Kunsill Affarijiet Barranin, 06/02/2017, 6 ta' Frar 2017

Riżultati ewlenin

Fil-ġimgħat li ġejjin ser ikollna skambji intensivi mal-kontropartijiet tagħna mill-Istati Uniti. Id-diskussjonijiet tal-lum, b'mod partikolari dawk dwar l-Ukrajna u l-Proċess ta' Paċi tal-Lvant Nofsani, kienu utli ħafna biex tiġi evalwata l-pożizzjoni tal-UE, li hi magħquda, u li għandha pożizzjonijiet ċari ħafna.

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Libja

Il-Kunsill iddiskuta s-sitwazzjoni politika fil-Libja. Il-ministri għall-affarijiet barranin tal-UE reġgħu affermaw l-importanza li l-Libja terġa' tikseb l-istabbiltà permezz ta' soluzzjoni politika inklużiva taħt il-qafas tal-ftehim politiku Libjan. Huma enfasizzaw ir-rwol importanti li jista' jkollhom l-atturi u l-organizzazzjonijiet reġjonali f'dan ir-rigward. L-UE ser tingħaqad man-Nazzjonijiet Uniti, il-Lega tal-Istati Għarab u l-Unjoni Afrikana biex jifformaw Kwartett li jlaqqa' l-isforzi ta' medjazzjoni. L-istabbiltà u l-paċi fil-Libja mhumiex biss importanti għall-ġirien tagħha - inkluż l-UE, iżda għal-Libjani stess, kif ukoll għall-migranti li jinsabu fil-Libja bħalissa. Il-Kunsill adotta konklużjonijiet dwar il-Libja.

• Konklużjonijiet tal-Kunsill dwar il-Libja
• Laqgħa Informali f'Malta tal-kapijiet ta' stat jew ta' gvern tal-UE, 3 ta' Frar 2017

Proċess ta' paċi fil-Lvant Nofsani

Il-Kunsill iddiskuta l-proċess ta' paċi fil-Lvant Nofsani fid-dawl tal-iżviluppi l-iktar reċenti. Il-ministri tennew it-tħassib tagħhom dwar l-insedjamenti l-ġodda mħabbra mill-Iżrael u appellaw liż-żewġ naħat biex jibqgħu lura milli jieħdu kwalunkwe miżura li tista' tirriżulta f'eskalazzjoni tal-konflitt. L-UE reġgħet affermat l-impenn sħiħ tagħha li taħdem biex tikseb ftehim ta' paċi komprensiv, biex tippreserva l-vijabbiltà tas-soluzzjoni ta' żewġ stati u biex taqleb għall-aħjar ix-xejriet negattivi attwali fil-post. Ir-Rappreżentant Għoli stqarret li l-UE tinsab lesta biex tkompli taħdem man-NU, l-Istati Uniti u mas-sħab Għarab biex tikseb dawn l-għanijiet.

L-Ukrajna

Il-Kunsill reġa' eżamina s-sitwazzjoni fl-Ukrajna. Il-Kunsill esprima l-impenn qawwi li ħa biex jappoġġa l-aġenda ta' riforma Ukrena, permezz ta' appoġġ finanzjarju kontinwu u sinifikanti, kif ukoll permezz tal-Missjoni ta' Konsulenza tal-UE (EUAM Ukraine). Il-ministri ssottolinjaw li l-Ukrajna ħadet passi pożittivi importanti f'bosta oqsma, b'mod partikolari fl-iżvilupp soċjoekonomiku u l-ġlieda kontra l-korruzzjoni. Il-Kunsill ħeġġeġ l-implimentazzjoni sħiħa ta' dawn ir-riformi kif ukoll li jsir aktar progress f'oqsma bħalma huma r-riforma kostituzzjonali, ġudizzjarja u elettorali, l-amministrazzjoni pubblika u s-settur tal-enerġija.

Fid-dawl tal-fatt li dan l-aħħar reġgħet żdiedet il-vjolenza fil-Lvant tal-Ukrajna, il-ministri għall-affarijiet barranin stqarrew it-tħassbin tagħhom, b'mod partikolari fir-rigward tas-sitwazzjoni umanitarja. Huma ddiskutew kif jistgħu jżidu l-appoġġ tal-UE għall-implimentazzjoni tal-ftehimiet ta' Minsk. Il-Kunsill tenna l-appoġġ tal-UE għad-diskussjonijiet fil-qafas tal-format tan-Normandija u għaraf il-ħidma importanti li saret mill-missjoni speċjali tal-OSKE ta' monitoraġġ fl-Ukrajna.

L-Eġittu

Waqt l-ikla ta' nofsinhar, il-ministri ddiskutew is-sitwazzjoni fl-Eġittu u t-triq 'il quddiem għar-relazzjonijiet bilaterali. Huma indirizzaw aktar speċifikament l-appoġġ tal-UE għat-tkabbir ekonomiku u l-ħolqien tal-impjiegi, id-djalogu, id-demokrazija, l-istat tad-dritt u d-drittijiet tal-bniedem, il-kooperazzjoni f'oqsma bħalma huma l-ġlieda kontra t-terroriżmu u l-migrazzjoni u r-rwol tal-Eġittu fir-reġjun. Id-diskussjoni ħejjiet għal-laqgħa li jmiss tal-Kunsill Affarijiet Barranin, li għaliha ser jiġi mistieden għal diskussjoni informali mal-ministri tal-UE, il-Ministru għall-Affarijiet Barranin tal-Eġittu, Sameh Hassan Shoukry.