20 sena wara 9/11: kisbiet u sfidi tal-isforzi tal-UE fil-ġlieda kontra t-terroriżmu
Xandira diretta dwar il-ġlieda kontra t-terroriżmu
It-terroriżmu jhedded il-valuri demokratiċi tas-soċjetajiet tagħna u d-drittijiet u l-libertajiet taċ-ċittadini Ewropej. Il-ġlieda kontra t-terroriżmu hija prijorità ewlenija għall-UE u l-istati membri tagħha, kif ukoll għas-sħab internazzjonali tagħha.
Il-ġlieda kontra t-terroriżmu hija suġġett importanti ħafna għaċ-ċittadini tal-UE li, skont l-aħħar stħarriġ tal-Ewrobarometru, jixtiequ li l-UE tagħmel aktar f'dan il-qasam.
2021 timmarka 20 sena wara 9/11, l-attakki terroristiċi tal-2001 fi New York. Hija wkoll is-sena meta Gilles de Kerchove tirtira wara erbatax-il sena bħala Koordinatur tal-UE għall-Ġlieda Kontra t-Terroriżmu.
Fit-8 ta' Lulju, il-Kunsill ser jospita xandira diretta online biex:
- iqis il-kisbiet tal-ħidma tal-UE kontra t-terroriżmu
- jiddiskuti l-isfidi ewlenin
Ser ikun hemm streaming tax-xandira fuq is-sit web tal-Kunsill u fuq Twitter.
Punti għad-diskussjoni
Il-xandira, li tibda fil-17:00 u tispiċċa fis-18:30, ser tiffoka fuq tliet suġġetti:
- 20 sena wara 9/11
- l-evoluzzjoni tat-theddida u tal-mezzi
- id-dimensjoni esterna
Matul ix-xandira, Gilles de Kerchove u kelliema oħra ta' livell għoli mill-istituzzjonijiet tal-UE, l-istati membri, l-aġenziji tal-UE, il-gruppi ta' riflessjoni, l-organizzazzjonijiet internazzjonali u l-pajjiżi sħab ser iwieġbu mistoqsijiet mill-pubbliku u mill-utenti tal-media soċjali.
Il-kelliema ser jitkellmu bl-Ingliż u bil-Franċiż. L-interpretazzjoni ser tiġi pprovduta għall-Ingliż, il-Franċiż u l-Ġermaniż.
1. 20 sena wara 9/11, 6 snin wara Charlie Hebdo, 5 snin wara l-attakki fi Brussell, x'tgħallimna?
L-UE żiedet bil-qawwa r-rispons tagħha kontra t-terroriżmu wara 9/11 u aktar u aktar wara l-attakki ta' Pariġi u Brussell tal-2015 u l-2016. Daesh jopera bejn il-fruntieri u Schengen huwa spazju mingħajr kontrolli fil-fruntieri interni, għalhekk huma meħtieġa rispons komuni u għodod moderni ta' kooperazzjoni.
F'din is-sessjoni, il-kelliema ser iħarsu lejn l-isforzi tal-UE fil-ġlieda kontra t-terroriżmu mill-perspettiva tal-politiċi, il-prosekuturi ewlenin tal-ġlieda kontra t-terroriżmu, l-istituzzjonijiet tal-UE u l-Europol. Huma ser ikollhom skambju ta' fehmiet dwar:
- x'ħadem u x'ma ħadimx
- il-valur miżjud tal-kooperazzjoni tal-UE
- l-appoġġ tal-aġenziji tal-UE bħall-Europol u l-Eurojust għall-investigazzjonijiet u l-prosekuzzjonijiet kontra t-terroriżmu
- il-kondiviżjoni u l-analiżi tal-informazzjoni
- stejjer konkreti ta' suċċess
- il-ġlieda kontra l-finanzjament tat-terroriżmu, l-armi tan-nar u n-networks ta' komunikazzjoni
- is-sigurtà fil-fruntieri
- il-prevenzjoni tar-radikalizzazzjoni u l-politiki ta' "persważjoni" bħall-edukazzjoni, iż-żgħażagħ, il-kultura u l-isport
2. L-evoluzzjoni tat-theddida u tal-mezzi
L-antiċipazzjoni tat-theddid emerġenti hija kruċjali għall-prevenzjoni ta' attakki futuri fl-Ewropa u għall-protezzjoni taċ-ċittadini Ewropej. Dan ġie enfasizzat fl-aġenda tal-UE kontra t-terroriżmu ppreżentata mill-Kummissjoni Ewropea f'Diċembru 2020.
Din is-sessjoni, li tinvolvi kelliema ta' livell għoli mill-istituzzjonijiet tal-UE, l-istati membri, is-settur privat u l-akkademja ser tħares lejn it-theddid emerġenti u kif l-UE tista' tnaqqas l-impatt tagħhom. Ser jiġu diskussi wkoll id-diġitalizzazzjoni tas-sigurtà u t-teknoloġiji fixkiela. B'mod partikolari, il-parteċipanti ser jiffokaw fuq:
- it-terroriżmu fi żminijiet ta' COVID-19
- it-terroriżmu estremist tal-lemin u dak ġiħadista
- ir-radikalizzazzjoni online
- ir-rwol tal-ideoloġija
- id-dark web
- id-diżinformazzjoni, id-diskors ta' mibegħda, l-amplifikazzjoni algoritmika
- it-teknoloġiji ġodda, inkluż stampar 3D, droni u intelliġenza artifiċjali
- l-isfidi li jiġu ffaċċjati fl-infurzar tal-liġi u l-aċċess għal informazzjoni online (kriptaġġ, żamma ta' data)
- kwistjonijiet ta' protezzjoni tad-data u privatezza
3. Id-dimensjoni esterna
It-theddida terroristika madwar id-dinja għadha għolja. Mill-2015, l-UE żiedet b'mod sinifikanti l-iżvilupp ta' sħubiji kontra t-terroriżmu, b'mod partikolari fil-viċinat tagħha (il-Balkani tal-Punent, l-Afrika ta' Fuq u l-Lvant Nofsani) iżda wkoll fir-reġjun tas-Saħel.
Panel ta' livell għoli b'rappreżentanti mill-istituzzjonijiet tal-UE, in-NU, id-diplomazija internazzjonali, l-Istati Uniti u sħab oħra ser jiddiskuti l-isfidi li fadal u modi biex tiżdied ir-reżiljenza fis-soċjetà tagħna kontra ideoloġiji vjolenti li qed jevolvu.
Din is-sessjoni ser tiffoka b'mod speċjali fuq:
- il-legat tad-Daesh fis-Sirja u l-Iraq, il-koalizzjoni kontra d-Daesh
- l-irtirar tat-truppi tal-Istati Uniti mill-Afganistan
- il-gruppi terroristiċi fl-Afrika
- il-kooperazzjoni internazzjonali
- il-ħidma mas-sħab fuq il-post
- is-sħubijiet tal-UE kontra t-terroriżmu mal-ġirien tagħha fil-Balkani tal-Punent u fil-Mediterran
- it-tixrid tal-ideoloġija estremista Iżlamista
- l-impatt tal-għażliet tal-politika barranija
- l-għoti ta' opportunitajiet għaż-żgħażagħ
Koordinatur tal-UE għall-Ġlieda Kontra t-Terroriżmu
Gilles de Kerchove nħatar Koordinatur għall-Ġlieda Kontra t-Terroriżmu fid-19 ta' Settembru 2007 minn Javier Solana, li dak iż-żmien kien ir-Rappreżentant Għoli tal-UE għall-Affarijiet Barranin u l-Politika ta' Sigurtà.
Il-Koordinatur għall-Ġlieda Kontra t-Terroriżmu huwa inkarigat biex:
- jikkoordina l-ħidma tal-Kunsill fil-ġlieda kontra t-terroriżmu
- jippreżenta rakkomandazzjonijiet ta' politika u jipproponi oqsma ta' azzjoni prijoritarji lill-Kunsill
- jissorvelja l-implimentazzjoni tal-istrateġija tal-UE kontra t-terroriżmu
- iżomm għajnejh fuq l-istrumenti kollha tal-UE, jirrapporta lill-Kunsill u jieħu ħsieb is-segwitu tad-deċiżjonijiet tal-Kunsill
- jikkoordina mal-korpi preparatorji rilevanti tal-Kunsill, il-Kummissjoni u s-SEAE
- jiżgura li l-UE jkollha rwol attiv fil-ġlieda kontra t-terroriżmu
- itejjeb il-komunikazzjoni bejn l-UE u pajjiżi terzi
L-aħħar reviżjoni: 10 ta' Jannar 2024