Kunsill Affarijiet Ekonomiċi u Finanzjarji, 8 ta' Lulju 2014

L-Ecofin jiddiskuti l-programm ta' ħidma tiegħu għat-tieni nofs tal-2014

Fil-laqgħa tat-8 ta' Lulju, il-ministri ddiskutew il-programm ta' ħidma tal-Kunsill Affarijiet Ekonomiċi u Finanzjarji u l-prijoritajiet għat-tieni semestru tal-2014, ippreżentati mill-presidenza Taljana.

Ir-riformi strutturali u l-investiment fit-tkabbir u l-impjiegi huma l-prijoritajiet ewlenin taħt il-presidenza Taljana tal-Kunsill tal-UE, li bdiet mill-1 ta' Lulju sal-aħħar ta' Diċembru 2014.

Pier Carlo Padoan, il-Ministru Taljan tal-Ekonomija u l-Finanzi u l-President tal-Ecofin, ippreżenta l-proposta tal-presidenza biex tingħata spinta lit-tkabbir fl-UE, li jserraħ fuq 3 pilastri ewlenin: aktar integrazzjoni tas-suq uniku, spinta lir-riformi strutturali u promozzjoni tal-investiment.

"Jeħtieġ inkomplu bil-konsolidazzjoni fiskali, jeħtieġ li nrawmu t-tkabbir – dawn huma ż-żewġ naħat tal-istess munita", qal il-Ministru Padoan.

Wara d-diskussjoni, il-Kunsill ħareġ dikjarazzjoni, li tikkonferma l-appoġġ tiegħu għall-objettivi biex tingħata spinta lit-tkabbir u l-impjiegi. Skont id-dikjarazzjoni, ir-riformi strutturali "għandhom jingħataw attenzjoni partikolari, inkluż permezz ta' valutazzjoni adatta ta' miżuri fiskali u riformi strutturali, filwaqt li jsir l-aħjar użu tal-flessibbiltà integrata fir-regoli eżistenti tal-Patt ta' Stabbiltà u Tkabbir".

Il-prijoritajiet ewlenin l-oħra tal-programm ta' ħidma tal-Ecofin jinkludu t-tlestija tal-unjoni bankarja, it-tisħiħ tar-regolamentazzjoni tas-swieq finanzjarji u l-avvanz tal-ħidma leġislattiva fil-qasam tat-tassazzjoni.

Il-ministri ser ikomplu jiddiskutu l-opportunitajiet ta' investiment u riformi strutturali fil-laqgħa informali tal-Ecofin f'Settembru.

Punti ewlenin oħrajn fuq l-aġenda

Reviżjoni ta' nofs it-terminu tal-istrateġija Ewropa 2020

Fil-kuntest tar-reviżjoni li jmiss tal-istrateġija Ewropa 2020 għat-tkabbir u l-impjiegi, il-Kunsill iddiskuta modi kif titjieb l-effettività ta' miżuri ta' politika u kif l-implimentazzjoni tal-istrateġija tista' titjieb permezz tas-Semestru Ewropew.

Il-Kunsill ser jiddiskuti aktar ir-reviżjoni tal-istrateġija f'diversi konfigurazzjonijiet tal-Kunsill fit-tieni nofs tal-2014. Imbagħad huwa ser jipprovdi gwida għall-proposti tal-Kummissjoni li għandhom l-għan li jtejbu l-implimentazzjoni tal-istrateġija.

Semestru Ewropew 2014 konkluż

Il-Kunsill adotta formalment ir-rakkomandazzjonijiet speċifiċi għall-pajjiżi għall-istati membri u għaż-żona tal-euro kollha dwar politiki ekonomiċi u fiskali, wara li ġew approvati mill-Kunsill Ewropew aktar kmieni f'Ġunju.

Emenda għad-direttiva dwar il-kumpanniji prinċipali u sussidjarji: adozzjoni

Il-Kunsill adotta formalment emenda għar-regoli tal-UE dwar it-taxxa li ser jimpedixxu n-nontassazzjoni doppja ta' dividendi mqassma fost gruppi korporattivi li tirriżulta minn arranġamenti ta' self ibridu.

Regoli dwar ir-riżoluzzjoni bankarja

Il-ministri ddiskutew it-tħejjija ta’ leġislazzjoni ta’ implimentazzjoni (żewġ atti legali) dwar il-kontribuzzjonijiet li għandhom jitħallsu mill-banek għall-fondi ta' riżoluzzjoni stabbiliti skont ir-regoli miftiehma reċentement dwar ir-riżoluzzjoni bankarja.

Il-Kummissjoni mistennija tlesti t-tħejjija taż-żewġ atti legali f'Settembru tal-2014.