta a ghlacadh. Cuireann na rannpháirtithe seasamh a dtíortha i láthair agus téann siad i mbun caibidlíochta le tíortha eile de chuid an Aontais, agus ag an am céanna cleachtann siad scileanna ríthábhachtacha, cuir i gcás an óráidíocht, an chaibidlíocht agus an éisteacht ghníomhach.

Taithí phraiticiúil ar chinnteoireacht an Aontais do dhaltaí meánscoile agus mic léinn ollscoile atá 16 bliana d’aois nó níos sine atá in ‘Aire ar feadh lae’. Is féidir é a imirt i ngrúpaí de 20 go 50 duine, agus tógann sé 120 nóiméad ar a laghad é a imirt.

Cuireann an t-ionsamhlúchán seo trí thopaic ar leith ar fáil d’éascaitheoirí agus do ghrúpaí as a bhféadfaidh siad rogha a dhéanamh: ‘Rialachán maidir le lipéadú cóirfhaisin’, ‘Rialachán maidir le hastaíochtaí CO2 le haghaidh gluaisteáin paisinéirí’ agus ‘Creat intleachta saorga a thabhairt isteach’. Pléitear, faoi gach téama, togra beartais amháin ó dhearcthaí éagsúla.

Tá lámhleabhar ann don mhúinteoir/éascaitheoir agus 29 rólphróifíl atá le dáileadh ar na rannpháirtithe.

Europa Quest: uirlis foghlama idirghníomhach de chineál thráth na gceist

An bhfuil tú ag lorg bealach siamsúil chun do dhaltaí a mhúineadh faoin Aontas Eorpach agus faoin gcaoi a n-oibríonn 27 mBallstát an Aontais le chéile? Uirlis oideachais atá bunaithe ar thráth na gceist is ea Europa Quest a ceapadh chun obair bhuíne agus cumarsáid a spreagadh i measc rannpháirtithe, rud a chothaíonn muintearas agus comhfhoghlaim.

Tagann sé mar lámhleabhar PDF le treoir céim ar chéim agus cur i láthair tacaíochta PowerPoint ina bhfuil na ceisteanna agus na freagraí, ar féidir iad a réamh-mheas le linn na gníomhaíochta (roghnach), chomh maith le nótaí don mhodhnóir.

Áirítear sa phacáiste leagan tosaitheoirí atá oiriúnach do leanaí idir 9 agus 14 bliana d’aois, agus leagan ardleibhéil do dhaltaí atá 15 bliana d’aois nó níos sine, ionas gur féidir leat an ghníomhaíocht a chur in oiriúint do riachtanais do dhaltaí.

Íoslódáil Europa Quest thíos:

• Lámhleabhar an mhodhnóra (comhad PDF)
• Tráth na gceist idirghníomhach: bunleagan do dhaltaí idir 9 agus 14 bliana d'aois (comhad PowerPoint)
• Tráth na gceist idirghníomhach – ardleagan do dhaltaí atá 15 bliana d’aois nó níos sine (comhad PowerPoint)