Kunsill Affarijiet Ġenerali, 21/10/2014, 21 ta' Ottubru 2014

Il-Kunsill Ewropew għandu jiffoka fuq il-qafas ta' politika għall-klima u l-enerġija għall-2030

Il-Kunsill Affarijiet Ġenerali mlaqqa' fil-21 ta' Ottubru fil-Lussemburgu tratta t-tħejjijiet għall-Kunsill Ewropew li ġej li ser jiffoka fuq il-klima u l-enerġija, l-istat tal-ekonomija Ewropea, u kwistjonijiet ta' politika barranija.

Tħejjijiet għal-laqgħa tal-Kunsill Ewropew ta' Ottubru

Il-ministri ddiskutew it-tħejjijiet tal-laqgħa tal-Kunsill Ewropew li jmiss, li ser issir fit-23 u l-24 ta' Ottubru. Din ser tkun l-aħħar laqgħa tal-Kunsill Ewropew li tkun ippreseduta minn Herman Van Rompuy qabel mal-president elett il-ġdid, Donald Tusk, jibda l-mandat tiegħu.
 
L-objettiv prinċipali tal-Kunsill Ewropew huwa li jilħaq qbil dwar qafas ta' politika ġdid għall-klima u l-enerġija għall-2030. Il-politika ser tindirizza l-miri tal-emissjonijiet ta' gass b'effett ta' serra, l-istat tal-Iskema għall-Iskambju ta' Kwoti tal-Emissjonijiet, l-effiċjenza fl-użu tal-enerġija u s-sigurtà tal-enerġija.
 
Il-mexxeja ser jiddiskutu wkoll l-istat tal-ekonomija Ewropea, abbażi ta' preżentazzjoni mill-Kummissjoni Ewropea.
 
X'aktarx jiġu diskussi wkoll kwistjonijiet ta' tħassib internazzjonali bħall-kriżi tal-Ebola, is-sitwazzjoni fl-Ukraina u fil-Lvant Nofsani

Implimentazzjoni tal-konklużjonijiet tal-Kunsill Ewropew

Abbażi ta' rapport imħejji mill-Presidenza Taljana, il-ministri tal-UE kkunsidraw ukoll kif tista' titħaffef l-implimentazzjoni tal-prijoritajiet li kien hemm qbil dwarhom fil-Kunsill Ewropew ta' Ġunju.
 
Il-ministri tal-UE skambjaw fehmiet dwar il-prijorità tal-aġenda strateġika filwaqt li ffokaw fuq il-libertà, is-sigurtà u l-ġustizzja. Ingħatat attenzjoni partikolari lill-kwistjonijiet tal-ġellieda barranin u tar-reġistri tal-ismijiet tal-passiġġieri tal-UE.

Tisħiħ tal-programmazzjoni interistituzzjonali annwali u pluriennali

Il-Presidenza ser taħdem mal-Kummissjoni u l-Parlament Ewropew dwar il-Programm ta' Ħidma Annwali għall-2015 biex tiġi stabbilita programmazzjoni interistituzzjonali annwali u pluriennali ġdida u aktar effiċjenti.
 
"Din hija prijorità oħra tal-Presidenza Taljana, li ser ikollha effett konkret ħafna. Hija ser tippermetti li l-UE taġixxi u tirreaġixxi b'mod eħfef u aktar rapidu", qal is-Segretarju tal-Istat Sandro Gozi fil-konferenza stampa ta' wara l-laqgħa.