Kunsill Affarijiet Ġenerali, 18/06/2019, 18 ta' Ġunju 2019

Riżultati ewlenin

Tkabbir

Il-Kunsill adotta konklużjonijiet dwar il-politika ta' tkabbir tal-UE u l-proċess ta' stabbilizzazzjoni u ta' assoċjazzjoni.

Il-konklużjonijiet jaffermaw mill-ġdid l-impenn tal-Kunsill lejn it-tkabbir, li jibqa’ politika ewlenija tal-Unjoni Ewropea, f’konformità mal-kunsens imġedded dwar it-tkabbir approvat mill-Kunsill Ewropew f'Diċembru 2006 u l-konklużjonijiet sussegwenti tal-Kunsill.

Il-Kunsill itenni li t-tkabbir jibqa' jirrappreżenta investiment strateġiku fil-paċi, id-demokrazija, il-prosperità, is-sigurtà u l-istabbiltà fl-Ewropa.

Filwaqt li jafferma mill-ġdid il-konklużjonijiet tiegħu tas-26 ta' Ġunju 2018, il-Kunsill jilqa' l-Ftehim storiku u mingħajr preċedent ta' Prespa u jieħu nota tar-rakkomandazzjoni tal-Kummissjoni għall-ftuħ negozjati dwar l-adeżjoni mar-Repubblika tal-Maċedonja ta' Fuq u l-Albanija abbażi tal-evalwazzjoni pożittiva tagħha tal-progress li sar u l-issodisfar tal-kondizzjonijiet identifikati mill-Kunsill. Fid-dawl taż-żmien limitat disponibbli u tal-importanza tal-kwistjoni, il-Kunsill ser jerġa' lura għall-kwistjoni bil-ħsieb li tintlaħaq deċiżjoni ċara u sostantiva malajr kemm jista' jkun u mhux aktar tard minn Ottubru 2019.

Is-soluzzjoni maqbula b'kunsens fil-livell tal-istati membri kollha tirrappreżenta r-riżultat ta' ħidma intensiva matul proċess kumpless ta' negozjar u tibgħat messaġġ pożittiv, tippreserva perspettiva Ewropea u kronoloġija ċari għas-sħab li jiksbu riżultati fuq l-impenji tagħhom. L-eżitu tal-Kunsill tal-lum jikkonferma mill-ġdid li l-promozzjoni tal-politika dwar it-tkabbir, ibbażata fuq koeżjoni interna tal-UE, issaħħaħ il-koerenza u r-rilevanza tal-azzjoni globali tal-UE, li tibda fil-viċinat immedjat tagħna. George Ciamba, Ministru Delegat għall-Affarijiet Ewropej tar-Rumanija

• Konklużjonijiet tal-Kunsill dwar it-tkabbir u l-proċess ta' stabbilizzazzjoni u ta' assoċjazzjoni

Il-qafas finanzjarju pluriennali li jmiss

Il-Kunsill kellu dibattitu ta' orjentazzjoni dwar il-qafas finanzjarju pluriennali (QFP) għall-2021 sal-2027, qabel il-Kunsill Ewropew ta' Ġunju. Il-ministri kellhom skambju ta' fehmiet dwar l-abbozz rivedut tal-kaxxa ta' negozjar imħejji mill-Presidenza Rumena, bħala riżultat tal-ħidma intensiva mwettqa matul dan is-semestru.

L-għan tad-dokument huwa li jiċċara u jissimplifika l-opzjonijiet fuq il-mejda tan-negozjar sabiex jiġu ffaċilitati d-diskussjonijiet futuri bejn il-mexxejja, abbażi tal-prinċipju li ma jkunx hemm qbil jekk ma jkunx hemm qbil dwar kollox.

Il-ħidma fuq l-abbozz tal-kaxxa ta' negozjar mistennija tkompli matul il-presidenza Finlandiża abbażi tal-gwida li għandha tiġi pprovduta mill-mexxejja fil-laqgħa tagħhom fl-20 u l-21 ta' Ġunju.

It-terminu tagħna bħala l-Presidenza tal-Kunsill kien ikkaratterizzat minn ħidma intensiva dwar il-QFP u l-programmi settorjali relatati. It-tħejjija ta' abbozz rivedut ta' kaxxa ta' negozjar iffurmat parti minn dawn l-isforzi. Fil-fehma tal-Presidenza, din tipprovdi bażi solida għall-kollegi Finlandiżi tagħna biex javvanzaw dan il-fajl bil-ħsieb tal-iffaċilitar ta' qbil f'waqtu. George Ciamba, Ministru Delegat għall-Affarijiet Ewropej tar-Rumanija

• Abbozz rivedut tal-kaxxa ta' negozjar imħejji mill-presidenza (14/06/2019)

Kunsill Ewropew ta' Ġunju

Il-Kunsill iffinalizza t-tħejjijiet għal-laqgħa tal-Kunsill Ewropew tal-20 u l-21 ta' Ġunju 2019 billi ddiskuta l-abbozz ta' konklużjonijiet.

F'din il-laqgħa l-mexxejja tal-UE mistennija:

• jieħdu d-deċiżjonijiet rilevanti dwar il-ħatriet għaċ-ċiklu istituzzjonali li jmiss u jadottaw l-aġenda strateġika tal-UE għall-2019-2024
• imorru lura għall-kwistjoni tal-qafas finanzjarju pluriennali li jmiss
• jiddiskutu t-tibdil fil-klima qabel is-Summit tas-Segretarju Ġenerali tan-NU dwar l-Azzjoni Klimatika fit-23 ta' Settembru 2019
• fil-kuntest tas-Semestru Ewropew, jiddiskutu r-rakkomandazzjonijiet speċifiċi għall-pajjiżi
• jieħdu nota ta' rapport dwar id-diżinformazzjoni u l-elezzjonijiet imħejji mill-Presidenza Rumena f'kooperazzjoni mal-Kummissjoni u r-Rappreżentant Għoli

• Laqgħa tal-Kunsill Ewropew tal-20 u l-21 ta' Ġunju 2019

Semestru Ewropew

Il-Kunsill iddiskuta rapport orizzontali dwar ir-rakkomandazzjonijiet speċifiċi għall-pajjiżi u ddeċieda li jibagħtu lill-Kunsill Ewropew

Dokument provviżorju tal-ivvjaġġar tal-UE

Il-Kunsill adotta, mingħajr diskussjoni, direttiva dwar dokument provviżorju tal-ivvjaġġar tal-UE. Id-direttiva taġġorna r-regoli, il-format u l-karatteristiċi tas-sigurtà tad-dokument provviżorju tal-ivvjaġġar tal-UE. Tissimplifika l-formalitajiet għal ċittadini tal-UE mhux rappreżentati f'pajjiżi terzi li l-passaport jew id-dokument tal-ivvjaġġar tagħhom ikun intilef, insteraq jew inqered.

• Il-Kunsill jadotta direttiva għal dokument provviżorju tal-ivvjaġġar tal-UE (stqarrija għall-istampa, 18/06/2019)