Kunsill Kompetittività, 18-19/02/2019, 18 u 19 ta' Frar 2019

Riżultati ewlenin

Suq intern u industrija, 18 ta' Frar

Il-Kunsill organizza dibattitu ta' orjentazzjoni dwar l-impatt tal-Intelliġenza Artifiċjali fuq il-kompetittività tal-industrija tal-UE u adotta konklużjonijiet dwar din il-kwistjoni. Il-ministri ssottolinjaw l-importanza kruċjali li jitrawmu l-iżvilupp u l-użu tal-intelliġenza artifiċjali fl-Ewropa.

Il-Kunsill organizza wkoll dibattitu ta' orjentazzjoni ieħor dwar l-aspetti relatati mal-industrija tal-Komunikazzjoni reċenti tal-Kummissjoni bit-titlu "Pjaneta nadifa għal kulħadd". Il-ministri saħqu li l-industrija tal-UE ser tkompli tkun faċilitatur ewlieni fit-tnaqqis tal-emissjonijiet ta' gassijiet b'effett ta' serra permezz ta' taħlita bilanċjata u prevedibbli ta' politiki differenti. It-trasformazzjoni prevista tal-industrija Ewropea toffri kemm opportunitajiet kif ukoll sfidi, li jeħtieġ li jiġu indirizzati f'livelli differenti billi jittieħed kont tal-fehmiet tan-negozji, taċ-ċittadini u tal-istati membri.

Waqt iċ-checkup tradizzjonali tal-kompetittività, wara preżentazzjoni bil-fomm mill-Kummissjoni, id-diskussjonijiet fi ħdan il-Kunsill iffukaw fuq l-impatt tal-katini ta' valur settorjali Ewropej fuq il-kompetittività u t-tkabbir. Il-ministri enfasizzaw ir-rwol dejjem akbar tas-servizzi tas-suq fil-katini ta' valur globali.

Waranofsinhar, il-ministri kellhom skambju ta' fehmiet dwar kif jista' jitjieb il-kontribut tal-Kunsill Kompetittività għall-proċess tas-Semestru Ewropew.

Taħt affarijiet oħra, il-Kunsill ġie mgħarraf dwar is-sitwazzjoni attwali f'għadd ta' fajls leġislattivi fil-kompetenza tiegħu.

Il-konklużjonijiet tal-lum dwar l-Intelliġenza Artifiċjali jservu bħala linji gwida għall-azzjonijiet futuri tal-UE f'dan il-qasam bil-għan li l-Unjoni Ewropea tkun fost il-muturi tal-Intelliġenza Artifiċjali fuq livell globali. L-Ewropa trid tlaħħaq mal-isfidi ta' dinja li qed tinbidel b'ritmu mgħaġġel u huwa essenzjali li niddiskutu kif nistgħu nsiru ekonomija newtrali għall-klima, filwaqt li nħarsu l-vantaġġi kompetittivi tal-industrija tagħna. Niculae Bădălău, Ministru għall-Ekonomija tar-Rumanija

Riċerka, 19 ta' Frar

Il-Kunsill ħa nota tal-progress li sar s'issa fl-analiżi tal-Programm Speċifiku li jimplimenta Orizzont Ewropa u kellu skambju ta' fehmiet dwar il-kwistjonijiet pendenti ewlenin.

Taħt affarijiet oħra, il-Kunsill ġie mgħarraf dwar is-sitwazzjoni attwali fir-rigward tan-negozjati mal-Parlament Ewropew dwar Orizzont Ewropa, il-programm qafas li jmiss għar-riċerka u l-innovazzjoni. Huwa kien mgħarraf ukoll dwar il-progress miksub s'issa fl-analiżi tal-abbozz ta' deċiżjoni tal-Kunsill dwar il-parteċipazzjoni kontinwa tal-UE fil-proġett ITER.

Id-diskussjonijiet tal-lum ipprovdewlna l-gwida politika meħtieġa biex il-ħidma fir-rigward tal-programm speċifiku tavvanza b'pass mgħaġġel simili għal dak fuq il-programm qafas. Aħna għadna fiduċjużi li kollox ser ikun lest biex il-programm il-ġdid, Orizzont Ewropa, jieħu post dak eżistenti. Nicolae Hurduc, Ministru għar-riċerka u l-innovazzjoni tar-Rumanija