"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill kellu diskussjoni strateġika dwar l-approċċ tal-UE għall-Golf u kif tista' tissaħħaħ il-preżenza tal-UE fir-reġjun.
Il-ministri rrikonoxxew ir-rwol ewlieni li s-sħab tal-Golf jistgħu jaqdu fi kwistjonijiet ta' politika barranija, bħall-kriżi fl-Afganistan. Huma ddiskutew il-ħtieġa li l-momentum pożittiv fir-reġjun jiġi appoġġat u akkumpanjat b'mod attiv f'oqsma li jistgħu jgħinu biex tinbena l-fiduċja, filwaqt li jikkontribwixxu wkoll għall-aġenda globali tal-UE (eż. it-tranżizzjoni ekoloġika, id-diġitali, il-kummerċ). Il-Kunsill iffoka wkoll fuq il-ħtieġa li jiġu appoġġati r-riformi soċjoekonomiċi u li jiġu diskussi b'mod miftuħ kwistjonijiet fejn hemm nuqqas ta' qbil, pereżempju d-drittijiet tal-bniedem.
Id-diskussjoni ministerjali ser tikkontribwixxi għat-tħejjija ta' Komunikazzjoni Konġunta dwar "Sħubija mal-Golf", li għandha tiġi adottata fl-ewwel kwart tal-2022. Kmieni fl-2022 ser isir ukoll Kunsill Konġunt bejn l-UE u l-Kunsill ta' Kooperazzjoni tal-Golf.
Is-Sħubija tal-Lvant
Il-ministri għall-affarijiet barranin kellhom skambju ta' fehmiet dwar ir-relazzjonijiet tal-UE mas-Sħubija tal-Lvant (SL), bi tħejjija għal-laqgħa ministerjali li ser issir f'Novembru u s-summit tas-SL skedat għal Diċembru fi Brussell.
Il-ministri ddiskutew il-kuntest ġeopolitiku diffiċli li jiffaċċjaw xi pajjiżi sħab fir-reġjun, u qablu li l-UE ser tkompli tinsisti għal valuri fundamentali bħad-demokrazija, id-drittijiet tal-bniedem, l-istat tad-dritt, u l-ġlieda kontra l-korruzzjoni. Fl-istess ħin, l-UE ser tibqa' ffukata fuq l-irkupru soċjoekonomiku fit-tul, filwaqt li tiżgura li dan ikun sostenibbli u inklużiv, u b'hekk tikseb riżultati konkreti għan-nies.
L-UE ser tappoġġa wkoll lill-isħab b'vaċċini, b'ċertifikati tat-tilqim u fil-ġlieda kontra d-diżinformazzjoni.
L-Etjopja
Waqt l-ikla ta' nofsinhar il-Kunsill Affarijiet Barranin kellu skambju ta' fehmiet dwar is-sitwazzjoni fl-Etjopja, fid-dawl tal-aħħar żviluppi fil-pajjiż u fir-reġjun ta' Tigray, sena wara l-bidu tal-konflitt.
It-Tigray jinsab f'ħerba bi ksur sistematiku tad-drittijiet tal-bniedem minn gruppi armati li jużaw bħala arma delitti tal-gwerra u delitti kontra l-umanità. L-għajnuna umanitarja ma tħallietx tasal. Qed inwittu t-triq bil-ħsieb tar-rapport li jmiss tan-Nazzjonijiet Uniti dwar id-Drittijiet tal-Bniedem mistenni fl-1 ta' Novembru, biex jingħata rispons adegwat li jista' jibda bit-tħejjija ta' sanzjonijiet. Qed ninkariga lis-servizzi tiegħi biex imexxu dan 'il quddiem ladarba jkollna r-rapport dwar l-abbużi tad-drittijiet tal-bniedem.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-ministri qablu li jkomplu l-għajnuna umanitarja għall-Etjopja u appoġġaw il-missjoni li jmiss tal-Kummissarju tal-UE għas-Sħubijiet Internazzjonali, Jutta Urpilainen, li ser iżżur l-Etjopja flimkien mar-Rappreżentant Speċjali tal-UE għall-Qarn tal-Afrika, Annette Weber, biex twassal messaġġ ċar f'isem l-UE dwar il-ħtieġa li finalment jiġi implimentat waqfien mill-ġlied u jinbeda proċess politiku li jinkludi l-atturi kollha.
In-Nikaragwa
Waqt l-ikla ta' nofsinhar il-Kunsill Affarijiet Barranin ser ikollu ukoll skambju ta' fehmiet dwar is-sitwazzjoni fin-Nikaragwa. Mill-2018 'l hawn, is-soppressjoni vjolenti tal-protesti qatlet mill-inqas 328 persuna.
Il-ministri rriflettew b'mod partikolari dwar il-ħtieġa li jiġu aġġustati l-politiki tal-UE fir-rigward tal-elezzjonijiet ġenerali li jmiss fil-pajjiż fis-7 ta' Novembru 2021, li għalihom il-prospetti ta' proċess elettorali kredibbli u leġittimu huma dgħajfa ħafna.
L-UE ser tkompli tinsisti fuq id-demokrazija, id-drittijiet tal-bniedem u l-istat tad-dritt, bħall-ħelsien ta' priġunieri politiċi jew ir-ritorn ta' organizzazzjonijiet internazzjonali tad-drittijiet tal-bniedem u l-organizzazzjoni ta' elezzjonijiet ħielsa u ġusti.
Ġrajjiet kurrenti
Il-Kunsill Affarijiet Barranin kellu diskussjoni dwar is-sitwazzjoni umanitarja u ekonomika li qed tiddeterjora fl-Afganistan. Il-ministri qablu li kienet meħtieġa preżenza minima tal-UE f'Kabul biex tappoġġa lill-poplu Afgan u tiżgura passaġġ sikur għall-Afgani f'riskju, iżda li din ma kienet tfisser l-ebda rikonoxximent tal-UE.
It-Tuneżija ġiet wkoll diskussa fid-dawl tal-aħħar żviluppi. Il-ministri enfasizzaw l-importanza li jiġi ppreservat l-acquis demokratiku, b'rispett għas-separazzjoni tas-setgħat u l-issoktar tan-normalità istituzzjonali. Il-ħatra reċenti ta' gvern ġdid tqieset bħala l-ewwel pass pożittiv li l-UE ser tkompli iżżomm taħt il-lenti tagħha.
Il-ministri mbagħad semmew il-Balkani tal-Punent, b'segwitu għas-summit reċenti f'Brdo u fil-kuntest tat-tensjonijiet reċenti fit-Tramuntana tal-Kosovo. L-UE ser tkompli l-impenn politiku qawwi tagħha mar-reġjun, issegwi l-kompiti importanti tal-politika barranija u ta' sigurtà mogħtija fis-summit, u tiffaċilita d-djalogu dwar in-normalizzazzjoni komprensiva tar-relazzjonijiet bejn il-Kosovo u s-Serbja.
Bil-ħsieb tal-Konferenza tan-Nazzjonijiet Uniti dwar it-Tibdil fil-Klima (COP26) li jmiss, il-Kunsill iddiskuta d-diplomazija dwar il-klima. Il-ministri ssottolinjaw l-importanza li l-pajjiżi kollha jippreżentaw mingħajr dewmien pjanijiet ta' mitigazzjoni u strateġiji fit-tul b'emissjonijiet żero.
Il-ministri mbagħad ġew infurmati dwar l-aħħar żviluppi madwar Varosha, u esprimew solidarjetà qawwija mal-Greċja u Ċipru wara l-interventi Torok kontra bastimenti li joperaw fiż-żoni ekonomiċi esklużivi tagħhom. Ir-Rappreżentant Għoli ssottolinja li l-unika soluzzjoni dejjiema għall-kwistjonijiet hija soluzzjoni f'Ċipru f'konformità mar-riżoluzzjonijiet rilevanti tal-Kunsill tas-Sigurtà tan-NU u l-prinċipji li fuqhom hija msejsa l-UE.
Il-Kunsill kellu wkoll diskussjoni twila dwar il-Belarussja u l-kwistjoni tal-migranti li qegħdin jiġu mbuttati lejn il-fruntiera tal-UE. Il-ministri wissew kontra l-użu politiku tal-migranti mir-reġim tal-Belarussja u ssottolinjaw li l-kuntatti mal-pajjiżi ta' oriġini u ta' tranżitu ser ikomplu, kif ukoll ser tkompli l-ħidma fuq rispons xieraq tal-UE.
Qabel ma kkonkluda l-laqgħa, il-Kunsill indirizza wkoll il-Mali. Il-ministri ħarsu lejn l-ingranaġġ finanzjarju u politiku tal-UE, inkluż il-possibbiltà li jiġu kkunsidrati miżuri restrittivi, b'appoġġ għall-isforzi mill-Komunità Ekonomika tal-Istati tal-Afrika tal-Punent (ECOWAS), u f'konformità mal-konklużjonijiet adottati mill-Kunsill Ewropew f'Mejju kontra dawk li qed ixekklu l-aġenda ta' tranżizzjoni.
Konklużjonijiet tal-Kunsill
Il-Kunsill approva konklużjonijiet dwar il-Bożnija-Ħerzegovina/l-Operazzjoni EUFOR Althea.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
It-Tigray jinsab f'ħerba bi ksur sistematiku tad-drittijiet tal-bniedem minn gruppi armati li jużaw bħala arma delitti tal-gwerra u delitti kontra l-umanità. L-għajnuna umanitarja ma tħallietx tasal. Qed inwittu t-triq bil-ħsieb tar-rapport li jmiss tan-Nazzjonijiet Uniti dwar id-Drittijiet tal-Bniedem mistenni fl-1 ta' Novembru, biex jingħata rispons adegwat li jista' jibda bit-tħejjija ta' sanzjonijiet. Qed ninkariga lis-servizzi tiegħi biex imexxu dan 'il quddiem ladarba jkollna r-rapport dwar l-abbużi tad-drittijiet tal-bniedem.