Kunsill Affarijiet Barranin, 18/05/2017, 18 ta' Mejju 2017

Riżultati ewlenin

L-Istrateġija Globali tal-UE - Implimentazzjoni fil-qasam tas-sigurtà u d-difiża

"Illum aħna affermajna d-determinazzjoni komuni tagħna li nsaħħu l-ħidma tagħna fis-sigurtà u d-difiża, bħala l-Unjoni Ewropea. Din ser ittejjeb l-abbiltà tagħna li naġixxu bħala fornitur dinji tas-sigurtà u ser issaħħaħ ir-rwol strateġiku globali tagħna, kif mistenni minn sħabna fid-dinja u miċ-ċittadini tagħna. Ser intejbu wkoll il-kapaċità tagħna li naġixxu b’mod awtonomu kull meta u kull fejn ikun meħtieġ u mas-sħab fejn possibbli."

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

B’segwitu għad-diskussjonijiet tal-ministri għall-affarijiet barranin fil-laqgħa tal-Kunsill tal-15 ta’ Mejju, il-ministri għad-difiża kellhom dibattitu dwar l-implimentazzjoni tal-Istrateġija Globali tal-UE fil-qasam tas-sigurtà u d-difiża. Huma vvalutaw il-progress u enfasizzaw għadd ta’ inizjattivi prijoritarji. Il-Kunsill adotta konklużjonijiet tal-Kunsill dwar is-sigurtà u d-difiża fil-kuntest tal-Istrateġija Globali tal-UE.

• "L-UE tibqa' impenjata li ssaħħaħ is-sigurtà u d-difiża": Il-Kunsill jadotta Konklużjonijiet (stqarrija għall-istampa, 18/05/2017)
• Kooperazzjoni tal-UE dwar is-sigurtà u d-difiża (informazzjoni ġenerali)

Kooperazzjoni UE-NATO

Il-Kunsill iddiskuta l-kooperazzjoni bejn l-UE u n-NATO mas-Segretarju Ġenerali tan-NATO Jens Stoltenberg. Il-Ministri għad-difiża evalwaw il-kooperazzjoni, b’mod partikolari s-sett komuni ta’ 42 proposta fis-seba' oqsma identifikati fid-Dikjarazzjoni Konġunta mill-President tal-Kunsill Ewropew, il-President tal-Kummissjoni Ewropea u s-Segretarju Ġenerali tan-NATO. Huma laqgħu l-progress li sar f'bosta oqsma, b'mod partikolari fil-ġlieda kontra t-theddidiet ibridi u kif ukoll fil-kondiviżjoni ta' informazzjoni, il-komunikazzjonijiet strateġiċi u l-kooperazzjoni marittima.

Kemm ir-Rappreżentant Għoli Federica Mogherini kif ukoll is-Segretarju Ġenerali Stoltenberg enfasizzaw li l-kooperazzjoni bejn l-UE u n-NATO saret in-norma aktar milli l-eċċezzjoni, biż-żewġ organizzazzjonijiet jaħdmu flimkien b’mod prattiku u operattiv għall-benefiċċju reċiproku tagħhom.

• Kooperazzjoni bejn l-UE u n-NATO: il-Kunsill jadotta konklużjonijiet biex jimplimenta d-Dikjarazzjoni Konġunta
• Kooperazzjoni bejn l-UE u n-NATO - Skeda informattiva