Kunsill Affarijiet Barranin, 16/01/2017, 16 ta' Jannar 2017

Riżultati ewlenin

"Bdejna l-ewwel Kunsill tas-sena b’diskussjonijiet dwar is-Sirja u l-Proċess ta’ Paċi fil-Lvant Nofsani. Jiena nemmen bis-sħiħ li d-diplomazija taħdem u li tista' tagħti riżultati, u ser inkompli naħdem f’din id-direzzjoni fl-2017 u lil hinn."

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Sirja

Il-Kunsill iddiskuta l-iżviluppi fis-Sirja, għall-ewwel darba minn mindu ġie mħabbar ftehim għall-waqfien tal-ostilitajiet. Fid-diskussjoni tagħhom, il-ministri laqgħu l-ftehim innegozjat u ggarantit mir-Russja u t-Turkija. Huma esprimew it-tama li dan jista' jiġi implimentat b’mod sħiħ mill-partijiet kollha għall-konflitt.

Il-ministri affermaw mill-ġdid l-appoġġ sħiħ tal-UE għall-proċess immexxi min-NU u lill-Mibgħut Speċjali tan-NU Staffan de Mistura. Huma nnutaw li l-laqgħa prevista f’Astana fit-23 ta’ Jannar, jekk tkun kompletament inklużiva, tista’ tikkontribwixxi għat-tkomplija b’suċċess tat-taħditiet intra-Sirjani f’Ġinevra taħt l-awspiċji tan-NU, previsti għat-8 ta’ Frar 2017. Il-ministri fakkru fil-ħtieġa li jkun żgurat aċċess u protezzjoni umanitarju sħiħ fil-pajjiż kollu.

Il-Kunsill tenna wkoll l-appoġġ tiegħu għall-inizjattiva reġjonali tal-UE dwar il-futur tas-Sirja. Din l-inizjattiva għandha l-għan li ssib bażi komuni għall-arranġamenti ta’ wara l-konflitt fis-Sirja kif ukoll ir-rikonċiljazzjoni u r-rikostruzzjoni ladarba tinsab għaddejja sew it-tranżizzjoni politika kredibbli, u b’koordinazzjoni mal-isforzi tan-NU u appoġġ sħiħ għalihom. Ir-Rappreżentant Għoli informat lill-ministri dwar l-aħħar ċiklu ta’ diskussjonijiet li saru f’dan il-qafas mal-parteċipanti reġjonali ewlenin: L-Eġittu, l-Iran, il-Ġordan, il-Libanu, l-Emirati Għarab Magħquda, l-Arabja Sawdija u dalwaqt it-Turkija u l-Qatar.

Il-Kunsill qabel li l-UE ser tospita konferenza dwar is-Sirja u r-reġjun fi Brussell fir-rebbiegħa tal-2017, bħala segwitu tal-konferenza ta’ Londra li saret fi Frar 2016. Il-konferenza mistennija tiffoka fuq tliet oqsma:

• il-proċess politiku lejn tranżizzjoni, b’mod partikolari biex jittieħed kont tas-sitwazzjoni attwali tat-taħditiet tan-NU f’Ġinevra;
• il-ħidma umanitarja u l-appoġġ għar-reżiljenza u l-istabbilizzazzjoni, biex jittieħed kont tal-implimentazzjoni tal-impenji ta’ Londra u jiġu identifikati n-nuqqasijiet possibbli u kif dawn jiġu indirizzati, inkluż permezz ta’ wegħdiet ġodda possibbli;
• l-appoġġ possibbli għar-rikostruzzjoni u r-rikonċiljazzjoni ta’ wara l-konflitt ladarba tinsab għaddejja sew it-tranżizzjoni politika kredibbli.

Id-diskussjoni ministerjali ser tikkontribwixxi għat-tħejjija tal-komunikazzjoni konġunta li jmiss mir-Rappreżentant Għoli u l-Kummissjoni Ewropea dwar l-istrateġija tal-UE dwar is-Sirja, li hija ppjanata li tiġi ppreżentata lill-ministri tal-UE sa April 2017.

Proċess ta' paċi fil-Lvant Nofsani

Waqt l-ikla ta' nofsinhar, il-ministri ddiskutew il-proċess ta' paċi fil-Lvant Nofsani. Filwaqt li bnew fuq l-eżitu tal-konferenza internazzjonali li saret f’Pariġi fil-15 ta’ Jannar, il-ministri ddiskutew modi biex jintlaħaq ftehim ta’ paċi komprensiv, tiġi ppreservata l-vijabbiltà tas-soluzzjoni ta’ żewġ stati u jitreġġgħu lura x-xejriet negattivi li hemm bħalissa fuq il-post.

• Proċess ta’ paċi fil-Lvant Nofsani (is-sit web tas-SEAE)

Din kienet l-ewwel laqgħa tal-Kunsill li saret fil-bini Ewropa l-ġdid, li f’Jannar ta' din is-sena sar is-sede prinċipali tal-Kunsill Ewropew u tal-Kunsill tal-UE.

• Il-bini Europa