Kunsill Affarijiet Ġenerali, 21/05/2019, 21 ta' Mejju 2019

Riżultati ewlenin

Il-Kunsill beda t-tħejjijiet għal-laqgħa tal-Kunsill Ewropew li għandha ssir fl-20 u l-21 ta' Ġunju.

Fil-laqgħa tagħhom f'Ġunju, il-mexxejja tal-UE huma mistennija jieħdu deċiżjonijiet dwar ħatriet għaċ-ċiklu istituzzjonali li jmiss u jadottaw l-aġenda strateġika tal-UE għall-2019 sal-2024. Huma ser jikkonċentraw ukoll id-diskussjonijiet tagħhom fuq il-qafas finanzjarju pluriennali li jmiss, it-tibdil fil-klima u r-rakkomandazzjonijiet speċifiċi għall-pajjiż skont il-proċess tas-Semestru Ewropew.

Il-Kunsill Ewropew ta' Ġunju ser ikun il-ħin għal deċiżjonijiet importanti li ser isawru l-ġejjieni tal-UE fis-snin li ġejjin. Bħala presidenza, għamilna l-almu tagħna biex niffaċilitaw it-tranżizzjoni għaċ-ċiklu istituzzjonali li jmiss u nagħlqu x-xogħol fuq kemm jista' jkun fajls leġislattivi. Ser inkomplu nikkontribwixxu b'mod attiv għal dan il-proċess biex ninkoraġġixxu unjoni b'saħħitha u koeżiva, f'konformità mal-motto tal-presidenza tagħna. George Ciamba, Ministru Delegat għall-Affarijiet Ewropej tar-Rumanija

Qafas Finanzjarju Pluriennali għall-2021-2027

Il-Kunsill iddiskuta l-aspetti tal-azzjoni esterna tal-qafas finanzjarju pluriennali (QFP) għall-2021-2027. Il-ministri kkonċentraw fuq il-proposti mill-Kummissjoni Ewropea dwar l-integrazzjoni tal-Fond Ewropew għall-Iżvilupp fil-baġit tal-UE u d-delimitazzjoni tal-fondi għall-Viċinat Ewropew fil-QFP li jmiss.

Id-dibattitu ser jikkontribwixxi għat-tħejjijiet mill-presidenza għal abbozz rivedut ta' negozjati qabel il-Kunsill Ewropew ta' Ġunju.

Kompożizzjoni tal-korpi konsultattivi tal-UE

Il-Kunsill adotta, mingħajr diskussjoni, żewġ deċiżjonijiet dwar il-kompożizzjoni tal-Kumitat tar-Reġjuni u tal-Kumitat Ekonomiku u Soċjali Ewropew. Id-deċiżjonijiet jadattaw il-kompożizzjoni ta' dawn il-korpi konsultattivi tal-UE mill-bidu tal-mandati ġodda tagħhom fl-2020 filwaqt li jqisu l-ħruġ tar-Renju Unit.

• Il-kompożizzjoni tal-Kumitat tar-Reġjuni u tal-Kumitat Ekonomiku u Soċjali Ewropew: il-Kunsill jadotta l-adattamenti (stqarrija għall-istampa, 21/05/2019)

Strateġiji makroreġjonali tal-UE

Il-Kunsill adotta konklużjonijiet dwar l-implimentazzjoni ta' strateġiji makroreġjonali tal-UE, wara r-rapport ippreżentat mill-Kummissjoni Ewropea f'Jannar. Il-konklużjonijiet jirrikonoxxu r-rwol tal-makroreġjuni fit-trawwim tal-koeżjoni soċjoekonomika u territorjali.

• Konklużjonijiet tal-Kunsill dwar l-implimentazzjoni ta' strateġiji makroreġjonali tal-UE

Prodotti tal-plastik li jintużaw darba biss

Il-Kunsill adotta, mingħajr diskussjoni, direttiva li tistabbilixxi restrizzjonijiet ġodda fuq ċerti prodotti tal-plastik li jintużaw darba biss. Id-direttiva l-ġdida hija parti mill-isforzi tal-UE biex tħares l-ambjent minn tniġġis tal-plastik u tnaqqas l-iskart fil-baħar.

• Il-Kunsill jadotta projbizzjoni fuq prodotti tal-plastik li jintużaw darba biss (stqarrija għall-istampa, 21/05/2019)

Fertilizzanti

Il-Kunsill adotta, mingħajr diskussjoni, regolament ġdid dwar il-fertilizzanti. Ir-regolament jarmonizza l-istandards għall-fertilizzanti prodotti minn materja prima organika jew sekondarja fl-UE, biex b'hekk jinħolqu possibbiltajiet ġodda għall-produzzjoni tagħhom fuq skala kbira. Dan jistabbilixxi wkoll limiti armonizzati għal firxa ta' kontaminanti, bħall-kadmju, li jinsabu f'fertilizzanti minerali.

• L-UE tadotta regoli ġodda dwar il-fertilizzanti (stqarrija għall-istampa, 21/05/2019)