"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Kunsill Edukazzjoni, Żgħażagħ, Kultura u Sport

Kunsill Edukazzjoni, Żgħażagħ, Kultura u Sport, 29 u 30 ta' Novembru 2021

Riżultati ewlenin

Edukazzjoni u Żgħażagħ, 29 ta' Novembru

Spazji ċiviċi għaż-żgħażagħ

L-ispazji ċiviċi għaż-żgħażagħ - ambjenti bħal ċentri taż-żgħażagħ, assoċjazzjonijiet u assemblej taż-żgħażagħ li jippermettu l-parteċipazzjoni sinifikanti taż-żgħażagħ fis-soċjetà - jinsabu taħt pressjoni. Dan huwa parzjalment kaġun tal-pandemija tal-COVID-19 li matulha l-ispazji ċiviċi online spiss baqgħu l-unika alternattiva vijabbli. L-ispazji ċiviċi huma kruċjali biex iż-żgħażagħ ikunu jistgħu jipparteċipaw fit-teħid tad-deċiżjonijiet u jfasslu politiki li jaffettwawhom. Għalhekk, il-ministri għaż-żgħażagħ iddiskutew miżuri biex jiddefendu u jappoġġaw spazji ċiviċi għaż-żgħażagħ. Il-ministri esprimew ukoll tħassib dwar ir-rwol tal-għodod u l-fora diġitali li - għalkemm jippermettu liż-żgħażagħ jimmobilizzaw, iqajmu kuxjenza u jikkondividu l-informazzjoni - jinvolvu wkoll riskji bħall-intimidazzjoni, iċ-ċensura online u s-sorveljanza diġitali.

Simona Kustec, Ministru Sloven għall-Edukazzjoni, ix-Xjenza u l-Isport
Hija realtà kerha li l-ispazji ċiviċi għaż-żgħażagħ, ambjenti fejn jistgħu jinvolvu ruħhom mas-soċjetà, jinsabu taħt pressjoni. Jeħtieġ li nreġġgħu lura din it-tendenza minħabba li l-ispazji ċiviċi huma proprju fejn iż-żgħażagħ jistgħu jeżerċitaw id-drittijiet tagħhom tal-libertà ta' espressjoni, ta' assoċjazzjoni u ta' għaqda. Huwa għalhekk li llum qbilna li nappoġġaw l-organizzazzjonijiet fil-qasam taż-żgħażagħ u nilħqu aktar liż-żgħażagħ meta nfasslu l-politiki.
Simona Kustec, Ministru Sloven għall-Edukazzjoni, ix-Xjenza u l-Isport
Simona Kustec, Ministru Sloven għall-Edukazzjoni, ix-Xjenza u l-Isport

Il-Kunsill għandu approva wkoll konklużjonijiet dwar is-salvagwardja u l-ħolqien ta' spazji ċiviċi għaż-żgħażagħ li jiffaċilitaw il-parteċipazzjoni sinifikattiva taż-żgħażagħ. Il-Kunsill qed jistieden l-istati membri biex jippreservaw u jespandu l-ispazji ċiviċi għaż-żgħażagħ u biex idaħħlu miżuri fis-seħħ biex jiżguraw li ż-żgħażagħ minn ambjenti żvantaġġati u b'inqas opportunitajiet, b'mod partikolari dawk minn żoni remoti u rurali u dawk b'diżabbiltà, ikunu jistgħu jaċċessaw u jipparteċipaw f'dawn l-ispazji. L-istati membri u l-Kummissjoni huma mistiedna wkoll jżommu l-finanzjament strutturali għall-organizzazzjonijiet taż-żgħażagħ.

Tagħlim imħallat

Il-Kunsill adotta rakkomandazzjoni dwar approċċi ta' tagħlim imħallat biex jintlaħaq l-għan ta' edukazzjoni primarja u sekondarja ta' kwalità għolja u inklużiva. Matul il-pandemija, it-tagħlim mid-dar u t-tagħlim mill-bogħod saru realtà ġdida għal ħafna studenti, għalliema u ġenituri. Filwaqt li l-komunità tat-tagħlim uriet ħiliet innovattivi notevoli fl-adozzjoni ta' approċċi ġodda, għadd ta' sfidi, bħal konnettività insuffiċjenti u infrastruttura diġitali, saru evidenti wkoll. Abbażi tat-tagħlimiet mill-kriżi, ir-rakkomandazzjoni tressaq kemm miżuri fuq terminu qasir bħala rispons dirett għall-kriżi kif ukoll azzjonijiet fit-tul biex jiġu avvanzati approċċi ta' tagħlim imħallat.

Il-ministri approvaw ukoll riżoluzzjonijiet dwar aġenda Ewropea ġdida għat-tagħlim għall-adulti 2021-2030 u dwar l-istruttura ta' governanza tal-qafas strateġiku għall-kooperazzjoni Ewropea fl-edukazzjoni u t-taħriġ. Il-ministri għall-edukazzjoni kellhom dibattitu ta' orjentazzjoni dwar id-djalogu strutturat dwar l-edukazzjoni u l-ħiliet diġitali (imniedi mill-Kummissjoni f'Ottubru 2021).

Fis-sessjoni taż-żgħażagħ tagħhom, il-ministri approvaw riżoluzzjoni biex jiżguraw li l-eżiti tat-tmien ċiklu tad-Djalogu tal-UE maż-Żgħażagħ jiġu rikonoxxuti u segwiti mill-partijiet ikkonċernati rilevanti. Fir-rigward tal-Istrateġija tal-UE għaż-Żgħażagħ (2019-2021) huma approvaw konklużjonijiet dwar l-implimentazzjoni tagħha. B'ħarsa 'l quddiem huma approvaw riżoluzzjoni dwar il-Pjan ta' Ħidma tal-Istrateġija tal-UE għaż-Żgħażagħ 2022-2024.

Affarijiet oħra

Il-presidenza rrapportat dwar l-impatt tal-pandemija tal-COVID-19 fuq l-edukazzjoni u t-taħriġ u dwar dikjarazzjoni konġunta mill-ministri għall-edukazzjoni dwar is-sitwazzjoni li tirrigwarda d-dritt tan-nisa għall-edukazzjoni fl-Afganistan. Il-Belġju u l-Litwanja, f'isem il-pajjiżi tal-Benelux u l-Istati Baltiċi, infurmaw lill-ministri rigward it-Trattat dwar ir-rikonoxximent reċiproku awtomatiku ta' kwalifiki ta' edukazzjoni ogħla.

Il-presidenza pprovdiet ukoll informazzjoni dwar l-impatt tal-pandemija tal-COVID-19 fuq iż-żgħażagħ u infurmat lill-ministri dwar l-eżitu tad-diskussjoni fil-laqgħa tal-kolazzjon tal-Forum Informali taż-Żgħażagħ.

Id-delegazzjoni Franċiża rrapportat dwar il-programm ta' ħidma tal-presidenza li jmiss dwar l-edukazzjoni u ż-żgħażagħ.

Kultura, Settur Awdjoviżiv u Sport, 30 ta' Novembru 2021

Żieda fid-disponibbiltà u l-kompetittività ta' kontenut awdjoviżiv u tal-media Ewropew

Is-setturi awdjoviżivi u tal-media Ewropej sofrew ferm matul il-pandemija tal-COVID-19. Is-swali taċ-ċinema raw id-dħul tal-box office jonqos b'bejn 70% u 80% fl-2020. Fl-istess ħin, id-domanda għal abbonamenti online ta' servizzi ta' video-on-demand żdiedet sew.

Peress li d-disponibbiltà tal-kontenut awdjoviżiv u tal-media Ewropew hija fundamentali għas-saħħa tas-settur tal-media Ewropew, il-Kunsill approva konklużjonijiet biex jipprovdi linji gwida dwar kif jiġi ggarantit li l-kontenut Ewropew isir aktar disponibbli. L-azzjonijiet proposti jinkludu li tiġi mħeġġa disponibbiltà akbar ta' kontenut oriġinali f'verżjonijiet lingwistiċi differenti, il-promozzjoni ta' għodod ta' kummerċjalizzazzjoni u strateġiji ta' udjenza ċinematografika effiċjenti, it-titjib u l-iffaċilitar biex jinstab kontenut kreattiv online fil-lingwi kollha tal-UE u l-inkoraġġiment ta' żieda fil-volum ta' xogħlijiet awdjoviżivi Ewropej fil-katalgi on-demand.

Vasko Simoniti, Ministru Sloven għall-Kultura
Kuljum, iċ-ċittadini tal-UE jgawdu minn sensiliet, films u programmi televiżivi eċċellenti Ewropej. Madankollu, il-pandemija u xejriet oħra huma ta' piż kbir fuq is-settur awdjoviżiv u tal-media Ewropew. Huwa għalhekk li qbilna dwar miżuri biex tingħata spinta lis-settur u biex il-kontenut Ewropew minn pajjiżi differenti u b'lingwi differenti jkun aktar disponibbli.
Vasko Simoniti, Ministru Sloven għall-Kultura
Vasko Simoniti, Ministru Sloven għall-Kultura

Arkitettura ta' kwalità għolja u l-Bauhaus Ewropea l-Ġdida

Wara d-diskors dwar l-Istat tal-Unjoni mill-President Ursula von der Leyen f'Settembru, li fih sejħet l-inizjattiva Bauhaus Ewropea l-Ġdida (NEB) bħala "r-ruħ tal-Patt Ekoloġiku Ewropew", il-Kummissjoni ppubblikat komunikazzjoni dwar il-Bauhaus Ewropea l-Ġdida. L-NEB tirrappreżenta l-ambizzjoni tal-UE li toħloq postijiet, prodotti u modi ta' għajxien sbieħ, sostenibbli u inklużivi. L-NEB tippromwovi stil ta' ħajja ġdid fejn is-sostenibbiltà taqbel mal-istil biex b'hekk titħaffef it-tranżizzjoni ekoloġika f'diversi setturi tal-ekonomija tagħna bħall-kostruzzjoni, l-għamara, il-moda u s-soċjetajiet tagħna kif ukoll f'oqsma oħra tal-ħajja tagħna ta' kuljum.

Fil-konklużjonijiet tiegħu adottati llum, il-Kunsill jappella lil diversi persuni li jfasslu l-politika – kemm fil-livell lokali kif ukoll f'dak tal-UE – biex jintegraw l-NEB u l-prinċipji u l-approċċi tal-ekonomija ċirkolari fl-istrateġiji nazzjonali ta' żvilupp soċjoekonomiku u territorjali u biex jiffaċilitaw is-sinerġiji bejn l-oqsma ta' politika rilevanti u proċessi oħra bħall-Konferenza dwar il-Futur tal-Ewropa.

Mudell Ewropew tal-Isport

Il-Kunsill approva riżoluzzjoni dwar il-karatteristiċi ewlenin tal-Mudell Ewropew tal-Isport. Dawn il-karatteristiċi ewlenin jinkludu struttura piramidali, sport organizzat fi ħdan l-istrutturi nazzjonali u b'federazzjoni waħda għal kull sport, solidarjetà ma' livelli aktar baxxi tal-isport u l-promozzjoni ta' kompetizzjonijiet miftuħa. Il-Kunsill qed jistieden lill-istati membri biex jippromwovu l-valuri fl-isport u fl-organizzazzjonijiet tal-isport u qed jitlob lill-moviment sportiv biex jiżgura li l-organizzazzjoni tal-kompetizzjonijiet sportivi tikkonforma mal-prinċipju tal-aċċess miftuħ, tagħti prijorità lill-mertu sportiv u tirrispetta d-drittijiet fundamentali u tal-bniedem.

Fis-sessjoni sportiva tagħhom, il-ministri approvaw ukoll konklużjonijiet dwar l-attività fiżika tul il-ħajja u kellhom skambju ta' fehmiet dwar il-karrieri doppji tal-atleti.

Affarijiet oħra

Id-delegazzjoni Finlandiża rrappurtat dwar in-nomina ta' Oulu bħala l-Kapitali Ewropea tal-Kultura 2026. Id-delegazzjoni Spanjola infurmat lill-ministri dwar l-abbozzar ta' Green Book dwar il-ġestjoni sostenibbli tal-wirt kulturali. Il-Portugall ippreżenta ideat dwar it-triq 'il quddiem fir-rigward tal-istatus tal-professjonisti kulturali u kreattivi u l-azzjonijiet li jistgħu jittieħdu fil-livell nazzjonali. L-Italja ppreżentat id-dikjarazzjoni ministerjali kulturali tal-G20 u d-dikjarazzjoni ta' Ruma tal-ministri tal-kultura tal-G20. Ir-Rumanija ssuġġeriet li l-Kummissjoni tiġi mistiedna tippreżenta proposta leġiżlattiva biex l-2023 issir is-sena Ewropea għar-reżiljenza permezz tal-kultura.

Il-Kummissjoni rrappurtat dwar l-irkupru tas-settur tal-kultura wara l-pandemija tal-COVID-19 kif ukoll dwar il-gwida ta' finanzjament u l-għodda web CulturEU - opportunitajiet ta' finanzjament tal-UE għas-setturi kulturali u kreattivi 2021-2027.

Ir-rappreżentant tal-istati membri tal-UE tat-Triju ta' Presidenzi fil-kariga fil-Bord ta' Fondazzjoni tal-WADA informa lill-ministri dwar il-Kumitat Eżekuttiv u l-Bord ta' Fondazzjoni li saru fl-24 u l-25 ta' Novembru 2021. Il-presidenza infurmat lill-Kunsill dwar l-impatt tal-pandemija tal-COVID-19 fuq l-isport.

Id-delegazzjoni Franċiża pprovdiet informazzjoni rigward il-programm ta' ħidma dwar il-politiki tal-kultura, l-awdjoviżiv, il-media u l-isport tal-presidenza li jmiss.

 

The Council also adopted without discussion the items that figure in the list of non-legislative A items.

Dokumenti tal-laqgħat

Stqarrijiet għall-istampa

Tagħrif għall-istampa

Kuntatti għall-istampa

Jekk m'intix ġurnalist(a), jekk jogħġbok ibgħat it-talba tiegħek lis-servizz għall-informazzjoni tal-pubbliku.

Akkreditazzjoni u avvenimenti għall-istampa

Għal informazzjoni ġenerali dwar l-akkreditazzjoni, jekk jogħġbok żur din il-paġna.

L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.

Kompli segwina

Laqgħat oħra: Kunsill Edukazzjoni, Żgħażagħ, Kultura u Sport

Ara laqgħat oħrajn

L-aħħar reviżjoni: 14 ta' Jannar 2025