Kunsill Affarijiet Ekonomiċi u Finanzjarji, 14/10/2014, 14 ta' Ottubru 2014

Ġlieda kontra l-evażjoni tat-taxxa: il-Kunsill qabel dwar regoli dwar l-iskambju awtomatiku ta' informazzjoni

Fl-14 ta' Ottubru 2014 il-Kunsill Affarijiet Ekonomiċi u Finanzjarji laħaq qbil dwar direttiva mmirata lejn it-tisħiħ tal-ġlieda kontra l-frodi u l-evażjoni tat-taxxa.

Il-Kunsill laħaq qbil dwar direttiva li temenda r-regoli eżistenti tal-UE għall-iskambju ta' informazzjoni bejn l-amministrazzjonijiet tat-taxxa tal-istati membri. Din l-informazzjoni hija relatata ma' ċerti kategoriji ta' dħul li l-kontribwenti għandhom fi stat membru li mhux l-istat ta' residenza tagħhom.

Id-direttiva li ġiet miftehma reċentement ser tippermetti lill-pajjiżi tal-UE jsaħħu l-ġlieda kontra l-frodi tat-taxxa u l-evażjoni tat-taxxa u jżidu l-effiċjenza u l-effettività tal-ġbir tat-taxxa.

"Illum għamilna pass kbir lejn trasparenza akbar li tikkaratterizza t-tmiem tas-segretezza bankarja fi kwistjonijiet tat-taxxa fl-Unjoni Ewropea", qal Pier Carlo Padoan, il-Ministru għall-Ekonomija u l-Finanzi tal-Italja, li ppresjeda l-laqgħa. 

Passi li jmiss

It-test tad-direttiva l-ġdida ser jiġi adottat mingħajr aktar diskussjoni f'laqgħa li jmiss tal-Kunsill, ladarba t-test ikun ġie ffinalizzat bil-lingwi uffiċjali kollha tal-UE. 

Elementi ewlenin tar-regoli miftehmin

Skont ir-regoli li ġew miftehmin reċentement, l-awtoritajiet tat-taxxa fl-UE ser ikollhom l-obbligu li jiskambjaw awtomatikament informazzjoni dwar id-dħul rilevanti kollu (interessi, dividendi u tipi simili ta' dħul) iżda wkoll bilanċi tal-kontijiet u dħul mill-bejgħ ta' assi finanzjarji . 

Ir-regoli attwali li ilhom fis-seħħ sa mill-2013 (id-Direttiva 2011/16 dwar il-kooperazzjoni amministrattiva fil-qasam tat-tassazzjoni) koprew l-iskambju awtomatiku obbligatorju ta' informazzjoni dwar l-impjiegi, il-ħlasijiet tad-direttur, il-prodotti tal-assigurazzjoni fuq il-ħajja, il-pensjonijiet u l-proprjetà immobbli bil-kondizzjoni li din l-informazzjoni tkun disponibbli.

L-iskambju ta' informazzjoni dwar il-kategoriji miżjuda reċentement ta' dħul finanzjarju ser iseħħ mingħajr il-kondizzjoni tad-disponibbiltà ta' informazzjoni.

Id-direttiva tipprevedi wkoll qafas għal assistenza reċiproka bejn l-istati membri, li jippermettilhom jivvalutaw aħjar it-taxxi dovuti.

Suġġetti oħra fuq l-aġenda

Appoġġ għall-investiment

Il-Kunsill adotta konklużjonijiet dwar miżuri b'appoġġ għall-investiment.

Ir-riċerka u l-innovazzjoni bħala sorsi ta' tkabbir

Il-ministri ddiskutew komunikazzjoni mill-Kummissjoni dwar ir-riċerka u l-innovazzjoni bħala sorsi ta' tkabbir imġedded.

Unjoni bankarja: kontribuzzjonijiet mill-banek għall-fondi ta' riżoluzzjoni

Il-Kummissjoni informat lill-Kunsill dwar it-tħejjijiet għall-implimentazzjoni tal-leġislazzjoni li ser tiddetermina l-kontribuzzjonijiet li għandhom jitħallsu mill-banek għall-fondi ta' riżoluzzjoni stabbiliti taħt id-direttiva dwar l-irkupru u r-riżoluzzjoni tal-banek u r-regolament dwar il-fond uniku ta' riżoluzzjoni. Il-kontribuzzjonijiet ser jiġu kkalkulati abbażi tal-obbligazzjonijiet tal-banek, bl-esklużjoni tal-fondi proprji u depożiti koperti, u ser ikunu aġġustati għar-riskju.

Tassazzjoni fuq l-enerġija

Il-Kunsill kellu dibattitu ta' orjentazzjoni dwar proposta għar-ristrutturar tat-tassazzjoni ta' prodotti tal-enerġija u l-elettriku. Il-proposta għandha l-għan li tirristruttura t-tassazzjoni tal-enerġija biex iġġibha konformi mal-objettivi politiċi tal-UE fil-qasam tat-tibdil fil-klima. Billi hemm għadd ta' kwistjonijiet li għad iridu jiġu solvuti, il-Kunsill ser ikompli jaħdem fuq il-proposta biex jilħaq ftehim.