Politika agrikola aktar ġusta, aktar ekoloġika u bbażata aktar fuq ir-rendiment
Infografika - Politika agrikola aktar ġusta, aktar ekoloġika u bbażata aktar fuq ir-rendiment
Il-politika agrikola komuni tal-UE tappoġġa lill-bdiewa u tagħmel żgur li jkun hemm ikel ta' kwalità għolja għaċ-ċittadini Ewropej. Biex twieġeb għall-ħtiġijiet u l-isfidi dejjem jinbidlu, l-UE qed taħdem għal politika agrikola ġdida.
Il-politika agrikola komuni tal-UE:
- tappoġġa seba' miljun benefiċjarju madwar l-UE
- tipprovdi ikel ta' kwalità għolja lil 447 miljun Ewropew
- għandha baġit ta' €386.6 biljun, terz tal-baġit totali tal-UE
- tikkontribwixxi għall-azzjoni għall-klima b'madwar 40% tal-baġit tagħha
X'hemm ġdid fil-politika?
Aktar flessibbiltà fl-ippjanar
Kull stat membru huwa mitlub ifassal pjan strateġiku, li l-għanijiet tiegħu għandhom ikunu konformi mal-objettivi ta' politika mifruxa mal-UE kollha. Il-pjanijiet jippermettu lill-pajjiżi jiddefinixxu aħjar kif jużaw il-fondi agrikoli skont il-kundizzjonijiet u l-ħtiġijiet lokali.
Il-pjanijiet jinkludu dawn l-aspetti tal-pajjiżi:
- il-ħtiġijiet u l-għodod
- l-azzjonijiet u l-miri
- l-interventi speċifiċi disponibbli għall-bdiewa
Appoġġ finanzjarju maħsub aħjar
Appoġġ għad-dħul ser jitqassam b'mod aktar ġust. Il-ħlas għal kull bidwi jaf jitnaqqas u jiġi limitat bħala parti minn tqassim mill-ġdid aktar komprensiv tal-appoġġ minn irziezet akbar għal dawk iżgħar.
Il-fondi ser jingħataw prijorità għal:
- irziezet żgħar
- bdiewa żgħażagħ
Prattiki ta' biedja aktar ekoloġiċi
Permezz tal-ekoskemi, jiġi pprovdut ħlas speċifiku lil bdiewa li jadottaw prattiki li jqisu t-tibdil fil-klima u li jħarsu n-natura, li jistgħu jgħinu fl-implimentazzjoni tal-objettivi tal-Patt Ekoloġiku Ewropew. Eżempji ta' dawn l-azzjonijiet huma:
- biedja organika
- newba tal-għelejjel
- preżervazzjoni ta' ħamrija b'livell għoli ta' karbonju
Aktar konċentrazzjoni fuq ir-rendiment
L-istati membri jippjanaw interventi bbażati fuq riżultati ċari, u jirrapportaw dwar ir-rendiment abbażi tal-objettivi tal-pjan strateġiku.
Il-bdiewa jirċievu appoġġ finanzjarju bil-kundizzjoni li jadottaw prattiki favur il-klima u l-ambjent.
Impenn lejn id-drittijiet soċjali u tax-xogħol
L-istati membri jimpenjaw ruħhom li jtejbu r-rispett tal-kundizzjonijiet soċjali u tax-xogħol għall-bdiewa.
Aġenziji tal-pagamenti agrikoli f'kull stat membru joħorġu multi lil min iħaddem meta jonqos milli jikkonforma ma' dawn ir-regoli.
Meta ser jidħlu fis-seħħ il-bidliet?
2021-2022: Perjodu tranżizzjonali b'estensjoni tal-biċċa l-kbira tad-dispożizzjonijiet u tħejjija għall-fażi l-ġdida
2023-2027: Implimentazzjoni tal-PAK riformata u r-regoli l-ġodda tagħha