Kunsill Affarijiet Ġenerali (Koeżjoni), 25/06/2019, 25 ta' Ġunju 2019

Riżultati ewlenin

Pakkett leġislattiv għall-politika ta' koeżjoni 2021-2027

Il-Kunsill ħa kont tas-sitwazzjoni attwali tan-negozjati rigward il-pakkett dwar il-politika ta' koeżjoni għall-perjodu 2021–2027.

Matul dawn l-aħħar xhur ġew miftiehma mandati għal negozjati mal-Parlament Ewropew rigward ir-regolament dwar id-dispożizzjonijiet komuni u r-regolamenti li jkopru l-Fond Ewropew għall-Iżvilupp Reġjonali u l-Fond ta' Koeżjoni, il-Fond Soċjali Ewropew Plus u l-Interreg. Dan jeskludi d-dispożizzjonijiet li huma parti min-negozjati dwar il-qafas finanzjarju pluriennali li jmiss minħabba n-natura baġitarja jew orizzontali tagħhom.

Il-Kunsill issimplifika l-ġestjoni tal-fondi, billi naqqas il-piż amministrattiv filwaqt li żied il-flessibbiltà u l-proporzjonalità għall-istati membri. Il-mandati parzjali tal-Kunsill iġibu wkoll aktar prevedibbiltà u jiżguraw l-istabbiltà għall-investimenti.

Lil hinn mill-ħidma fi ħdan il-korpi preparatorji tal-Kunsill, il-presidenza Rumena bdiet negozjati interistituzzjonali mal-Parlament Ewropew rigward id-dispożizzjonijiet tar-regolament dwar id-dispożizzjonijiet komuni fir-rigward tal-programmazzjoni u l-ippjanar strateġiku.

Dan kien semestru impenjattiv fil-ħidma tal-Kunsill dwar il-pakkett ta' koeżjoni li jmiss u ninsab sodisfatt ħafna b'dak li ksibna. Bil-pożizzjoni tal-Kunsill rigward ir-regolament dwar id-dispożizzjonijiet komuni u r-regolamenti kollha speċifiċi għall-fondi miftiehma, il-presidenza Rumena kisbet l-objettivi tagħha. Barra minn hekk, l-iskambji tagħna mal-Parlament ser jgħinu fin-negozjati futuri u jipprovdu gwida siewja għal aktar ħidma taħt il-presidenza Finlandiża. Roxana Mînzatu, Ministru għall-Fondi Ewropej tar-Rumanija

• Rapport ta' progress tal-Presidenza dwar in-negozjati fi ħdan il-Kunsill
• Rapport ta' progress tal-Presidenza dwar in-negozjati mal-PE rigward ir-Regolament dwar id-Dispożizzjonijiet Komuni

Il-Kunsill kellu wkoll dibattitu ta' orjentazzjoni dwar l-isfidi futuri għall-programmazzjoni tal-fondi ta' koeżjoni għall-perjodu 2021-2027.

Il-pakkett leġislattiv għall-politika ta' koeżjoni jsaħħaħ ir-rabta mas-Semestru Ewropew. Dan jagħmel ir-rakkomandazzjonijiet speċifiċi għall-pajjiżi tal-2019 element ewlieni fit-tfassil tal-programmi għall-2021-2027 u jipprevedi eżerċizzju ta' rieżami ta' nofs it-terminu fl-2025 abbażi tar-rakkomandazzjonijiet speċifiċi għall-pajjiżi tal-2024.

Il-ministri ddiskutew kif ir-rakkomandazzjonijiet speċifiċi għall-pajjiżi jistgħu jiġu kkunsidrati fil-livell nazzjonali u fil-programmazzjoni reġjonali tal-fondi.

Skambjaw ukoll fehmiet dwar governanza ekonomika tajba u kundizzjonalitajiet oħra għall-finanzjament tal-koeżjoni, b'kont meħud tal-ħtieġa li l-fondi jintefqu bl-aktar mod effettiv, filwaqt li jiġi massimizzat l-impatt tagħhom fuq it-tnaqqis tad-disparitajiet reġjonali.

• Dokument ta' informazzjoni tal-Presidenza għad-dibattitu ta' orjentazzjoni