Kunsill Affarijiet Barranin, 15/05/2017, 15 ta' Mejju 2017

Riżultati ewlenin

Afrika

L-enfasi llum kienet fuq l-Afrika. Ir-relazzjoni tagħna qed tinbidel minn approċċ tradizzjonali ta' għajnuna għal sħubija vera fl-oqsma kollha, mit-tibdil fil-klima, is-sigurtà, l-iżvilupp ekonomiku, il-migrazzjoni u l-għajnuna umanitarja. Dawn id-diskussjonijiet ser jgħinuna nħejju s-Summit bejn l-Afrika u l-UE f’Novembru, li ser jikkonċentra fuq iż-żgħażagħ u fuq kif nistgħu noffru opportunitajiet liż-żgħażagħ fl-Ewropa u b’mod partikolari fl-Afrika. Dan huwa l-aħjar mod kif tiġi ġestita l-migrazzjoni. Dan huwa wkoll l-aħjar mod kif tiġi evitata r-radikalizzazzjoni.

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri għall-affarijiet barranin iddiskutew is-sitwazzjoni fil-Qarn tal-Afrika, reġjun li qed jiffaċċa destabbilizzazzjoni, b’mod partikolari fis-Somalja u s-Sudan t’Isfel. Id-diskussjoni ffokat fuq l-isfidi politiċi u fil-qasam tas-sigurtà, inklużi l-implikazzjonijiet tas-sitwazzjoni fir-reġjun b'mod ġenerali. Il-ministri ssottolinjaw l-importanza strateġika tal-involviment tal-UE permezz ta’ preżenza politika qawwija u kontribut kontinwu għall-paċi u s-sigurtà, inkluż permezz tal-missjonijiet u l-operazzjoni eżistenti tal-PSDK. Dan l-impenn jinżdied mal-iżvilupp u l-għajnuna umanitarji sinifikanti pprovduti mill-UE u l-Istati Membri tagħha li għadhom meħtieġa ferm fid-dawl tal-fatt li hemm 13-il miljun ruħ li qed jiffaċċaw sitwazzjoni serja ta' ġuħ u 650 000 ruħ jinsabu spostati internament fir-reġjun. Il-ministri għall-iżvilupp ser ikomplu jiddiskutu s-sitwazzjoni umanitarja waqt laqgħa tal-Kunsill nhar il-Ġimgħa (19 ta’ Mejju).

Il-Kunsill kellu wkoll dibattitu aktar ġenerali dwar ir-relazzjonijiet bejn l-Afrika u l-UE. Il-ministri għall-affarijiet barranin laqgħu il-komunikazzjoni konġunta mir-Rappreżentant Għoli u l-Kummissjoni għal impetu mġedded tas-Sħubija bejn l-Afrika u l-UE. Id-diskussjoni ser tikkontribwixxi għat-tħejjija tas-Summit bejn l-UE u l-Afrika li ser isir f’Novembru, u li ser jiffoka fuq iż-żgħażagħ. F’dan il-kuntest, il-ministri enfasizzaw l-importanza tal-ħolqien tal-impjiegi inkluż billi tiġi żgurata klima favorevoli għall-kummerċ u l-investiment privat, u tal-promozzjoni tal-inklużjoni soċjali u politika taż-żgħażagħ fl-Afrika.

Il-ministri għall-affarijiet barranin imbagħad iddiskutew kif tista' tissaħħaħ il-kooperazzjoni mal-Unjoni Afrikana fir-rigward tal-ħafna sfidi li qed jiffaċċaw iż-żewġ kontinenti ma’ Moussa Faki Mahahat, il-President tal-Kummissjoni tal-Unjoni Afrikana.

• Komunikazzjoni konġunta lill-Parlament Ewropew u lill-Kunsill għal spinta ġdida għas-sħubija UE-Afrika
• Relazzjonijiet bejn l-UE u l-Afrika (informazzjoni ġenerali)

Venezwela

Fid-dawl tal-iżviluppi inkwetanti reċenti fil-pajjiż, il-Kunsill adotta konklużjonijiet dwar il-Venezwela.

• Konklużjonijiet tal-Kunsill dwar il-Venezwela, 15 ta' Mejju 2017

Sħubija tal-Lvant

Il-Kunsill kellu wkoll skambju ta' fehmiet dwar is-Sħubija tal-Lvant (SL), qabel il-laqgħa ministerjali tas-SL li ser issir fid-19 ta’ Ġunju fil-Lussemburgu u qabel is-Summit tas-SL previst għall-24 ta’ Novembru fi Brussell.

Il-ministri tennew l-importanza kruċjali tas-Sħubija tal-Lvant għall-Unjoni Ewropea. Enfasizzaw l-unità tagħhom f'appoġġ għar-reġjun u għal kull wieħed mill-pajjiżi tas-Sħubija tal-Lvant (l-Armenja, l-Ażerbajġan, il-Belarussja, il-Georgia, ir-Repubblika tal-Moldova u l-Ukrajna) b’mod individwali. Huma enfasizzaw ukoll id-determinazzjoni tagħhom li jinkisbu riżultati konkreti għall-benefiċċju taċ-ċittadini, kemm fl-UE kif ukoll fil-pajjiżi tas-Sħubija tal-Lvant. F’dan il-kuntest, huma laqgħu l-progress fil-liberalizzazzjoni tal-viża għall-Georgia u l-Ukrajna u ssottolinjaw l-importanza tal-implimentazzjoni ta’ Ftehimiet ta’ Assoċjazzjoni/Żoni ta’ Kummerċ Ħieles Approfonditi u Komprensivi (AA/DCFTAs) u tar-riformi.

• Sħubija tal-Lvant (informazzjoni ġenerali)

Sigurtà u difiża

Il-ministri għall-affarijiet barranin kellhom diskussjoni dwar l-implimentazzjoni tal-Istrateġija Globali tal-UE fil-qasam tas-sigurtà u d-difiża. Huma evalwaw il-progress, b’mod partikolari bil-ħsieb tad-diskussjoni fil-Kunsill Affarijiet Barranin (Difiża) fit-18 ta’ Mejju, li huwa mistenni jadotta konklużjonijiet dwar il-progress fl-implimentazzjoni tal-Istrateġija Globali fil-qasam tas-sigurtà u d-difiża.

• Kooperazzjoni tal-UE dwar is-sigurtà u d-difiża (informazzjoni ġenerali)