Vidjokonferenza informali tal-ministri għall-iżvilupp, 11 ta' Ottubru 2021

Riżultati ewlenin

Il-ministri tal-UE għall-iżvilupp qasmu l-fehmiet tagħhom rigward is-sitwazzjoni li qed tiddeterjora malajr fl-Afganistan, u ddiskutew modi konkreti biex jingħata aktarappoġġ lill-poplu Afgan, permezz ta' approċċ ta' "Tim Ewropa" li jinkludi l-UE, l-istati membri tagħha u n-networks diplomatiċi u l-istituzzjonijiet finanzjarji tagħhom.

Is-sitwazzjoni umanitarja u soċjoekonomika fl-Afganistan tinsab fix-xifer ta' kollass. Skont il-Kunsill Norveġiż għar-Refuġjati, mill-inqas miljun tifel u tifla jinsabu f'riskju li jmutu din ix-xitwa, sakemm ma jiksbux l-assistenza xierqa. Ma nistgħux "nistennew u naraw". Jeħtieġ li naġixxu, u naġixxu malajr.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-fehmiet tal-ministri waslu għal qbil dwar il-ħtieġa li jiżdied l-appoġġ tal-UE għall-poplu Afgan permezz ta' għajnuna umanitarja flimkien ma' għanjuna b'appoġġ dirett għall-popolazzjoni.

L-għan tal-UE huwa li b'hekk issalva u ssostni l-ħajjiet u l-għajxien tal-poplu Afgan, u tipprovdi servizzi bażiċi lill-popolazzjoni.

Il-ministri qablu b'mod partikolari li jkollhom approċċ ikkalibrat, sabiex tiġi evitata katastrofi umanitarja. Tali approċċ mhux ser jinvolvi r-rikonoxximent tat-Taliban, u ser jirrispetta bis-sħiħ il-ħames punti ta' riferiment maqbula mill-Kunsill fir-rigward tal-Afganistan.

• Afganistan: il-konklużjonijiet tal-Kunsill jistabbilixxu l-pożizzjoni tal-UE u l-passi li jmiss (stqarrija għall-istampa, 21 ta' Settembru 2021)
• Vidjokonferenza informali tal-ministri għall-iżvilupp, 14 ta' Ġunju 2021