Kunsill Affarijiet Barranin, 19/06/2017, 19 ta' Ġunju 2017

Riżultati ewlenin

Kriżi tal-Golf

Il-ministri għall-affarijiet barranin tal-UE ddiskutew il-kriżi attwali fir-reġjun tal-Golf.

Il-ministri tal-UE ħeġġew tnaqqis fit-tensjoni tal-kriżi permezz tad-djalogu u n-negozjati. Huma esprimew l-appoġġ sħiħ tagħhom għall-isforzi ta’ medjazzjoni tal-Kuwajt.

"Il-ministri għall-affarijiet barranin taw messaġġ qawwi ta’ unità u tad-determinazzjoni tal-Unjoni Ewropea li tappoġġa l-isforzi ta’ medjazzjoni tal-Kuwajt. Dawn jeħtieġu l-appoġġ kollu tagħna u aħna ninsabu lesti li jgħinu.”

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri enfasizzaw li l-kriżi tirrikjedi li tinstab soluzzjoni urġenti u li l-unità tal-Golf hija importanti għall-UE iżda wkoll ta’ importanza kruċjali għall-istabilità tar-reġjun.

Ir-Rappreżentant Għoli fakkret li l-UE tagħti valur lir-relazzjonijiet bilaterali tagħha mal-partijiet kollha kkonċernati, kif ukoll lir-relazzjonijiet tagħha mal-Kunsill ta' Kooperazzjoni tal-Golf.

Kooperazzjoni UE-NATO

Il-ministri għall-affarijiet barranin iddiskutew il-kooperazzjoni bejn l-UE u n-NATO mad-Deputat Segretarju Ġenerali tan-NATO Rose Gottemoeller. Id-diskussjoni kienet ibbażata fuq rapport ta' progress konġunt mir-Rappreżentant Għoli tal-UE u s-Segretarju Ġenerali tan-NATO. Il-Kunsill adotta konklużjonijiet dwar ir-rapport, u laqa’ b’sodisfazzjon il-progress fl-implimentazzjoni tas-sett komuni ta’ proposti u jappella għal aktar passi fl-istess direzzjoni.

• Kooperazzjoni UE-NATO: il-Kunsill jilqa’ l-progress li sar (stqarrija għall-istampa, 19 ta’ Ġunju 2017)
• Kooperazzjoni tal-UE dwar is-sigurtà u d-difiża (informazzjoni ġenerali)

Il-ġlieda kontra t-terroriżmu

Il-ministri għall-affarijiet barranin iddiskutew l-aspetti esterni tal-ġlieda kontra t-terroriżmu, diskussjoni f’waqtha fid-dawl tal-attakki reċenti fl-UE u lil hinn. Huma ssottolinjaw li l-ġlieda kontra t-terroriżmu hija l-ogħla prijorità ta' sigurtà għall-UE. Il-Kunsill adotta konklużjonijiet dwar il-ġlieda kontra t-terroriżmu.

• Azzjoni esterna tal-UE dwar il-ġlieda kontra t-terroriżmu: il-Kunsill jadotta konklużjonijiet
• Ġlieda tal-UE kontra t-terroriżmu (informazzjoni ġenerali)

L-Iraq

Il-Kunsill iddiskuta l-Iraq, b’fokus fuq l-aħħar żviluppi, b’mod partikolari f’Mosul u l-provinċja ta' Nineveh, u fuq l-istabbilizzazzjoni futura tal-pajjiż. Il-Kunsill adotta konklużjonijiet.

• L-Iraq: il-Kunsill jadotta konklużjonijiet

Migrazzjoni

Il-ministri għall-affarijiet barranin iddiskutew l-aspetti esterni tal-migrazzjoni, bi tħejjija tal-Kunsill Ewropew tat-22 u t-23 ta’ Ġunju. Huma evalwaw il-progress li sar fir-rigward tal-Qafas ta’ Sħubija.

Il-Ministri esprimew l-appoġġ kontinwu tagħhom għall-approċċ attwali, li huma qiesu li għandu jissaħħaħ sabiex jinkisbu aktar riżultati, fid-dawl tan-numru ta’ ħajjiet mitlufa fir-Rotta tal-Mediterran Ċentrali. Il-kooperazzjoni ma’ pajjiżi sħab għandha tissaħħaħ bil-ħsieb li titkompla l-ġlieda kontra t-traffikanti, jitnaqqas in-numru ta’ wasliet ta’ migranti irregolari lejn l-UE u jiġu żgurati r-ritorn u r-riammissjoni. L-appoġġ għat-titjib tal-ġestjoni tal-migrazzjoni fil-Libja bil-ħsieb li jgħin biex jiġu protetti l-migranti u r-refuġjati wkoll jibqa’ objettiv ewlieni għall-UE.

• Qafas ta’ Sħubija dwar il-Migrazzjoni: Rapporti tal-Kummissjoni dwar riżultati u tagħlimiet meħuda sena wara, stqarrija għall-istampa tat-13 ta’ Ġunju 2017

Strateġija Globali tal-UE

Il-Kunsill kellu diskussjoni dwar l-implimentazzjoni tal-Istrateġija Globali tal-UE, abbażi ta’ rapport ippreżentat mir-Rappreżentant Għoli dwar l-ewwel sena ta’ implimentazzjoni.

Il-ministri għall-affarijiet barranin laqgħu r-rapport u enfasizzaw il-ħidma importanti li saret matul is-sena, mhux biss fil-qasam tal-kooperazzjoni fl-oqsma tas-sigurtà u d-difiża, iżda wkoll fil-bini tar-reżiljenza tal-istati u s-soċjetajiet fil-Lvant u n-Nofsinhar, u sabiex jitmexxa 'l quddiem approċċ integrat għall-kunflitti u l-kriżijiet.

Huma laqgħu l-ħidma li tinsab għaddejja rigward l-aġġornament ta’ strateġiji reġjonali u tematiċi eżistenti u t-tħejjija ta' oħrajn ġodda. F'dan il-kuntest, il-Kunsill adotta konklużjonijiet dwar is-sigurtà marittima globali.

• Rapport ta’ sena dwar l-implimentazzjoni tal-Istrateġija Globali
• Il-Kunsill jadotta konklużjonijiet dwar is-sigurtà marittima globali.