Kunsill Kompetittività, 12/03/2018, 12 ta' Marzu 2018

Riżultati ewlenin

Il-futur tal-politika industrijali

Il-Kunsill kellu diskussjoni dwar il-politika industrijali u adotta konklużjonijiet dwar strateġija tal-politika industrijali tal-UE futura.

Il-konklużjonijiet jenfasizzaw il-ħtieġa urġenti għal strateġija fit-tul għall-industrija Ewropea sabiex tagħti spinta lill-kompetittività, it-tkabbir u l-innovazzjoni fl-Ewropa.

Il-politika industrijali tagħna hija kwistjoni strateġika għall-Ewropa – dak li nagħmlu issa ser jiddetermina fejn ser ikunu jinsabu l-ekonomija u s-soċjetà tagħna għaxar snin oħra. Dan jissottolinja l-ħtieġa li jkollna approċċ usa', fit-tul u li jħares 'il quddiem. Żviluppi reċenti servew biss biex jikkonfermaw il-ħtieġa li jiġu identifikati azzjonijiet strateġiċi b'appoġġ għall-industrija Ewropea, li jgħinuha tadatta, tattira l-investimenti u toħloq l-impjiegi. Emil Karanikolov, Ministru għall-Ekonomija tal-Bulgarija

• L-istrateġija tal-politika industrijali tal-UE: Il-Kunsill jadotta konklużjonijiet (stqarrija għall-istampa, 12/03/2018)

Id-diġitalizzazzjoni tal-ekonomija: Semestru Ewropew 2018

Il-ministri iddiskutew id-diġitalizzazzjoni tal-ekonomija tal-UE fil-kuntest taċ-ċiklu tas-semestru Ewropew.

Huma enfasizzaw għadd ta' prijoritajiet fil-qasam tar-riforma strutturali li huma meħtieġa kemm fil-livell Ewropew kif ukoll f'dak nazzjonali sabiex jieħdu l-benefiċċji kollha tat-trasformazzjoni diġitali.

Il-25 anniversarju tas-suq uniku: it-triq 'il quddiem

Il-ministri ddiskutew it-triq 'il quddiem biex itejbu u japprofondixxu is-suq uniku.

Fl-2018 qed niċċelebraw 25 sena mill-ħolqien tas-suq uniku. Matul dan iż-żmien, twettaq ħafna xogħol u qed naraw il-ħafna benefiċċji li qed igawdu nies u kumpaniji madwar l-UE. Madankollu ma nistgħux nieqfu hemm. Irridu naħdmu aktar sabiex nieħdu nisfruttaw bis-sħiħ il-possibbiltajiet kbar ħafna li s-suq uniku għad jista' jiġġenera f'termini ta' prosperità u benesseri. Emil Karanikolov, Ministru għall-Ekonomija tal-Bulgarija

Restrizzjonijiet fis-swieq tas-servizzi: eżami tal-kompetittività

Skont id-dibattitu regolari dwar l-eżami tal-kompetittività, il-ministri eżaminaw l-ispejjeż imġarrba minn restrizzjonijiet mhux dovuti fis-swieq tas-servizzi.

Dawn ir-restrizzjonijiet għandhom impatt negattiv fuq il-prestazzjoni tas-setturi tal-manifattura li jużaw dawk is-servizzi, u jnaqqsu l-produttività tagħhom.

It-tneħħija ta' restrizzjonijiet żejda tista' tipproduċi gwadanji sostanzjali għall-ekonomija reali, b'mod partikolari fis-settur tal-bejgħ bl-imnut.