"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Difiża), 6 ta' Mejju 2021
Riżultati ewlenin
Ġrajjiet Kurrenti
Il-ministri għad-difiża tal-UE ġew infurmati mir-Rappreżentant Għoli, Josep Borrell, dwar il-ġrajjiet kurrenti fejn eżaminaw għadd ta' żviluppi reċenti u attivitajiet li ġejjin.
Il-Kunsill ġie infurmat dwar il-vjaġġ reċenti tar-Rappreżentant Għoli fis-Saħel, fejn żar il-Mauritania, il-Mali u ċ-Chad. Il-ministri enfasizzaw li l-istabbiltà fir-reġjun tibqa' kruċjali għas-sigurtà tal-Ewropa.
Il-ministri mbagħad iddiskutew iż-żieda reċenti fil-preżenza militari tar-Russja fil-Krimea, li ġiet annessa illegalment, u fuq il-fruntiera mal-Ukrajna. Id-dibattitu afferma mill-ġdid il-pożizzjoni tal-UE li r-Russja għandha tnaqqas it-tensjoni, u li l-implimentazzjoni sħiħa tal-ftehimiet ta' Minsk hija kruċjali għal soluzzjoni politika dejjiema.
Ir-Rappreżentant Għoli aġġorna lill-ministri dwar ir-rispons tal-UE għat-talba tal-Mozambique għal assistenza mill-UE biex tgħin tindirizza l-kriżi tas-sigurtà u t-theddida terroristika f'Cabo Delgado.
Qed nikkunsidraw Missjoni ta' Taħriġ tal-UE potenzjali. Għad għandna ftit passi quddiemna, iżda nittama li din titnieda malajr kemm jista' jkun. Tajt struzzjonijiet ċari lis-servizzi biex jitħaffef ix-xogħol għax jeħtieġ li nirrispondu għat-talba tal-Mozambique b'ċertu sens ta' urġenza.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Boxxla Strateġika
Il-Kunsill kellu skambju ta' fehmiet dwar il-boxxla strateġika, b'enfasi fuq l-immaniġġar ta' kriżijiet.
Wara diskussjoni dwar l-analiżi tat-theddid f'Novembru 2020, li enfasizzat il-ħtieġa li l-UE tkun ippreparata għal sfidi u kriżijiet futuri, il-Kunsill iddiskuta sett ta' ideat u proposti konkreti dwar kif l-UE tkun lesta biex tirreaġixxi għar-riskji.
"Jeħtieġ li l-Unjoni Ewropea tkun aktar effettiva u tieħu d-deċiżjonijiet aktar malajr. Iddiskutejna b'mod partikolari kif inniedu l-missjonijiet u l-operazzjonijiet tagħna aktar malajr, kif ukoll kif nistgħu noħolqu aktar inċentivi biex intejbu l-għadd tal-membri tal-persunal u l-assi mibgħuta għall-missjonijiet u l-operazzjonijiet tal-PSDK tal-UE.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Id-diskussjoni tal-Kunsill ibbażata fuq il-proposta tar-Rappreżentant Għoli enfasizzat il-ħtieġa għal aktar flessibbiltà biex il-missjonijiet ċivili u militari tal-UE jiġu adattati aħjar għall-ħtiġijiet f'kull kriżi, inkluż permezz ta' koordinazzjoni u kooperazzjoni msaħħa ma' operazzjonijiet militari oħra mwettqa f'koalizzjonijiet ad hoc minn stati membri jew sħab oħra.
Il-ministri semmew ukoll il-ħtieġa li l-UE jkollha persunal mgħammar u ppreparat bis-sħiħ biex jirreaġixxi malajr għall-kriżijiet. F'dan il-kuntest, ġiet diskussa l-idea ta' forza ta' dħul inizjali li tista' tiġi skjerata bħala "l-ewwel intervent" fi kriżi urġenti.
Il-Boxxla Strateġika finali hija skedata għall-adozzjoni mill-Kunsill f'Marzu 2022.
Wara t-talbiet tal-Kanada, in-Norveġja u l-Istati Uniti tal-Amerka biex jipparteċipaw fil-proġett PESCO Mobbiltà Militari, il-Kunsill adotta deċiżjonijiet pożittivi li jawtorizzaw lill-koordinatur ta' dan il-proġett – in-Netherlands – jistieden lit-tliet pajjiżi.
Il-Kanada, in-Norveġja u l-Istati Uniti tal-Amerka ser ikunu l-ewwel stati terzi li jiġu mistiedna jipparteċipaw fi proġett tal-PESCO.
Matul ikla ta' ħidma informali, il-ministri kellhom skambju ta' fehmiet mas-Segretarju Ġenerali tan-NATO Jens Stoltenberg. dwar l-involviment operazzjonali f'postijiet ta' interess komuni, mill-Mediterran sal-Afganistan.
Bord ta' Tmexxija tal-Aġenzija Ewropea għad-Difiża
Il-bord ta' tmexxija tal-Aġenzija Ewropea għad-Difiża ltaqa' fil-marġni tal-laqgħa tal-Kunsill biex jeżamina s-sitwazzjoni attwali fl-implimentazzjoni ta-rakkomandazzjonijiet tar-Rieżami Annwali Koordinat dwar id-Difiża (CARD), bl-opportunitajiet kollaborattivi fl-iżvilupp tal-kapaċità, ir-riċerka u t-teknoloġija mqiegħda taħt il-lenti.
Ir-Rappreżentant Għoli ppresieda għall-ewwel darba l-laqgħa tal-bord taċ-Ċentru Satellitari tal-UE (SatCen) fil-livell ministerjali. Il-bord iddiskuta r-rwol tas-SatCen fil-PESK u lil hinn minnha, b'enfasi fuq il-kompiti u l-funzjonijiet futuri tiegħu, u l-livell xieraq ta' ambizzjoni.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Qed nikkunsidraw Missjoni ta' Taħriġ tal-UE potenzjali. Għad għandna ftit passi quddiemna, iżda nittama li din titnieda malajr kemm jista' jkun. Tajt struzzjonijiet ċari lis-servizzi biex jitħaffef ix-xogħol għax jeħtieġ li nirrispondu għat-talba tal-Mozambique b'ċertu sens ta' urġenza.