Kunsill Affarijiet Ġenerali, 23/07/2014, 23 ta' Lulju 2014

Il-Litwanja għandha tadotta l-euro fl-1 ta' Jannar 2015

Il-laqgħa tal-Kunsill Affarijiet Ġenerali tat-23 ta' Lulju ċċelebrat id-dħul tal-Litwanja fiż-żona tal-euro. Il-ministri ddiskutew ukoll il-programm ta' ħidma tal-presidenza Taljana u r-reviżjoni ta' nofs it-term tal-istrateġija Ewropa 2020.

Fl-1 ta' Jannar 2015, il-Litwanja ser issir id-19-il stat membru li jadotta l-euro.

"L-isforzi konsistenti tal-Litwanja ħallew il-frott: illum iż-żona tal-euro fetħet il-bibien għalina," qal Algirdas Butkevičius, il-Prim Ministru tal-Litwanja, fil-laqgħa tal-ministri tal-UE.

Id-dħul tal-Litwanja fil-familja tal-euro huwa ta' importanza kbira għaż-żona tal-euro kollha.

"Hija xhieda tal-attrattività kontinwa tal-proġett ta' munita unika u r-rilevanza tagħha għall-futur tal-komunità tagħna," qal Sandro Gozi, Segretarju tal-Istat għall-Affarijiet Ewropej tal-Italja u President tal-Kunsill tal-UE.

Ir-rata tal-kambju ġiet stabbilita għal 3.45280 litas Litwani (LTL) għal kull euro.

Programm tal-Presidenza

F'sessjoni pubblika, il-Presidenza Taljana ppreżentat il-programm ta' ħidma tagħha għal matul il-mandat tagħha - minn Lulju sa Diċembru 2014. Hija għandha l-ħsieb li tikkontribwixxi għad-dibattitu attwali dwar il-futur tal-prijoritajiet tal-UE u tiżgura li l-possibiltajiet offruti mit-Trattati eżistenti jkunu sfruttati bis-sħiħ biex jinkisbu dawk il-prijoritajiet.

Reviżjoni ta' nofs it-term tal-istrateġija Ewropa 2020

Il-Kunsill iddiskuta pjan direzzjonali għar-reviżjoni ta' nofs it-term tal-istrateġija ta' tkabbir Ewropa 2020. Il-pjan direzzjonali jistabbilixxi kif ser titmexxa 'l quddiem il-ħidma taħt il-Presidenza Taljana biex tipprepara għar-reviżjoni tal-istrateġija fl-2015.

Implimentazzjoni tal-konklużjonijiet tal-Kunsill Ewropew

Il-Ministri ddiskutew kif ser imexxu wara l-implimentazzjoni tal-prijoritajiet tal-aġenda strateġika maqbula fil-Kunsill Ewropew ta' Ġunju.

Mingħajr diskussjoni, il-Kunsill adotta l-atti leġislattiv u d-deċiżjonijiet li ġejjin:

• regolament għall-ġestjoni tar-responsabbiltà finanzjarja marbuta mal-proċedimenti għas-soluzzjoni tat-tilwim bejn investitur u stat
• direttiva mmirata biex tiggarantixxi l-aċċess għal servizzi ta' ħlas bażiċi u ttejjeb l-informazzjoni dwar tariffi relatati mal-kont tal-pagamenti
• direttiva dwar impriżi ta' investiment kollettiv f'titoli trasferibbli (UCITS), li tintroduċi dispożizzjonijiet speċifiċi dwar il-kompiti ta' kustodja u superviżjoni tad-depożitarju
• regolament li għandu l-għan li jtejjeb is-sikurezza fis-sistema ta’ saldu tat-titoli u l-ftuħ tas-suq għal servizzi ta' depożitorji ċentrali tat-titoli (CSD)
• il-pożizzjoni tal-Kunsill dwar abbozz ta' direttiva li tagħti lill-istati membri aktar flessibbiltà biex jiddeċiedu jekk jixtiqux jikkultivaw jew le organiżmi ġenetikament modifikati (OĠM)
• regolament dwar ir-rikonoxximent reċiproku ta' identifikazzjoni elettronika
• regolament dwar il-finanzjament ta' azzjonijiet mill-Aġenzija Ewropea għas-Sigurtà Marittima biex tiġġieled it-tniġġis fil-baħar
• direttiva li fiha regoli aġġornati dwar it-tagħmir marittimu abbord bastimenti tal-UE