Comhairle na nGnóthaí Eacnamaíocha agus Airgeadais, 8 Iúil 2014

Phléigh Ecofin an clár oibre don dara leath de 2014

Ag an gcruinniú a bhí ag na hairí an 8 Iúil, phléigh siad clár oibre Chomhairle na nGnóthaí Eacnamaíocha agus Airgeadais agus na tosaíochtaí don dara seimeastar de 2014, a chur Uachtaránacht na hIodáile i láthair.

Is tosaíochtaí lárnacha iad athchóirithe struchtúracha agus infheistíocht san fhás agus i bpoist faoi Uachtaránacht Iodálach Chomhairle an Aontais Eorpaigh, a mhairfidh ón 1 Iúil go dtí deireadh mhí na Nollag.

Chuir Pier Carlo Padaon, Aire Geilleagair agus Airgeadais na hIodáile, agus Cathaoirleach Ecofin, an togra ón Uachtaránacht i láthair le dlús a chur leis an bhfás san Aontas Eorpach, ar togra é atá bunaithe ar 3 phríomhcholún: níos mó comhtháthaithe a dhéanamh ar an margadh aonair, dlús a chur leis na hathchóirithe struchtúracha agus infheistíocht a chur chun cinn.

"Ní mór dúinn leanúint leis an gcomhdhlúthú buiséadach, ní mór dúinn an fás a chothú - is dhá thaobh den bhonn céanna iad", a dúirt an tAire Padoan.

D'eisigh an Chomhairle ráiteas tar éis an phlé, inar dearbhaíodh gur thacaigh sí leis na cuspóirí chun cur leis an bhfás agus le poist. I gcomhréir leis an ráiteas, ba cheart aird ar leith a thabhairt ar athchóirithe struchtúracha "lena n-áirítear trí bhearta buiséadacha agus athchóirithe struchtúracha a mheasúnú, agus an leas is fearr is féidir á bhaint as an tsolúbthacht atá mar chuid de na rialacha maidir leis an gComhshocrú Cobhsaíochta agus Fáis".

Áirítear ar na príomhthosaíochtaí eile atá ar chlár oibre Ecofin an t-aontas baincéireachta a thabhairt chun críche, rialáil na margaí airgeadais a neartú agus an obair reachtach i réimse an chánachais a chur ar aghaidh.

Leanfaidh na hairí de dheiseanna infheistíochta agus athchóirithe struchtúracha a phlé ag an gcruinniú neamhfhoirmiúil a bheidh ag Ecofin i mí Mheán Fómhair.

Ábhair phríomha eile a bheidh ar an gclár oibre

An t-athbhreithniú meántéarma ar straitéis Eoraip 2020

I gcomhthéacs an athbhreithnithe a dhéanfar amach anseo ar straitéis Eoraip 2020 le haghaidh fáis agus post, phléigh an Chomhairle na bealaí ina bhféadfaí feabhas a chur ar éifeachtacht na ngníomhaíochtaí beartais agus mar a fhéadfar feabhas a chur ar chur chun feidhme na straitéise tríd an Seimeastar Eorpach.

Déanfaidh an Chomhairle tuilleadh plé ar athbhreithniú faoin straitéis i bhfoirmíochtaí éagsúla de chuid na Comhairle le linn an dara leath de 2014. Cuirfidh sí treoir ar fáil ansin do thograí an Choimisiúin lena ndírítear ar fheabhas a chur ar chur chun feidhme na straitéise.

Seimeastar Eorpach 2014 tugtha chun críche

Ghlac an Chomhairle moltaí a bhaineann go sonrach le tír faoi leith a bhain leis na Ballstáit agus leis an limistéar euro ina iomláine maidir leis na beartais eacnamaíocha agus buiséadacha, nuair a d'fhormhuinigh an Chomhairle Eorpach iad níos túisce i mí an Mheithimh.

An leasú ar an Treoir Máthairchuideachta: glacadh

Ghlac an Chomhairle go foirmiúil le leasú ar rialacha cánach an Aontais lena gcuirfear cosc ar neamhchánachas dúbailte na ndíbhinní a dháiltear i measc na ngrúpaí corparáideacha a thagann ó shocruithe iasachtaí hibride.

Rialacha maidir le réiteach bainc

Phléigh na hairí an t-ullmhúchán atá á dhéanamh don reachtaíocht chur chun feidhme (2 ghníomh dhlíthiúla) maidir le ranníocaíochtaí atá le híoc ag na bainc do na cistí réitigh a bunaíodh faoi na rialacha a comhaontaíodh le déanaí maidir le réiteach banc.

Meastar go mbeidh an Coimisiún réidh ag ullmhú an 2 ghníomh dhlíthiúla i mí Mheán Fómhair 2014.