Riżorsi edukattivi għall-għalliema u l-istudenti fl-edukazzjoni sekondarja u għolja

Sib riżorsi edukattivi bla ħlas dwar il-Kunsill Ewropew u l-Kunsill tal-UE għall-istudenti fl-edukazzjoni sekondarja u dik għolja, inkluż lezzjonijiet lesti, eżerċizzju ta' logħob ta' rwol u għodda ta' tagħlim tat-tip kwiżż.

Jekk qed tfittex riżorsi għall-edukazzjoni preprimarja u primarja, tista' żżur din il-paġna:

• Tagħlim u apprendiment għall-edukazzjoni preprimarja u primarja

Lezzjonijiet lesti għat-tagħlim

Tixtieq tgħallem dwar l-UE u dwar kif is-27 stat membru tagħha jaħdmu flimkien, iżda m'għandekx il-ħin biex tirriċerka u torganizza l-lezzjonijiet tiegħek?

Il-"Pakkett ta' edukazzjoni ċivika" tal-Kunsill jinkludi 7 lezzjonijiet lesti għat-tagħlim imfassla biex jgħinu lill-għalliema, lekċerers universitarji u professjonisti oħra tal-edukazzjoni jispjegaw il-ħidma tal-Kunsill tal-UE u l-ħidma tal-Kunsill Ewropew.

Kull lezzjoni fiha l-manwali tal-għalliem bl-organizzazzjoni tal-ħin u deskrizzjoni pass pass tal-attivitajiet, u l-materjali kollha li għandhom jintużaw fil-klassi, inkluż preżentazzjonijiet bil-PowerPoint, filmati, u links għad-dokumenti ta' sostenn.

Il-lezzjonijiet huma maqsuma skont:

• il-grupp tal-età: studenti tal-età 9-12, 12-19, 17-25 u 60+
• il-metodu ta' tagħlim: għall-istudenti bejn 12 u 25 sena, agħżel bejn il-lezzjonijiet għal studenti li jippreferu approċċ teoretiku u dawk għal studenti li jippreferu approċċ prattiku, skont x'jaħdem l-aħjar mal-istudenti tiegħek, jew għaqqad iż-żewġ approċċi.

Niżżel il-lezzjonijiet bla ħlas billi tikklikkja fuq il-links ta' hawn taħt:

"Ministru għal ġurnata" - is-simulazzjoni tal-Kunsill

Tixtieq li l-istudenti tiegħek jitgħallmu bil-prattika u jieħdu rwol attiv fil-klassi?

L-eżerċizzju ta' logħob ta' rwol tal-Kunsill jissimula laqgħa tal-Kunsill, u b'hekk jippermetti lill-istudenti jieħdu r-rwol ta' ministri nazzjonali. Il-parteċipanti jippreżentaw il-pożizzjoni ta' pajjiżhom u jinnegozjaw mal-pajjiżi l-oħra tal-UE, filwaqt li jipprattikaw ħiliet kruċjali, bħat-taħdit pubbliku, in-negozjar, u s-smigħ attiv.

"Ministru għal ġurnata" hija esperjenza prattika tat-teħid tad-deċiżjonijiet tal-UE għal studenti tal-iskejjel sekondarji u studenti universitarji minn 16-il sena 'l fuq. Tista' tintlagħab minn gruppi ta' bejn 20 u 50 persuna, u ddum mill-inqas 120 minuta biex tintlagħab.

Din is-simulazzjoni toffri tliet suġġetti distinti li minnhom jistgħu jagħżlu l-faċilitaturi u l-gruppi: "Regolament dwar tikketta tal-moda ekwa", "Regolament dwar l-emissjonijiet ta' CO2 għall-karozzi tal-passiġġieri" u “Introduzzjoni ta' qafas tal-IA". Kull tema tiddiskuti proposta ta' politika waħda minn perspettivi differenti.

Ikollha manwal għall-għalliem/faċilitatur u 29 profil ta' rwoli li għandhom jitqassmu lill-parteċipanti.

Europa Quest: għodda ta' tagħlim interattiv tat-tip kwiżż

Qed tfittex mod divertenti biex tgħallem lill-istudenti tiegħek dwar l-Unjoni Ewropea u kif jaħdmu flimkien is-27 pajjiż tal-UE? Europa Quest hija għodda edukattiva bbażata fuq kwiżż imfassla biex tħeġġeġ il-ħidma f'tim u l-komunikazzjoni fost il-parteċipanti, filwaqt li trawwem sens ta' tagħlim komunitarju u kondiviż.

Tiġi bħala manwal PDF bi gwida pass pass u preżentazzjoni PowerPoint ta' appoġġ li tinkludi l-mistoqsijiet u t-tweġibiet, li jistgħu jiġu pproġettati matul l-attività (fakultattiva), kif ukoll noti għall-moderatur.

Il-pakkett jinkludi verżjoni għal prinċipjanti adatta għal dawk li għandhom bejn 9 u 14-il sena, u verżjoni avvanzata għall-istudenti li għandhom 15-il sena u aktar, sabiex tkun tista' tadatta l-attività għall-ħtiġijiet tal-istudenti tiegħek.

Iddawnlowdja Europa Quest hawn taħt:

• Manwal tal-moderaturi (fajl PDF)
• Kwiżż interattiv: verżjoni għall-prinċipjanti għal studenti bejn 9 u 14-il sena (fajl PowerPoint)
• Kwiżż interattiv: verżjoni avvanzata għal studenti minn 15-il sena 'l fuq (fajl PowerPoint)