Kunsill Affarijiet Barranin, 17/07/2017, 17 ta' Lulju 2017

Riżultati ewlenin

Libja

"Iddiskutejna s-sitwazzjoni politika fil-Libja. Għandna bżonn għaqda fl-għanijiet, taħt il-qafas tan-Nazzjonijiet Uniti, biex inħeġġu lil-Libjani jingħaqdu. Il-Libjani għandhom biżżejjed riżorsi biex isibu mezz kif joħorġu mill-kriżi. Jeħtieġ li ngħinuhom, billi ngħaqqdu l-isforzi kollha fl-appoġġ għar-Rappreżentant Speċjali tas-SĠNU hekk kif wasal biex jibda l-kariga tiegħu"

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Kunsill iddiskuta l-Libja u adotta konklużjonijiet. Estenda wkoll il-mandat ta' EUBAM Libya u introduċa restrizzjonijiet fuq l-esportazzjoni ta' dinghies u muturi outboard lejn il-Libja.

• Riżultati ewlenin tal-Kunsill Affarijiet Barranin dwar il-Libja

Migrazzjoni

Il-ministri għall-affarijiet barranin iddiskutew il-migrazzjoni, waqt li kkonċentraw fuq is-sitwazzjoni fi r-Rotta tal-Mediterran Ċentrali, flimkien mal-Kummissarju Għoli tan-Nazzjonijiet Uniti għar-Refuġjati, Filippo Grandi, u d-Direttur Ġenerali tal-Organizzazzjoni Internazzjonali għall-Migrazzjoni, William Lacy Swing.

• Dikjarazzjoni konġunta mal-wasla minn Federica Mogherini, Filippo Grandi u William Lacy Swing

Korea ta' Fuq

"Ma hemm l-ebda soluzzjoni militari għall-peniżola Koreana: jenħtieġ li d-denuklearizzazzjoni tinkiseb b'mezzi paċifiċi. Enfasizzajna r-rwol ewlieni li għandha r-Repubblika tal-Korea f'dan ir-rigward: is-soluzzjonijiet għat-tensjonijiet fil-peniżola jinsabu fil-peniżola stess. L-UE tinsab lesta tappoġġa dawn l-isforzi b'kull mod possibbli. Għandna nsibu mezz kif noħorġu minn kriżi li qed thedded mhux biss is-sistema tan-nonproliferazzjoni iżda wkoll is-sigurtà fl-Asja u madwar id-dinja."

Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-Kunsill iddiskuta tar-Repubblika Demokratika Popolari tal-Korea u adotta konklużjonijiet.

• Konklużjonijiet tal-Kunsill dwar ir-Repubblika Demokratika tal-Poplu tal-Korea (stqarrija għall-istampa 17/7/17)

Strateġija Globali tal-UE

Il-Kunsill kellu diskussjoni dwar l-implimentazzjoni tal-Istrateġija Globali tal-UE. Il-ministri għall-affarijiet barranin ipprovdew gwida dwar il-prijoritajiet għall-2017-2018, waqt li qablu li dawn għandhom jinkludu kemm segwitu għal-linji ta’ ħidma tal-ewwel sena kif ukoll inizzjattivi ġodda.

Filwaqt li bbażaw fuq il-ħidma sinifikanti li twettqet fl-ewwel sena, il-ministri qablu li l-UE għandha tkompli ssaħħaħ il-kooperazzjoni tagħha fis-sigurtà u d-difiża, inkluż permezz tal-istabbiliment futur ta' kooperazzjoni strutturata permanenti (PESCO) ambizzjuża u inklużiva. Il-ministri nnutaw ukoll l-importanza tal-ħidma dwar ir-rabta interna / esterna, il-migrazzjoni, il-ġlieda kontra t-terroriżmu, kif ukoll dwar il-ġlieda kontra t-theddid ibridu. Il-progress tal-UE fl-appoġġ għar-reżiljenza ta' pajjiżi sħab, b’mod partikolari fil-viċinat, u l-approċċ integrat tagħha ġew enfasizzati wkoll, kif ukoll il-komunikazzjonijiet strateġiċi u d-diplomazija pubblika.

Il-ministri għall-affarijiet barranin qablu wkoll dwar żewġ linji addizzjonali għal aktar ħidma fl-2017-2018:

• appoġġ għall-governanza dinjija, b'mod partikolari n-Nazzjonijiet Uniti, inkluż l-implimentazzjoni tal-Ftehim ta' Pariġi u l-Għanijiet ta’ Żvilupp Sostenibbli, kif ukoll it-tiġdid tal-isforz globali għan-nonproliferazzjoni u d-diżarm ta' armi nukleari; u t-tisħiħ ulterjuri taċ-ċibersigurtà
• appoġġ għall-organizzazzjonijiet reġjonali u relazzjonijiet ta’ kooperazzjoni bejn ir-reġjuni u mal-UE, inkluż it-tisħiħ tal-impenn politiku tal-UE fil-Balkani tal-Punent, l-approfondiment tar-relazzjonijiet mal-imsieħba tal-Lvant permezz tas-Sħubija tal-Lvant, u l-konsolidazzjoni tas-sħubija tagħna mal-Afrika, b’mod partikolari permezz ta’ approċċ integrat fis-Saħel u fil-Qarn tal-Afrika.

• Strateġija globali tal-UE dwar il-politika barranija u ta’ sigurtà (sit web)