Kunsill Affarijiet Ekonomiċi u Finanzjarji, 06/11/2018, 6 ta' Novembru 2018

Riżultati ewlenin

Tassazzjoni diġitali

"Jeħtieġ nadattaw ir-regoli tagħna għat-trasformazzjoni diġitali tal-ekonomija u l-kumpaniji diġitali għandhom iħallsu sehemhom mit-taxxi kif xieraq. Il-Presidenza tixtieq tikseb riżultati konkreti sa tmiem din is-sena. Iż-żmien qed jagħfas, imma ninsab konvint li bir-rieda politika ġusta għandu jirnexxielna." Hartwig Löger, ministru għall-finanzi tal-Awstrija u president tal-Kunsill Ecofin

Il-ministri kellhom dibattitu ta' orjentazzjoni dwar il-proposta li tiġi stabbilita taxxa fuq is-servizzi diġitali. Id-diskussjoni kkonċentrat fuq żewġ kwistjonijiet ewlenin mill-proposta tal-Kummissjoni: l-ambitu tas-servizzi taxxabbli u l-kwistjoni tal-iskadenza tad-direttiva - l-hekk imsejħa "klawsola ta' estinzjoni".

Dwar il-klawsola ta' estinzjoni, l-istati membri kollha qablu li d-direttiva għandha tiskadi ladarba jkun hemm soluzzjoni komprensiva għat-tassazzjoni tal-ekonomija diġitali fil-livell tal-OECD.

Waqt li l-proposta ġiet diskussa bir-reqqa f'livell tekniku u nkiseb progress f'għadd ta' punti bħad-definizzjonijiet, il-ġbir tat-taxxa u l-kooperazzjoni amministrattiva, għad hemm differenzi bejn l-istati membri fuq diversi kwistjonijiet, fosthom l-ambitu preċiż tas-servizzi li jkunu soġġetti għat-taxxa futura.

Il-Presidenza kkonkludiet li ser issir aktar ħidma f'livell tekniku biex ikun jista' jintlaħaq qbil fil-laqgħa tal-Kunsill tal-4 ta' Diċembru.

Finanzjament għall-klima

Il-Kunsill adotta konklużjonijiet dwar l-aspetti finanzjarji tat-tibdil fil-klima qabel il-konferenza tal-partijiet (COP24) dwar it-tibdil fil-klima li ser issir f'Katowice (il-Polonja) mit-3 sal-14 ta' Diċembru.

Fl-abbozz il-konklużjonijiet jappellaw għal progress rapidu u ambizzjuż li jiżgura li l-flussi finanzjarji jirriflettu l-objettivi stabbiliti mill-ftehim ta' Pariġi. Huma jenfasizzaw l-importanza tal-ipprezzar tal-karbonju fit-tmexxija tal-flussi finanzjarji lejn investimenti ekoloġiċi u sostenibbli.

L-UE u l-istati membri tagħha huma impenjati li jżidu l-kontribut finanzjarju tagħhom sabiex jgħinu lill-pajjiżi li qed jiżviluppaw jimplimentaw il-ftehim ta' Pariġi. Għadhom l-ikbar kontributur ta' finanzjament pubbliku għall-klima, b'total ta' €20.4 biljun fl-2017.

• Konklużjonijiet tal-Kunsill dwar il-finanzjament għall-klima qabel il-konferenza COP24, 06/11/2018

Barra minn hekk, il-Kunsill:

• iddiskuta l-implimentazzjoni tal-baġit tal-UE fl-2017 abbażi tar-rapport tal-Qorti tal-Awdituri
• adotta direttiva li tippermetti l-allinjament tar-regoli tal-VAT għal pubblikazzjonijiet elettroniċi u fiżiċi. Minn issa 'l quddiem, l-istati membri ser ikunu jistgħu japplikaw rati ta' VAT imnaqqsa, imnaqqsa ħafna jew żero għall-pubblikazzjonijiet elettroniċi wkoll
• neħħa lin-Namibja mil-lista tal-UE ta' ġurisdizzjonijiet tat-taxxa li ma jikkooperawx
• adotta konklużjonijiet dwar l-istatistika tal-UE.

• Pubblikazzjonijiet elettroniċi: il-Kunsill jadotta riforma li tippermetti rati ta' VAT imnaqqsa (stqarrija għall-istampa, 06/11/2018)
• Konklużjonijiet tal-Kunsill dwar l-istatistika tal-UE, 06/11/2018