Kunsill Affarijiet Ġenerali, 09/04/2019, 9 ta' April 2019

Riżultati ewlenin

Il-qafas finanzjarju pluriennali li jmiss

Il-ministri kellhom skambju ta’ fehmiet dwar il-politika ta’ koeżjoni u l-Politika Agrikola Komuni (PAK) fil-kuntest tad-dibattitu dwar il-qafas finanzjarju pluriennali għall-perjodu 2021–2027 (QFP).

Id-diskussjoni kienet parti minn sensiela ta’ dibattiti tematiċi, li ser jikkontribwixxu għat-tħejjija ta’ abbozz issimplifikat ta’ kaxxa ta’ negozjar għall-Kunsill Ewropew ta’ Ġunju. L-abbozz tal-kaxxa ta' negozjar jiġbor flimkien dawk l-elementi li x’aktarx li jirrikjedu gwida politika mill-mexxejja tal-UE bil-ħsieb li jiffaċilitaw qbil fil-Kunsill.

Il-Presidenza ppreżentat ukoll lill-Kunsill rapport rivedut ta' progress li jiddeskrivi l-istat attwali fin-negozjati dwar il-proposti settorjali relatati mal-QFP.

Taħt il-Presidenza Rumena tal-Kunsill tal-UE, ħdimna b’mod intensiv fuq bosta programmi settorjali marbuta mal-QFP. Illum ippreżentajna r-riżultati tal-ħidma s’issa. Il-Kunsill u l-Parlament Ewropew issa għandhom fehma komuni dwar għaxar programmi futuri tal-UE. Dan ix-xogħol ta’ bażi għandu jgħinna nħejju u nimplimentaw il-programmi varji fil-ħin. George Ciamba, Ministru Delegat għall-Affarijiet Ewropej tar-Rumanija

• Rapport ta’ Progress dwar il-QFP

Konklużjonijiet tal-Kunsill dwar l-iżvilupp sostenibbli

Il-Kunsill adotta ġabra ta’ konklużjonijiet dwar l-implimentazzjoni mill-UE tal-Aġenda 2030 tan-Nazzjonijiet Uniti għall-Iżvilupp Sostenibbli. L-Aġenda 2030 ġiet stabbilita fl-2015 u hi magħmula minn ġabra ta’ 17-il Għan ta’ Żvilupp Sostenibbli (SDGs). Minħabba n-natura orizzontali tagħha, l-implimentazzjoni tagħha teħtieġ approċċ transpolitiku mill-UE u l-istati membri tagħha. Aktar kmieni din is-sena, il-Kummissjoni ppubblikat dokument ta' riflessjoni "Lejn Ewropa sostenibbli sal-2030", li l-konklużjonijiet qed jagħtu tweġiba għalih.

Fil-konklużjonijiet tiegħu, il-Kunsill jissottolinja l-importanza ċentrali tal-iżvilupp sostenibbli għall-Unjoni Ewropea u jisħaq li huwa fl-interess tal-UE li tkompli taqdi rwol ewlieni fl-implimentazzjoni tal-Aġenda 2030 u s-17-il għan ta' żvilupp sostenibbli tagħha. Hekk kif jagħraf l-importanza tagħha għall-UE, il-Kunsill jappella biex tiġi aċċellerata l-implimentazzjoni tal-Aġenda 2030 “kemm globalment kif ukoll internament, bħala prijorità ġenerali tal-UE, għall-benefiċċju taċ-ċittadini tagħha u biex titħares il-kredibbiltà tagħha fl-Ewropa u globalment.”

Il-Kunsill jirrepeti wkoll it-talba li għamel qabel lill-Kummissjoni biex tfassal strateġija komprensiva għall-implimentazzjoni tal-Aġenda 2030.

• Konklużjonijiet tal-Kunsill “Lejn Unjoni dejjem aktar sostenibbli sal-2030”
• Dokument ta' riflessjoni tal-Kummissjoni "Lejn Ewropa sostenibbli sal-2030"

Proċeduri tal-Artikolu 7

Il-ministri ddiskutew l-istat attwali rigward il-valuri tal-UE fl-Ungerija u l-istat tad-dritt fil-Polonja skont l-Artikolu 7(1) TUE.

Il-Kummissjoni pprovdiet aġġornament dwar l-aħħar żviluppi fl-Ungerija u l-Polonja, rispettivament, u wara dan il-ministri kellhom skambju ta’ fehmiet.

• Proposta motivata skont l-Artikolu 7(1) TUE dwar il-Polonja
• Proposta motivata skont l-Artikolu 7(1) TUE dwar l-Ungerija

Punti leġislattivi

Il-Kunsill adotta wkoll mingħajr diskussjoni għadd sinifikanti ta’ atti leġislattivi li jkopru firxa ta’ oqsma ta’ politika. Dan jirrifletti l-eżitu ta’ negozjati intensivi mal-Parlament Ewropew matul dawn l-aħħar ġimgħat hekk kif qed joqrob tmiem il-leġislatura attwali.

• Atti leġislattivi adottati mill-Kunsill Affarijiet Ġenerali