"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Kunsill Edukazzjoni, Żgħażagħ, Kultura u Sport

Kunsill Edukazzjoni, Żgħażagħ, Kultura u Sport, 17 u 18 ta' Mejju 2021

Riżultati ewlenin

Edukazzjoni u Żgħażagħ, 17 ta' Mejju

Ekwità, inklużjoni u suċċess fl-edukazzjoni u t-taħriġ għal kulħadd

Ekwità fl-aċċess, l-inklużjoni u s-suċċess għal kulħadd huma prinċipji bażiċi tal-edukazzjoni u t-taħriġ. Madankollu, l-ekwità u l-inklużjoni għadhom sfida għas-sistemi edukattivi tagħna, b'differenzi sinifikanti fl-istati membri u bejniethom. Peress li l-isfond soċjoekonomiku jibqa' fattur importanti li jinfluwenza l-eżiti edukattivi fl-Unjoni Ewropea, il-Kunsill approva konklużjonijiet dwar dan is-suġġett. L-għadd ta' dawk li jagħmlu progress insuffiċjenti u dawk li jitilqu kmieni mill-iskola għadu għoli fl-UE. 20.3% ta' dawk b'diżabbiltà jħallu l-edukazzjoni kmieni. Studenti b'inqas opportunitajiet għandhom aspettattivi aktar baxxi li jtemmu l-edukazzjoni terzjarja (43.4%) mill-pari tagħhom (82.3%). Il-konklużjonijiet jappellaw lill-istati membri u lill-Kummissjoni biex jaħdmu flimkien fuq politiki biex inaqqsu l-kisbiet baxxi, jgħollu l-livelli ta' kompetenza u jipprevjenu l-qgħad.

Tiago Brandão Rodrigues, Ministru għall-Edukazzjoni tal-Portugall
Sistemi ta' edukazzjoni u taħriġ inklużivi għandhom rwol fundamentali fit-tnaqqis ta' kisbiet baxxi, jgħollu l-livelli ta' kompetenza u jipprevjenu l-qgħad, fl-ispettru kollu tal-edukazzjoni u t-taħriġ u f'approċċ ta' istituzzjoni sħiħa, sabiex itejbu l-opportunitajiet indaqs u l-inklużjoni u jippromwovu s-suċċess edukattiv fil-livelli u t-tipi kollha ta' edukazzjoni u taħriġ. Jeħtieġ li nagħmlu aktar biex nidentifikaw miżuri ta' edukazzjoni u taħriġ li jistgħu jtejbu s-suċċess edukattiv għall-istudenti kollha. Mod wieħed hu li jiġi indirizzat in-nuqqas ta' għalliema, b'mod partikolari fl-edukazzjoni għal persuni bi bżonnijiet speċjali u f'kuntesti multikulturali u multilingwi.
Tiago Brandão Rodrigues, Ministru għall-Edukazzjoni tal-Portugall
Tiago Brandão Rodrigues, Ministru għall-Edukazzjoni tal-Portugall

Inizjattiva tal-Universitajiet Ewropej

Il-ministri approvaw konklużjonijiet dwar l-inizjattiva tal-Universitajiet Ewropej. L-inizjattiva tal-Universitajiet Ewropej hija pilastru fundamentali taż-Żona Ewropea tal-Edukazzjoni li għandha tinbena sal-2025. Il-Kunsill jistieden lill-istati membri biex jużaw il-mekkaniżmi ta' finanzjament kollha disponibbli biex jappoġġaw l-inizjattiva u jirrakkomanda aktar kooperazzjoni bejn l-awtoritajiet tal-edukazzjoni, l-istituzzjonijiet tal-edukazzjoni għolja u l-partijiet ikkonċernati sabiex jitneħħew l-ostakli għall-kooperazzjoni fil-livell Ewropew, filwaqt li jitqies li l-Universitajiet Ewropej jistgħu jkunu strumentali fil-bini ta' pontijiet importanti mal-approċċi tagħhom tar-riċerka u l-apprendiment u t-tagħlim ibbażati fuq l-isfidi, filwaqt li jinħolqu sinerġiji aktar b'saħħithom bejn id-dimensjoni tal-edukazzjoni għolja taż-Żona Ewropea tal-Edukazzjoni, iż-Żona Ewropea tar-Riċerka u ż-Żona Ewropea tal-Edukazzjoni Għolja.

Manuel Heitor, Ministru għax-Xjenza, it-Teknoloġija u l-Edukazzjoni Għolja tal-Portugall
Il-41 alleanza tal-Universitajiet Ewropej jinsabu fl-istadju bikri tal-iżvilupp tagħhom, iżda għandhom l-għan li jsiru l-universitajiet tal-futur, li jispiraw it-trasformazzjoni tal-edukazzjoni għolja fl-UE. M'għandniex dubju li l-kooperazzjoni bejn il-lingwi, il-fruntieri u d-dixxiplini ser tgħin biex tinkiseb il-viżjoni ambizzjuża ta' Żona Ewropea tal-Edukazzjoni u Żona Ewropea tar-Riċerka innovattivi, kompetittivi globalment u attraenti u biex jissaħħu l-valuri komuni Ewropej tagħna.
Manuel Heitor, Ministru għax-Xjenza, it-Teknoloġija u l-Edukazzjoni Għolja tal-Portugall
Manuel Heitor, Ministru għax-Xjenza, it-Teknoloġija u l-Edukazzjoni Għolja tal-Portugall

Xenarji li qed jevolvu għat-trasformazzjoni tal-edukazzjoni għolja tal-UE

B'segwitu għall-konklużjonijiet tal-Kunsill dwar l-inizjattiva tal-Universitajiet Ewropej, il-ministri kellhom dibattitu pubbliku ta' orjentazzjoni biex jisimgħu opinjonijiet u jiskambjaw ideat dwar il-futur tal-edukazzjoni għolja u, b'mod partikolari, dwar ir-rwol tal-istituzzjonijiet tal-edukazzjoni għolja bħala muturi tal-bidla lejn it-tranżizzjonijiet diġitali u ekoloġiċi. Id-dibattitu ġie inkwadrat minn tliet mistoqsijiet: jekk l-alleanzi tal-Universitajiet Ewropej għandhomx ikunu "bankijiet tat-test" għall-interoperabbiltà u l-kooperazzjoni bejn l-istati membri rigward l-iżvilupp tal-karrieri fir-riċerka u t-tagħlim fl-Ewropa; x'miżuri speċifiċi lesti jieħdu l-istati membri biex jippromwovu approċċ Ewropew għall-assigurazzjoni tal-kwalità għal lawrji konġunti; u jekk humiex qed iqisu li jadottaw leġiżlazzjoni nazzjonali li tippermetti mikrokredenzjali fl-edukazzjoni għolja.

Il-preservazzjoni tad-diversità tal-edukazzjoni għolja fl-Ewropa u l-promozzjoni ta' viżjoni u valuri Ewropej komuni għal identità Ewropea aktar b'saħħitha fost iż-żgħażagħ u ċ-ċittadini saret sfida unika għat-tfassil tal-politika fl-edukazzjoni għolja madwar l-Ewropa u jeħtieġ li tiġi indirizzata bħala parti mit-trasformazzjoni tal-edukazzjoni għolja tal-UE. Barra minn hekk, filwaqt li nżommu f'moħħna din it-trasformazzjoni, jeħtieġ li niggarantixxu li l-istudenti jkollhom il-ħiliet u l-kompetenzi meħtieġa u li niżguraw strateġiji integrati fit-tul għall-edukazzjoni, ir-riċerka u l-innovazzjoni, li jinvolvu lis-soċjetà b'mod ġenerali, sabiex jissaħħaħ il-panorama tal-għarfien madwar ir-reġjuni Ewropej u biex tingħata spinta lill-kwalità, l-attraenza u t-tisħiħ soċjetali tal-istituzzjonijiet Ewropej tal-edukazzjoni għolja. Manuel Heitor, Ministru għax-Xjenza, it-Teknoloġija u l-Edukazzjoni Għolja tal-Portugall

Is-sehem taż-żgħażagħ fil-proċessi ta' teħid ta' deċiżjonijiet

Minkejja li ż-żgħażagħ huma attivi ħafna fil-ħajja demokratika, spiss ikollhom inqas opportunitajiet biex jipparteċipaw u mhumiex rappreżentati biżżejjed fit-teħid ta' deċiżjonijiet. Peress li huma affettwati mill-aġenda politika kollha, l-impenn u l-involviment tagħhom biex jinstabu tweġibiet għall-isfidi tal-lum huma essenzjali.

Illum il-Kunsill approva konklużjonijiet dwar it-tisħiħ tal-governanza f'diversi livelli fil-promozzjoni tas-sehem taż-żgħażagħ fi proċessi ta' teħid ta' deċiżjonijiet. L-għan ta' dawn il-konklużjonijiet huwa li jiżguraw li ż-żgħażagħ kollha jkollhom opportunitajiet indaqs għall-parteċipazzjoni, l-involviment u l-awtonomizzazzjoni fil-proċessi rilevanti tat-teħid ta' deċiżjonijiet.

Iż-żgħażagħ huma fost dawk li ntlaqtu l-agħar mir-restrizzjonijiet tal-COVID-19. Is-sehem tagħhom fit-tfassil tal-politika huwa essenzjali peress li d-deċiżjonijiet tal-lum ser ikollhom impatt fuq il-futur tagħhom. Huwa għalhekk li għandna nappoġġaw l-istrutturi attivi u sostenibbli għall-parteċipazzjoni taż-żgħażagħ fl-iżvilupp tal-politiki. Tiago Brandão Rodrigues, Ministru għall-Edukazzjoni tal-Portugall

Approċċ ibbażat fuq id-drittijiet għall-politiki dwar iż-żgħażagħ: L-ispinta għal impenn fil-futur?

Fit-tranżizzjoni tagħhom għall-ħajja adulta, iż-żgħażagħ jiffaċċaw sfidi speċifiċi li jpoġġuhom f'pożizzjoni ta' vulnerabbiltà. Dan jirriżulta fi ħtieġa li jittejjeb l-aċċess taż-żgħażagħ għad-drittijiet u għandu jiġi rifless f'politika taż-żgħażagħ ibbażata fuq id-drittijiet tal-bniedem. Il-ministri kellhom dibattitu pubbliku dwar kif l-awtoritajiet, fil-livelli kollha, jistgħu jinvolvu, jikkollegaw u jagħtu awtonomija liż-żgħażagħ.

Affarijiet oħra

  • Il-presidenza rrapportat dwar l-impatt attwali tal-COVID-19 fuq l-edukazzjoni u t-taħriġ u fuq iż-żgħażagħ.
  • Il-presidenza Slovena li jmiss ippreżentat il-programm ta' ħidma tagħha.

Kultura, Settur Awdjoviżiv u Sport, 18 ta' Mejju

L-irkupru, ir-reżiljenza u s-sostenibbiltà tas-setturi kulturali u kreattivi

Il-kultura għandha rwol kruċjali għall-identità Ewropea u għandha impatt soċjali u ekonomiku importanti. Il-Kunsill approva konklużjonijiet li jiddikjaraw mill-ġdid li s-setturi kulturali u kreattivi huma fost l-aktar milquta mill-pandemija tal-COVID-19 u li hemm il-ħtieġa li jittieħdu azzjonijiet ta' politika deċiżivi biex jappoġġawhom, kemm bħala rispons immedjat kif ukoll bħala approċċ aktar ambizzjuż u orjentat lejn il-futur, peress li l-kriżi attwali kixfet xi sfidi strutturali u vulnerabbiltajiet diġà eżistenti tas-setturi kulturali u kreattivi. Sabiex jiġu promossi l-irkupru, ir-reżiljenza u s-sostenibbiltà tas-setturi kulturali u kreattivi, il-konklużjonijiet jidentifikaw sitt prijoritajiet, jiġifieri: it-titjib tal-aċċess għall-finanzjament disponibbli; it-tisħiħ tar-reżiljenza tal-professjonisti fis-setturi kulturali u kreattivi; it-tisħiħ ulterjuri tal-mobilità u l-kooperazzjoni; it-tħaffif tat-tranżizzjonijiet diġitali u ekoloġiċi; it-titjib tal-għarfien u t-tħejjija għall-isfidi futuri; u l-kunsiderazzjoni tax-xeni kulturali u l-komunitajiet lokali. Il-konklużjonijiet tal-Kunsill għandhom ukoll l-għan li jippromwovu l-ġustizzja u l-ugwaljanza għal kulħadd, filwaqt li jagħtu attenzjoni speċjali lis-sitwazzjoni tal-artisti u l-professjonisti kulturali nisa. Il-Kunsill jistieden lill-istati membri u lill-Kummissjoni jiskambjaw fehmiet dwar l-aħjar prattiki u jevalwaw dawn il-konklużjonijiet sal-2023.

Graça Fonseca, Ministru għall-Kultura tal-Portugall
Is-swali taċ-ċinema, it-teatri u l-festivals tal-mużika kienu fost l-ewwel li ngħalqu meta bdiet il-pandemija u huma fost l-aħħar li reġgħu nfetħu hekk kif qed nirkupraw mill-agħar kriżijiet f'għexieren ta' snin. Jeħtieġ li niżguraw li s-setturi kreattivi u kulturali joħorġu mill-pandemija, lesti għall-futur.
Graça Fonseca, Ministru għall-Kultura tal-Portugall
Graça Fonseca, Ministru għall-Kultura tal-Portugall

Il-Midja tal-Ewropa fid-Deċennju Diġitali

Il-Kunsill approva konklużjonijiet biex jappoġġa l-irkupru u t-trasformazzjoni tas-setturi Ewropej tal-midjaa tal-aħbarijiet u awdjoviżivi. Peress li ż-żewġ setturi ġarrbu telf kbir minħabba l-pandemija tal-COVID-19, l-istati membri huma mistiedna jieħdu vantaġġ mill-Faċilità għall-Irkupru u r-Reżiljenza, li hija l-istrument finanzjarju tal-UE ta' wara l-kriżi, u jinvestu fl-aċċellerazzjoni tat-trasformazzjoni diġitali u t-tranżizzjoni ekoloġika ta' dawn is-setturi.

Il-konklużjonijiet tal-Kunsill huma reazzjoni għall-pjan ta' azzjoni ppreżentat mill-Kummissjoni f'Diċembru li għadda. Wasal iż-żmien għal proċess ta' riflessjoni dwar għadd ta' suġġetti fundamentali li issa nistgħu nħarsu lejhom minn perspettiva ġdida. Nafu li dan il-vjaġġ ser ikollna nikkunsidraw mill-ġdid il-mudelli kummerċjali tradizzjonali, nagħtu spinta lill-kompetittività tagħna lokalment u internazzjonalment u nirkbu b'ħila l-mewġa ekoloġika u diġitali. Iżda ser ifisser ukoll li nagħmlu l-aħjar użu mill-assi Ewropej tagħna: ir-rikkezza kulturali, id-diversità u l-kreattività. Graça Fonseca, Ministru għall-Kultura tal-Portugall

Diversifikazzjoni tas-sorsi u l-mekkaniżmi ta' finanzjament għas-salvagwardja u l-protezzjoni tal-wirt kulturali Ewropew

Il-wirt kulturali tal-Ewropa huwa ben pubbliku b'valur soċjali u ekonomiku importanti. Madankollu, il-protezzjoni tiegħu hija mhedda minħabba pressjoni baġitarja, u dan ġie aggravat mill-kriżi tal-COVID-19. Il-ministri ddiskutew kif l-aħjar jiġi appoġġat finanzjarjament il-wirt kulturali Ewropew, fejn jinstabu sorsi ġodda ta' finanzjament u liema jkunu l-aħjar passi fit-tul.

Innovazzjoni fl-isport

Il-Kunsill approva konklużjonijiet dwar l-innovazzjoni fl-isport. Il-Kunsill jistieden lill-istati membri biex jippromwovu u jappoġġaw inizjattivi u proġetti ta' riċerka u żvilupp fil-qasam tal-innovazzjoni fl-isport, joħolqu u jxerrdu l-għarfien, u jipprovdu għodod għal żvilupp aħjar tal-politika u valutazzjoni komparattiva tal-innovazzjoni fl-isport.

Madwar żewġ terzi tat-tkabbir ekonomiku tal-Ewropa f'dawn l-aħħar deċennji kien xprunat mill-innovazzjoni. L-innovazzjoni fl-isport tista' tgħin biex tiżdied il-parteċipazzjoni taċ-ċittadini fl-isport u l-attività fiżika iżda hija wkoll għodda biex tipproteġi l-integrità tal-isport u tindirizza sfidi bħal-logħob mixtri u d-doping. Tiago Brandão Rodrigues, Ministru għall-Edukazzjoni tal-Portugall

Id-diplomazija bl-isport

Id-diplomazija bl-isport hija kunċett relattivament ġdid fil-livell tal-UE. Fl-istess ħin, l-isport minn dejjem intuża biex iwassal messaġġi politiċi u huwa parti mis-sett ta' għodod diplomatiċi tal-kontropartijiet globali tal-UE. Il-ministri tal-UE ddiskutew jekk id-diplomazija kulturali u edukattiva tal-UE toffrix pjan ta' azzjoni għall-iżvilupp ta' strateġija tal-UE għad-diplomazija bl-isport u x'għandhom ikunu l-passi li jmiss f'dan ir-rigward.

Affarijiet oħra

  • Il-presidenza rrapportat dwar l-impatt attwali tal-COVID-19 fuq l-isport
  • Il-presidenza Slovena li jmiss ippreżentat il-programmi ta' ħidma tagħha għall-kultura/affarijiet awdjoviżivi u l-isport
  • Il-presidenza rrapportat dwar il-konferenzi tal-presidenza dwar il-kultura u l-mia
  • Ir-rappreżentant tal-istati membri tal-UE tat-triju ta' presidenzi fil-kariga fil-Bord ta' Fondazzjoni tal-WADA informa lill-ministri dwar il-laqgħa tal-Kumitat Eżekuttiv tal-WADA u tal-Bord ta' Fondazzjoni
  • Id-delegazzjoni Spanjola indirizzat l-impatt tal-pjattaformi video-on-demand (VOD) fuq is-suq awdjoviżiv tal-UE, b'mod partikolari fuq ir-relazzjoni bejn l-atturi differenti fil-katina tal-valur
  • Id-delegazzjoni Ġermaniża pprovdiet informazzjoni dwar il-perspettiva tal-politika kulturali fin-negozjati li jemendaw id-Direttiva tal-VAT, speċjalment meta tiġi kkunsidrata t-tassazzjoni tal-kummerċ tal-arti
  • Id-delegazzjoni Slovena rrapportat dwar il-ħatra tal-Kapitali Ewropea tal-Kultura għall-2025
  • Il-Kummissjoni pprovdiet informazzjoni dwar l-inizjattiva ''Stil ta' Ħajja Tajjeb għas-Saħħa għal Kulħadd'' li hija ppjanata li titnieda f'Settembru 2021

Dokumenti tal-laqgħat

Dokumenti ta' tħejjija

Dokumenti ta' eżitu

Stqarrijiet għall-istampa

Tagħrif għall-istampa

Kuntatti għall-istampa

Jekk m'intix ġurnalist(a), jekk jogħġbok ibgħat it-talba tiegħek lis-servizz għall-informazzjoni tal-pubbliku.

Akkreditazzjoni u avvenimenti għall-istampa

Għal informazzjoni ġenerali dwar l-akkreditazzjoni, jekk jogħġbok żur din il-paġna.

L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.

Kompli segwina

Laqgħat oħra: Kunsill Edukazzjoni, Żgħażagħ, Kultura u Sport

Ara laqgħat oħrajn

L-aħħar reviżjoni: 14 ta' Jannar 2025