Kunsill Affarijiet Ġenerali, 18-19/11/2014, 18 u 19 ta' Novembru 2014

Il-Kunsill iddiskuta l-pjan ta' investiment ta' €300 biljun għat-tkabbir u l-impjiegi

Il-laqgħa tal-Kunsill Affarijiet Ġenerali fit-18 u d-19 ta' Novembru ttrattat it-tħejjijiet tal-laqgħa li jmiss tal-Kunsill Ewropew. Il-ministri tal-UE ddiskutew ukoll il-pjan ta' investiment ta' €300 biljun u adottaw konklużjonijiet dwar il-politika ta' koeżjoni tal-UE.

Tħejjijiet għal-laqgħa tal-Kunsill Ewropew ta' Diċembru

Fit-18 u d-19 ta' Diċembru, il-Kunsill Ewropew ser jagħti ħarsa lejn aktar sforzi biex jitrawmu t-tkabbir, l-impjiegi u l-kompetittività Ewropea u lejn id-dettalji tal-pjan ta' investiment ta' €300 biljun tal-UE għas-sentejn li ġejjin.

Il-pjan il-ġdid jislet minn riżorsi addizzjonali pubbliċi u privati fi sforz biex tingħata spinta lit-tkabbir u l-impjiegi fl-Ewropa.

X'aktarx li ser jiġu diskussi wkoll kwistjonijiet ta’ tħassib internazzjonali bħall-kriżi tal-Ebola u s-sitwazzjoni fl-Ukraina u fil-Lvant Nofsani.

Implimentazzjoni tal-konklużjonijiet tal-Kunsill Ewropew

Abbażi ta' rapport imħejji mill-Presidenza Taljana, il-ministri tal-UE taw ħarsa wkoll lejn kif tista' tiġi aċċellerata l-implimentazzjoni tal-prijoritajiet maqbula fil-Kunsill Ewropew ta' Ġunju.

Il-ministri tal-UE kellhom skambju ta' fehmiet dwar il-prijorità tal-aġenda strateġika li tiffoka fuq il-politika tal-UE dwar l-enerġija u l-klima. Ingħatat attenzjoni partikolari lill-kwistjonijiet marbuta mal-iżvilupp ta' unjoni tal-enerġija.

Tisħiħ tal-programm interistituzzjonali annwali u pluriennali

Il-Kunsill iddiskuta l-prijoritajiet li għandhom jiġu inklużi fil-Programm ta' Ħidma Annwali għall-2015. Il-ministri tal-UE laqgħu l-qbil tal-Kummissjoni u tal-Parlament Ewropew biex jikkoordinaw il-prijoritajiet leġislattivi tagħhom għall-Ewropa.

Jiġi żgurat rispett għall-mekkaniżmu tal-istat tad-dritt

Il-ministri tal-UE ħeġġew lill-Kunsill biex ikollu rwol ċentrali fid-diskussjonijiet dwar ir-rispett għall-istat tad-dritt fl-UE.

Laqgħa dwar il-koeżjoni

Nhar l-Erbgħa 19 ta' Novembru, il-ministri tal-UE adottaw konklużjonijiet dwar is-sitt rapport dwar il-koeżjoni. Il-ministri ser ikollhom skambju ta’ fehmiet abbażi ta’ nota mill-Presidenza dwar il-kontribut tal-politika ta’ koeżjoni fit-tħejjija tar-reviżjoni ta’ nofs it-term tal-istrateġija UE 2020.