Kunsill Affarijiet Ekonomiċi u Finanzjarji, 22/01/2019, 22 ta' Jannar 2019

Riżultati ewlenin

InvestEU

Il-Kunsill iddiskuta l-InvestEU, proposta li ġġib flimkien taħt programm wieħed l-istrumenti finanzjarji differenti attwalment disponibbli biex jappoġġaw l-investiment u joħolqu l-impjiegi fl-UE, fil-kuntest tal-qafas finanzjarju pluriennali li jmiss (2021-2027).

L-Ewropa teħtieġ aktar investimenti biex tappoġġa t-tkabbir u l-impjiegi. Il-programm InvestEU ser ikollu rwol sinifikanti billi jgħin fil-finanzjament ta' proġetti ta' infrastruttura ambizzjużi u estensivi. Jeħtieġ li niżguraw li kemm jista' jkun setturi u reġjuni fl-Ewropa jkunu jistgħu jibbenefikaw mill-programm. Eugen Teodorovici, ministru għall-finanzi tar-Rumanija, li bħalissa għandha l-presidenza tal-Kunsill

L-għan ta' InvestEU huwa li jħeġġeġ il-parteċipazzjoni ta' investituri pubbliċi u privati fi proġetti ta' investiment ġodda billi jipprovdi garanziji mill-baġit tal-UE. Il-programm huwa maħsub biex jappoġġa erba' oqsma ta' politika: l-infrastruttura sostenibbli; ir-riċerka, l-innovazzjoni u d-diġitalizzazzjoni; in-negozji żgħar u ta' daqs medju; l-investiment soċjali u l-ħiliet.

Il-ministri ffukaw id-diskussjoni tagħhom fuq żewġ kwistjonijiet ewlenin:

• l-istruttura ta' governanza ta' InvestEU, inkluż l-istabbiliment ta' bord ta' tmexxija u l-prinċipji gwida tiegħu
• il-garanzija finanzjarja pprovduta mill-UE lil sħab oħra minbarra l-BEI: 25% tal-garanzija tal-UE għandha tkun iddedikata għal istituzzjonijiet oħra minbarra l-BEI. Il-ministri ddiskutew il-prinċipji bażiċi tal-allokazzjoni ta' dik il-parti tal-garanzija.

Il-ministri impenjaw ruħhom li jmexxu 'l quddiem il-ħidma fuq dan il-fajl bħala kwistjoni prijoritarja abbażi tal-gwida ministerjali li rċevew illum.

• Nota ta' analiżi mill-Presidenza Rumena dwar l-InvestEU
• Paġna tal-Kummissjoni dwar il-programm InvestEU propost

Sistema Ewropea ta' superviżjoni finanzjarja

Il-ministri ddiskutew proposti biex jerġa' jiġi eżaminat il-funzjonament tas-sistema Ewropea attwali ta' superviżjoni finanzjarja. Il-Presidenza pproponiet li tingħata prijorità lid-dispożizzjonijiet marbuta mat-tisħiħ tas-superviżjoni kontra l-ħasil tal-flus u l-attivitajiet ta' finanzjament tat-terroriżmu, filwaqt li n-negozjati dwar il-bqija tar-rieżami tas-sistema Ewropea ser ikomplu kemm fil-livell tekniku kif ukoll f'dak politiku, bħala prijorità. Il-punt ser jidher fuq l-aġenda tal-ECOFIN ta' Frar.

Abbażi ta' din il-gwida ministerjali, il-Kunsill jinsab f'pożizzjoni li jibda n-negozjati mal-Parlament Ewropew, bil-għan li jintlaħaq qbil politiku dwar il-fajl sa tmiem il-leġislatura attwali.

• Pożizzjoni tal-Kunsill dwar is-setgħat tal-ABE għas-superviżjoni ta' attivitajiet ta' ħasil tal-flus (stqarrija għall-istampa, 19/12/2018)

Semestru Ewropew

Il-ministri adottaw konklużjonijiet dwar il-pakkett tas-"Semestru Ewropew" u approvaw abbozz ta’ rakkomandazzjoni dwar il-politiki ekonomiċi taż-żona tal-euro.

• Konklużjonijiet tal-Kunsill dwar l-istħarriġ annwali dwar it-tkabbir
• Konklużjonijiet tal-Kunsill dwar ir-rapport dwar il-mekkaniżmu ta' twissija
• Rakkomandazzjoni tal-Kunsill dwar il-politika ekonomika taż-żona tal-euro

Il-ministri ddiskutew ukoll l-implikazzjonijiet leġislattivi tal-iżvilupp ulterjuri tal-unjoni ekonomika u monetarja wara s-Summit taż-Żona tal-Euro tal-14 ta' Diċembru 2018, kif ukoll il-prijoritajiet tal-presidenza Rumena fil-qasam tal-affarijiet ekonomiċi u finanzjarji.