Kunsill Affarijiet Ekonomiċi u Finanzjarji, 04/12/2018, 4 ta' Diċembru 2018

Riżultati ewlenin

Unjoni Bankarja

Il-Kunsill approva r-riżultat tan-negozjati mal-Parlament Ewropew dwar ġabra ta' miżuri ta' tnaqqis tar-riskji ewlenin tal-hekk imsejjaħ "pakkett bankarju".

Illum ħadna pass importanti ħafna lejn it-tlestija tal-Unjoni Bankarja. Aħna qed inwettqu miżuri li jwasslu biex il-banek Ewropej isiru aktar b'saħħithom, aktar stabbli u aktar reżiljenti. Il-miżuri ser joħolqu l-kondizzjonijiet għal deċiżjonijiet ambizzjużi dwar ir-riforma taż-żona tal-euro. Hartwig Löger, ministru għall-finanzi tal-Awstrija, li bħalissa għandha l-presidenza tal-Kunsill

Il-miżuri jagħtu riżultati fuq tliet objettivi ewlenin stabbiliti mill-pjan direzzjonali tal-Kunsill dwar it-tlestija tal-unjoni bankarja maqbul f'Ġunju 2016:

• jistabbilixxu qafas imsaħħaħ għar-riżoluzzjoni tal-banek
• l-introduzzjoni tal-possibbiltà għall-awtoritajiet tar-riżoluzzjoni li jissospendu l-ħlasijiet tal-banek meta dawn ikunu taħt riżoluzzjoni
• it-tisħiħ tar-rekwiżiti tal-kapital tal-banek, bl-inklużjoni ta' proporzjon ta' ingranaġġ vinkolanti, proporzjon vinkolanti ta' finanzjar stabbli nett u l-istabbiliment ta' regoli sensittivi għar-riskju għal negozjar f'titoli u derivattivi.

L-approvazzjoni twitti t-triq għal iktar progress fil-kondiviżjoni tar-riskju fi ħdan l-unjoni bankarja tal-UE.

• Unjoni Bankarja: Il-Kunsill japprova l-pakkett ta' miżuri biex jitnaqqas ir-riskju (stqarrija għall-istampa, 04/12/2018)
• Unjoni bankarja - tnaqqis tar-riskju (informazzjoni ġenerali)

Il-Kummissjoni rrappurtat ukoll dwar il-ħidma biex jiġi implimentat il-pjan ta' azzjoni tal-Kunsill ta' Lulju 2017 dwar is-self improduttiv fis-settur bankarju. Ir-rapport juri li l-livelli ġenerali ta' self improduttiv naqsu minn kważi €1 triljun fl-aħħar tal-2016 għal €82 biljun skont l-aħħar ċifri. Il-proporzjon ta' self improduttiv fi proporzjon tas-self bankarju totali naqas minn 5.4 % f'Ġunju 2016 sa 3.4 %. Madankollu, il-proporzjonijiet ta' self improduttiv mhumiex l-istess madwar l-UE – ivarjaw minn 0.6 % sa 44.9 % – u l-progress bil-mod f'xi Stati Membri jibqa' sors ta' tħassib.

Fl-aħħar nett, il-Kunsill iddiskuta rapport li jivvaluta l-progress fid-diskussjonijiet tekniċi dwar l-iskema Ewropea ta' assigurazzjoni tad-depożiti.

• It-tielet rapport tal-Kummissjoni dwar it-tnaqqis ta' self improduttiv
• Novembru 2018 rapport ta' progress tal-Presidenza dwar l-EDIS

Tassazzjoni diġitali

Il-ministri kellhom dibattitu ta' orjentazzjoni pubbliku dwar il-proposta li tiġi stabbilita taxxa fuq is-servizzi diġitali.

Il-proposta, ippubblikata mill-Kummissjoni fil-21 ta' Marzu 2018, bħala parti minn "pakkett tat-tassazzjoni diġitali" hija maħsuba bħala soluzzjoni interim bil-għan li jiġu indirizzati l-aktar lakuni urġenti fit-tassazzjoni tal-attivitajiet diġitali, filwaqt li jiġu żgurati kondizzjonijiet ekwivalenti ta' kompetizzjoni għan-negozji kollha.

Wara analiżi bir-reqqa tal-kwistjonijiet tekniċi kollha, il-presidenza ppreżentat test ta' kompromess li fih l-elementi li għandhom l-aktar appoġġ mill-istati membri. Madankollu, f'dan l-istadju għadd ta' delegazzjonijiet ma jistgħux jaċċettaw it-test għal raġunijiet politiċi bħala kwistjoni ta' prinċipju, filwaqt li xi wħud oħrajn għadhom mhumiex sodisfatti b'xi punti speċifiċi fit-test. Dak it-test ma kisibx l-appoġġ meħtieġ u ma ġiex diskuss fid-dettall.

Il-ministri eżaminaw dikjarazzjoni konġunta mid-delegazzjoni Franċiża u dik Ġermaniża. Il-Presidenza rrakkomandat li l-grupp ta' ħidma tal-Kunsill ikompli l-ħidma tiegħu abbażi tal-aħħar test ta' kompromess tal-Presidenza u l-elementi proposti minn Franza u l-Ġermanja, bil-għan li jintlaħaq qbil malajr kemm jista' jkun.

• Novembru 2018 nota tal-presidenza dwar it-taxxa fuq is-servizzi diġitali
• Novembru 2018 test ta' kompromess tal-presidenza dwar it-taxxa fuq is-servizzi diġitali
• Dikjarazzjoni konġunta Franko-Ġermaniża dwar it-tassazzjoni ta' kumpaniji diġitali u t-tassazzjoni minima

Ġlieda kontra l-ħasil tal-flus

Il-Kunsill adotta konklużjonijiet dwar pjan ta' azzjoni biex jiġi miġġieled aħjar il-ħasil tal-flus u l-finanzjament tat-terroriżmu.

Il-konklużjonijiet jistabbilixxu għadd ta' azzjonijiet mhux leġislattivi fuq terminu qasir biex tissaħħaħ is-superviżjoni tal-attivitajiet kontra l-ħasil tal-flus u jinkoraġġixxu l-kooperazzjoni bejn l-awtoritajiet kompetenti.

• Ġlieda kontra l-ħasil tal-flus (informazzjoni ġenerali)
• Ħasil tal-flus: Il-Kunsill jadotta konklużjonijiet dwar pjan ta' azzjoni għal monitoraġġ imsaħħaħ (stqarrija għall-istampa, 04/12/2018)

Tassazzjoni

Il-Kunsill adotta tliet atti leġislattivi qosra bil-għan li jaġġusta wħud mir-regoli tal-UE dwar il-VAT biex jissolvew erba' problemi speċifiċi sakemm tiġi introdotta sistema ġdida tal-VAT.

• VAT: il-Kunsill jadotta soluzzjonijiet temporanji għas-sistema attwali tal-UE (stqarrija għall-istampa, 04/12/2018)

Il-ministri approvaw ukoll rapport lill-Kunsill Ewropew dwar kwistjonijiet ta' taxxa, kif ukoll rapport mill-Grupp dwar il-Kodiċi tal-Kondotta dwar it-tassazzjoni tal-intrapriżi, flimkien mal-konklużjonijiet tal-Kunsill, li jindirizzaw ukoll kooperazzjoni ma' ġurisdizzjonijiet barra l-UE.

• Novembru 2018 rapport lill-Kunsill Ewropew dwar kwistjonijiet ta' taxxa
• Novembru 2018 rapport tal-grupp dwar il-kodiċi tal-kondotta dwar it-tassazzjoni tal-intrapriżi

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Novembru 2018 abbozz ta' konklużjonijiet rigward il-kodiċi tal-kondotta dwar it-tassazzjoni tal-intrapriżi

Patt ta' Stabbiltà u Tkabbir

Il-Kunsill evalwa l-proċeduri ta' devjazzjoni sinifikanti li għaddejjin tal-Ungerija u r-Rumanija. Il-ministri ħarġu deċiżjonijiet li jikkonfermaw li ma ttieħdux azzjonijiet effettivi, kif ukoll rakkomandazzjonijiet ġodda dwar miżuri li għandhom jittieħdu biex jiġu korretti d-devjazzjonijiet.

Il-ministri bdew ukoll il-proċess annwali tas-"Semestru Ewropew" għall-monitoraġġ tal-politiki ekonomiċi, tal-impjiegi u fiskali tal-istati membri, abbażi ta' preżentazzjoni mill-Kummissjoni.