Kunsill Affarijiet Ġenerali, 29 ta' Settembru 2014

Strateġija tal-UE għar-reġjun Adrijatiku u Joniku

Il-laqgħa tal-Kunsill Affarijiet Ġenerali tad-29 ta' Settembru adottat l-konklużjonijiet dwar l-Istrateġija tal-Unjoni Ewropea għar-reġjun Adrijatiku u Joniku. Il-ministri ttrattaw ukoll it-tħejjijiet għas-summit tal-Kunsill Ewropew li jmiss. 

Il-ministri adottaw strateġija makroreġjonali li ġġib flimkien 8 pajjiżi tar-reġjun Adrijatiku u Joniku biex jagħtu spinta lill-kooperazzjoni għal aktar tkabbir u impjiegi.

Il-pajjiżi parteċipanti - il-Kroazja, il-Greċja, l-Italja, is-Slovenja, l-Albanija, il-Bosnja-Ħerzegovina, il-Montenegro u s-Serbja - ser isaħħu l-kooperazzjoni tagħhom fir-rigward tal-ekonomija marittima, il-konservazzjoni tal-ambjent tal-baħar, l-infrastruttura tat-trasport u l-enerġija u t-turiżmu sostenibbli.
Id-deċiżjoni issa hija soġġetta għall-approvazzjoni mill-Kunsill Ewropew.

Tħejjijiet għal-laqgħa tal-Kunsill Ewropew ta' Ottubru

Il-ministri ddiskutew ukoll l-aġenda tal-laqgħa li jmiss tal-Kunsill Ewropew, li ser issir fit-23 u l-24 ta' Ottubru.

Il-mexxejja tal-UE huma mistennija jiddiskutu

• il-klima u l-enerġija bl-objettiv li jieħdu deċiżjoni finali dwar il-qafas il-ġdid tal-politika dwar il-klima u l-enerġija
• kwistjonijiet ekonomiċi
• kwistjonijiet speċifiċi ta' relazzjonijiet esterni

Implimentazzjoni tal-konklużjonijiet tal-Kunsill Ewropew

Abbażi ta' rapport imħejji mill-Presidenza Taljana, il-ministri tal-UE taw ħarsa wkoll lejn kif jaċċelleraw l-implimentazzjoni tal-prijoritajiet maqbula fil-Kunsill Ewropew ta' Ġunju.

Fid-dawl tal-konferenza dwar l-impjiegi f'Milan fit-8 ta' Ottubru, prinċipalment huma ddiskutew miżuri mmirati biex irawmu t-tkabbir, l-impjiegi u l-kompetittività fl-Ewropa.

''Wara sensiela ta' dibattiti ta' kull xahar, fit-tmiem tal-Presidenza tagħna, ser nippreżentaw rapport komprensiv dwar l-ewwel fażi tal-implimentazzjoni tal-aġenda strateġika,'' qal Sandro Gozi, is-Segretarju tal-Istat għall-Affarijiet Ewropej tal-Italja u l-President tal-Kunsill.

Suġġetti oħra fuq l-aġenda

Titjib tal-funzjonament tal-UE

Il-presidenza infurmat lill-Kunsill dwar ir-raba' laqgħa tal-Grupp tal-Ħbieb tal-Presidenza dwar it-titjib tal-funzjonament tal-UE li saret fil-25 ta' Settembru 2014.

Mingħajr diskussjoni, il-Kunsill adotta l-atti leġislattivi u d-deċiżjonijiet li ġejjin:

• id-dewmien tal-applikazzjoni proviżorja tal-ftehim ta' kummerċ ħieles mal-Ukraina sal-1 ta' Jannar 2016  
• il-bidu fl-1 ta' Novembru tal-applikazzjoni proviżorja tal-bqija tal-ftehim mal-Ukraina dwar il-ġustizzja, il-libertà u s-sigurtà, u l-kooperazzjoni ekonomika u finanzjarja akbar
• direttiva għall-iżvelar ta' informazzjoni mhux finanzjarja u dwar id-diversità minn ċerti kumpaniji kbar
• it-tkabbir tal-mandat tal-missjoni tal-Unjoni Ewropea għall-istat tad-dritt fil-Kosovo (EULEX Kosovo) biex jiġu appoġġati l-proċedimenti ġudizzjarji rilokati
• żewġ regolamenti ġodda dwar l-istatus u l-finanzjament tal-partiti politiċi Ewropej u l-fondazzjonijiet affiljati tagħhom
• direttiva dwar il-bini ta' infrastruttura għal karburanti alternattivi madwar l-UE
• regolament dwar il-prevenzjoni u l-ġestjoni tal-introduzzjoni u t-tixrid tal-ispeċijiet aljeni invażivi