Vidjokonferenza informali tal-ministri għall-edukazzjoni, 16 ta' Marzu 2022

Riżultati ewlenin

Il-ministri Ewropej għall-edukazzjoni, fil-preżenza ta' Mariya Gabriel, il-Kummissarju Ewropew għall-Innovazzjoni, ir-Riċerka, il-Kultura, l-Edukazzjoni u ż-Żgħażagħ, attendew vidjokonferenza ppreseduta mill-Ministru Franċiż għall-Edukazzjoni Nazzjonali, Jean-Michel Blanquer, nhar l-Erbgħa 16 ta' Marzu sabiex isir skambju ta' fehmiet dwar kif l-Unjoni Ewropea tista' tipprovdi assistenza konkreta lill-istudenti, lill-għalliema u lill-persunal edukattiv tal-Ukrajna.

Mill-24 ta' Frar 'l hawn, aktar minn tliet miljun Ukren telqu mill-Ukrajna, nofshom tfal. Fid-dawl tal-influss ta' refuġjati, qed jingħata bidu għal rispons koordinat mill-ministri għall-edukazzjoni.

Fuq stedina tal-presidenza, il-Ministru għall-Edukazzjoni u x-Xjenza tal-Ukrajna, Sherhiy Shkarlet, fetaħ il-laqgħa.

Il-ministri Ewropej għall-edukazzjoni esprimew is-solidarjetà tagħhom mal-poplu Ukren u b'mod aktar speċifiku mat-tfal u l-persunal edukattiv kollu.

Filwaqt li ż-żona Ewropea tal-edukazzjoni qed tissaħħaħ, hemm bżonn li tiġi stabbilita koordinazzjoni Ewropea reali biex tippromwovi l-iskambju ta' prattiki tajba u b'hekk tipprovdi rispons konġunt għall-edukazzjoni tat-tfal Ukreni fl-UE.

Ħerqana li jrawmu r-rabta bejn dawn it-tfal u pajjiżhom, is-27 jixtiequ jipproponu soluzzjonijiet imfassla apposta b'kooperazzjoni mal-Kummissjoni Ewropea u l-Ministeru għall-Edukazzjoni tal-Ukrajna.

L-istati membri u l-Kummissjoni ddiskutew kooperazzjoni aktar mill-qrib fost l-awtoritajiet nazzjonali biex jikkoordinaw aħjar l-inizjattivi sabiex jibnu konnessjoni bejn il-ministeri kollha tal-UE malajr kemm jista' jkun.

• L-ewwel linja ta' ħidma: din tiffoka fuq il-qsim u l-ġbir flimkien ta' kontenut edukattiv diġitali biex tiġi ffaċilitata l-kontinwità tal-edukazzjoni fl-Ukrajna u fl-Unjoni Ewropea.
  
  
• It-tieni linja ta' ħidma: biex jiġi żgurat il-ġid tal-istudenti fl-iskola u jingħata appoġġ lill-għalliema li qed jieħdu r-responsabbiltà għalihom f'sitwazzjoni ta' kriżi, il-pajjiżi qablu wkoll dwar il-ħtieġa li jkun hemm arranġamenti komuni fis-seħħ biex jintlaqgħu l-istudenti Ukreni. Din il-linja ta' ħidma ser tkopri wkoll l-aħjar prattiki edukattivi biex tiġi indirizzata s-sitwazzjoni fil-klassi fl-Ukrajna.
  
  
• It-tielet linja ta' ħidma: bl-użu tal-esperjenza miksuba matul il-kriżi tas-saħħa f'termini ta' tagħlim mill-bogħod, l-istati membri ser ikunu jistgħu jaħdmu biex jagħmlu l-aħjar użu mill-pjattaformi eżistenti.

Il-programm eTwinning ser jintuża wkoll biex jgħin lill-għalliema.

Il-ministri ser jiltaqgħu fil-5 ta' April fil-Kunsill tal-ministri għall-edukazzjoni fil-Lussemburgu biex jiddiskutu kif jistgħu jkomplu jappoġġaw lill-Ukrajna b'mod kollettiv.