Summit tal-Euro, 25 ta' Ġunju 2021

Riżultati ewlenin

Il-kapijiet ta' stat u ta' gvern tal-UE ddiskutew l-isfidi ekonomiċi għaż-żona tal-euro wara l-kriżi tal-COVID-19 u eżaminaw il-progress dwar l-unjoni bankarja u l-unjoni tas-swieq kapitali mal-President tal-Bank Ċentrali Ewropew (BĊE), Christine Lagarde, u l-President tal-Grupp tal-Euro, Paschal Donohoe.

Rkupru ekonomiku

Il-mexxejja tal-UE esprimew l-importanza tar-rispons b'saħħtu, rapidu u koordinat tal-politika ekonomika tal-UE u l-istati membri tagħha, li ħejja t-triq għal irkupru robust, inklużiv u sostenibbli mill-kriżi tal-COVID-19.

Nilqgħu l-koordinazzjoni mill-qrib tal-politiki fiskali fiż-żona tal-euro li titkompla, mirfuda minn impenn lejn is-sostenibbiltà fiskali, bl-objettiv li l-irkupru jiġi stabbilit fis-sod u jiġu evitati l-effetti negattivi fit-tul tal-pandemija fuq is-soċjetajiet tagħna. Dikjarazzjoni mill-membri tas-Summit tal-Euro

• Pjan ta' rkupru għall-Ewropa (informazzjoni ġenerali)

Unjoni bankarja

Il-mexxejja tennew l-impenn sħiħ tagħhom għat-tlestija tal-unjoni bankarja u stiednu lill-Grupp tal-Euro f'format inklużiv biex jaqbel mingħajr dewmien dwar pjan ta' ħidma pass pass u marbut biż-żmien.

• Unjoni bankarja (informazzjoni ġenerali)

Unjoni tas-swieq kapitali

Il-mexxejja tal-UE ssottolinjaw l-appoġġ politiku tagħhom għall-unjoni tas-swieq kapitali (CMU) u appellaw għal implimentazzjoni rapida tal-pjan ta' azzjoni tas-CMU. Huma qablu li jeħtieġ jiġu identifikati u indirizzati l-isfidi strutturali għall-integrazzjoni u għall-iżvilupp tas-swieq kapitali, b'mod partikolari f'oqsma speċifiċi ta' liġijiet korporattivi dwar l-insolvenza.

Finanzjament ekoloġiku, inkluż standard ta' bonds ekoloġiċi, jista' jkun katalist għal CMU sħiħa. Dikjarazzjoni mill-membri tas-Summit tal-Euro

• Unjoni tas-swieq kapitali (informazzjoni ġenerali)

Fil-laqgħa tiegħu li jmiss f'Diċembru 2021, is-Summit tal-Euro ser jirrevedi l-progress dwar dawn il-kwistjonijiet kollha.