Kunsill Affarijiet Ekonomiċi u Finanzjarji, 06/05/2014, 6 ta' Mejju 2014

Il-Kunsill jiddiskuti t-tneħħija ta' lakuna fit-taxxi

Fil-laqgħa tal-Ecofin fis-6 ta' Mejju l-ministri ddiskutew emendi mmirati lejn it-tneħħija ta' lakuna li ppermettiet li korporazzjonijiet transkonfinali jevitaw li jħallsu t-taxxi fuq ċerti tipi ta' qligħ.

L-emendi għad-direttiva dwar il-kumpanniji prinċipali u s-sussidjarji (2011/96/UE) għandhom l-għan li jwaqqfu s-sitwazzjoni li permezz tagħha l-gruppi korporattivi setgħu jisfruttaw id-differenzi bejn il-liġijiet nazzjonali dwar it-taxxa u jieħdu vantaġġ min-nuqqas doppju ta' tassazzjoni permezz ta' arranġamenti ta' self ibridu.

Id-direttiva oriġinali kienet maħsuba biex tiżgura li l-qligħ tal-kumpanniji transkonfinali ma jiġix intaxxat darbtejn - fil-pajjiż tal-kumpannija prinċipali tagħhom u f'dawk tas-sussidjarji tagħhom. Għaldaqstant hija kienet titlob li l-istati membri jeżentaw mit-tassazzjoni l-qligħ li l-kumpanniji prinċipali jirċievu mis-sussidjarji tagħhom li joperaw fi stati membri oħrajn.

L-emenda tindirizza b'mod speċifiku l-arranġamenti ta' self ibridu, li huma strumenti finanzjarji li għandhom karatteristiċi kemm ta' dejn kif ukoll ta' ekwità. Għal din ir-raġuni, f'xi stati membri dawn jitqiesu bħala self sempliċi, filwaqt li f'oħrajn jitqiesu bħala ekwità, u għaldaqstant jiġu ttrattati bħala li tista' titnaqqas it-taxxa minnhom jew li huma eżenti mit-taxxa skont il-liġi tat-taxxa tal-pajjiż.

Dawn id-differenzi jippermettu li l-kumpanniji transkonfinali jqassmu l-qligħ tagħhom skont dan u b'hekk jevitaw it-tassazzjoni fi kwalunkwe wieħed mill-istati membri.

Skont ir-regoli emendati, l-istat membru tal-kumpannija prinċipali ma tintaxxax il-qligħ mis-sussidjarju unikament sa fejn dan il-qligħ ma jistax jitnaqqas minn dan tal-aħħar.

Il-passi li jmiss

Wara d-diskussjoni, il-Presidenza ser tiżgura li l-esperti jkomplu jeżaminaw il-proposta kif meħtieġ.

Il-Presidenza biħsiebha tipprova tadotta d-direttiva emendata waqt il-laqgħa tal-Kunsill fl-20 ta' Ġunju.

Punti ewlenin oħra fuq l-aġenda

Taxxa fuq it-transazzjonijiet finanzjarji

Il-Kunsill iddiskuta l-introduzzjoni ta' taxxa fuq it-transazzjonijiet finanzjarji (TTF) fi 11-il stat membru li għażlu li jintroduċu t-taxxa permezz ta' proċedura ta' 'kooperazzjoni msaħħa'. Dawn il-pajjiżi huma l-Awstrija. il-Belġju, l-Estonja, Franza, il-Ġermanja, il-Greċja, l-Italja, il-Portugall, is-Slovakkja, is-Slovenja u Spanja.

Ir-regoli proposti jintroduċu fil-pajjiżi parteċipanti kollha rata ta' taxxa minima armonizzata ta' 0.1% għat-transazzjonijiet fit-tipi kollha ta' strumenti finanzjarji minbarra d-derivattivi, li għalihom tapplika rata ta' 0.01%.

Il-Presidenza tinnota li l-pajjiżi li jipparteċipaw kellhom il-ħsieb li jaħdmu fuq implimentazzjoni progressiva possibbli tat-taxxa fuq it-transazzjonijiet finanzjarji (TTF), u għall-bidu jiffokaw fuq it-tassazzjoni tal-ishma u d-derivattivi, sabiex josservaw l-impatt ekonomiku tagħha qabel ma jwessgħu l-ambitu tagħha.

Proċedura ta' żbilanċ makroekonomiku: reviżjonijiet fil-fond

Il-Kunsill iddiskuta r-riżultati tar-reviżjonijiet fil-fond tal-qagħda makroekonomika fi 17-il stat membru li saru mill-Kummissjoni skont il-proċedura ta' żbilanċ makroekonomiku.

Direttiva dwar l-irkupru u r-riżoluzzjoni tal-banek - adozzjoni

Il-Kunsill adotta d-direttiva li tistabbilixxi qafas għall-irkupru u r-riżoluzzjoni tal-banek. Il-Parlament Ewropew approva d-direttiva f'April ta' din is-sena.